വിജയവഴിയില്‍ കെകെആര്‍, വരുണും വെങ്കടേഷും തിളങ്ങി; ഐപിഎല്ലില്‍ എസ്ആര്‍എച്ചിന് മൂന്നാം തോല്‍വി

Authored byനിഷാദ് അമീന്‍ | Samayam Malayalam | Updated: 3 Apr 2025, 11:42 pm

Samayam Malayalamവെങ്കടേഷ് അയ്യര്‍, വൈഭവ് അറോറ എന്നിവര്‍ എസ്ആര്‍എച്ചിനെതിരായ മല്‍സരത്തില്‍

ഐപിഎല്‍ 2025ല്‍ (IPL 2025) കൊല്‍ക്കത്ത നൈറ്റ് റൈഡേഴ്‌സ് (Kolkata Knight Riders) വിജയപാതയില്‍ തിരിച്ചെത്തി. ആദ്യ മൂന്ന് മല്‍സരങ്ങളില്‍ രണ്ടിലും പരാജയപ്പെട്ട് ഏറ്റവും പിന്നിലായിപ്പോയ നിലവിലെ ചാമ്പ്യന്‍മാര്‍ നാലാം മല്‍സരത്തില്‍ സണ്‍റൈസേഴ്‌സ് ഹൈദരാബാദിനെ (Sunrisers Hyderabad) തോല്‍പ്പിച്ചു. 80 റണ്‍സിന്റെ ആധികാരിക ജയമാണ് കെകെആര്‍ നേടിയത്.കെകെആര്‍ 20 ഓവറില്‍ 200 റണ്‍സ് നേടി. ആറ് വിക്കറ്റാണ് നഷ്ടമായത്. എസ്ആര്‍എച്ച് 16.4 ഓവറില്‍ 120 റണ്‍സിന് ഓള്‍ഔട്ടായി. എസ്ആര്‍എച്ചിന്റെ തുടര്‍ച്ചയായ മൂന്നാം തോല്‍വിയാണിത്. ആദ്യ മാച്ചില്‍ അവര്‍ രാജസ്ഥാന്‍ റോയല്‍സിനെ തോല്‍പ്പിച്ചിരുന്നു. കെകെആര്‍ നേരത്തേ ആര്‍സിബിയോടും മുംബൈ ഇന്ത്യന്‍സിനോടും തോല്‍ക്കുകയും ആര്‍ആറിനെ എട്ട് വിക്കറ്റിന് തകര്‍ക്കുകയും ചെയ്തിരുന്നു.


120 പന്തില്‍ 201 റണ്‍സ് വിജയക്ഷ്യവുമായി ബാറ്റ് ചെയ്ത എസ്ആര്‍എച്ചിന് കെകെആറിന്റെ മികച്ച ബൗളിങിന് മുന്നില്‍ പിടിച്ചുനില്‍ക്കാനായില്ല. മൂന്ന് പേര്‍ മാത്രമാണ് രണ്ടക്കം കടന്നത്. ഹെന്റിച്ച് ക്ലാസെന്‍ (33), കാമിന്ദു മെന്‍ഡിസ് (27), നീതീഷ് റെഡ്ഡി (19) എന്നിവരാണിവര്‍.

കെകെആറിനായി വരുണ്‍ ചക്രവര്‍ത്തി നാല് ഓവറില്‍ 22 റണ്‍സിന് മൂന്ന് വിക്കറ്റും വൈഭവ് അറോറ നാല് ഓവറില്‍ 29 റണ്‍സിന് മൂന്ന് വിക്കറ്റും നേടി. ആേ്രന്ദ റസ്സെല്‍ 1.4 ഓവറില്‍ രണ്ട് വിക്കറ്റ് നേടി. മൂന്ന് മുന്‍നിര വിക്കറ്റുകള്‍ വീഴ്ത്തിയ വൈഭവ് അറോറ പ്ലെയര്‍ ഓഫ് ദി മാച്ച് ആയി.

സഞ്ജു സാംസണിന് കീപ്പര്‍ ഗൗസ് അണിയാന്‍ സിഒഇ അനുമതി; രാജസ്ഥാന്‍ റോയല്‍സിന്റെ ക്യാപ്റ്റന്‍സി വീണ്ടും ഏറ്റെടുക്കും
ആദ്യം ബാറ്റ് ചെയ്ത കെകെആറിന് വേണ്ടി വെങ്കടേഷ് അയ്യര്‍, അങ്ക്രിഷ് രഘുവന്‍ഷി എന്നിവര്‍ അര്‍ധ സെഞ്ചുറികള്‍ നേടി. വെങ്കടേഷ് അയ്യര്‍ 29 പന്തില്‍ 60 റണ്‍സെടുത്തു. അഞ്ചാം നമ്പറില്‍ വെങ്കടേഷ് പുറത്തെടുത്ത പ്രകടനമാണ് കെകെആറിനെ 200 തികയ്ക്കാന്‍ സഹായിച്ചത്. മൂന്ന് സിക്‌സറുകളും ഏഴ് ബൗണ്ടറികളും സഹിതമാണ് 60 ലെത്തിയത്.

രഘുവന്‍ഷി 32 പന്തില്‍ 50 റണ്‍സെടുത്ത് പുറത്തായി. ക്യാപ്റ്റന്‍ അജിങ്ക്യ രഹാനെ 27 പന്തില്‍ 38 റണ്‍സെടുത്തു. റിങ്കു സിങ് 17 പന്തില്‍ പുറത്താവാതെ 32 റണ്‍സ് നേടി. ഓപണര്‍മാരായ ഡി കോക്ക് (1), സുനില്‍ നരേയ്ന്‍ (7) എന്നിവര്‍ വേഗം പുറത്തായിരുന്നു.

കപ്പില്ലാത്തവർ ആദ്യ മൂന്ന് സ്ഥാനങ്ങളിൽ, ഇത്തവണ വമ്പൻ ട്വിസ്റ്റ് നടക്കും? പ്രതീക്ഷയിൽ ഈ ടീമുകളുടെ ആരാധകർ
ഏപ്രില്‍ എട്ടിന് എല്‍എസ്ജിക്കെതിരേയാണ് കെകെആറിന്റെ അടുത്ത മല്‍സരം. ഏപ്രില്‍ ആറിന് ഗുജറാത്ത് ടൈറ്റന്‍സിനെയാണ് എസ്ആര്‍എച്ച് നേരിടുക.