വിജയവഴിയിൽ ആസ്റ്റൻ വില്ല; നോട്ടിങ്ങാം ഫോറസ്റ്റിനെ തോൽപ്പിച്ച് 3–1ന്; പോയിന്റ് പട്ടികയിൽ രണ്ടാമത്

ബർമിങ്ങാം ∙ കഴിഞ്ഞ മത്സരത്തിൽ ആർസനലിനോടേറ്റ അപ്രതീക്ഷിത തോൽവിയുടെ ക്ഷീണം നോട്ടിങ്ങാം ഫോറസ്റ്റിനെതിരായ ജയത്തിലൂടെ ആസ്റ്റൻ വില്ല മറികടന്നു. ഇംഗ്ലിഷ് പ്രിമിയർ ലീഗ് ഫുട്ബോളിലെ ആവേശപ്പോരാട്ടത്തിൽ 3–1നാണ് നോട്ടിങ്ങാമിനെ വില്ല മറികടന്നത്. ജോൺ മക്ഗിൻ (49, 73 മിനിറ്റുകൾ), ഒലീ വാട്കിൻസ് (45+1) എന്നിവരാണ് വില്ലയ്ക്കായി ലക്ഷ്യം കണ്ടത്.

മോർഗൻ ഗിബ്സ് വൈറ്റിന്റെ (61) വകയായിരുന്നു നോട്ടിങ്ങാമിന്റെ ആശ്വാസ ഗോൾ. ജയത്തോടെ 20 മത്സരങ്ങളിൽ നിന്ന് 42 പോയിന്റുമായി വില്ല രണ്ടാമതെത്തി. 19 മത്സരങ്ങളിൽ നിന്ന് 45 പോയിന്റുള്ള ആർസനലാണ് ഒന്നാമത്. മറ്റു മത്സരങ്ങളിൽ ബ്രൈട്ടൻ 2–0ന് ബേൺലിയെയും വൂൾവ്സ് 3–0ന് വെസ്റ്റ്ഹാമിനെയും തോൽപിച്ചു.