വിരാട് കോഹ്ലിക്ക് ഇത് എന്തുപറ്റി? ഐപിഎൽ ഫൈനലിലെ ഇന്നിങ്സ് ആരാധകരെ നിരാശപ്പെടുത്തുന്നത്; ടീമിന്റെ റൺ നിരക്കിനെയും ബാധിച്ചു

Curated by: ഗോകുൽ എസ്|Samayam Malayalam•3 Jun 2025, 9:26 pm

2025 സീസൺ ഇന്ത്യൻ പ്രീമിയർ ലീഗിന്റെ ഫൈനലിൽ ആരാധകരുടെ പ്രതീക്ഷക്ക് ഒത്തുയരാൻ സാധിക്കാതെ ആർസിബി സൂപ്പർ താരം വിരാട് കോഹ്ലി. പഞ്ചാബ് കിങ്സിന് എതിരായ ഫൈനലിൽ ആർസിബിക്ക് വേണ്ടി ബാറ്റിങ് ഓപ്പൺ ചെയ്ത കോഹ്ലി 43 റൺസ് നേടിയെങ്കിലും അതിനായി 35 പന്തുകളാണ് എടുത്തത്. 122.86 ആയിരുന്നു കോഹ്ലിയുടെ സ്ട്രൈക്ക് റേറ്റ്. മൂന്ന് ബൗണ്ടറികൾ മാത്രമാണ് താരത്തിന് നേടാനായത്. ആക്രമിച്ച് കളിക്കുന്നതിൽ കോഹ്ലി പരാജയപ്പെട്ടത് ആർസിബിയുടെ റൺ നിരക്കിനെയും ബാധിച്ചു. ഈ സീസണിൽ കിടിലൻ ഫോമിൽ കളിച്ചുവന്ന കോഹ്ലിയുടെ ഫൈനൽ ഇന്നിങ്സ് ആരാധകരെ നിരാശപ്പെടുത്തിയെന്ന് വ്യക്തം. 35 പന്തിൽ നിന്ന് 43 റൺസെടുത്ത കോഹ്ലി, അഫ്ഗാനിസ്താൻ താരം അസ്മത്തുള്ള ഒമർസായിയുടെ പന്തിൽ അദ്ദേഹത്തിന് തന്നെ ക്യാച്ച് സമ്മാനിച്ചാണ് പുറത്തായത്.


ആർസിബി ഇന്നിങ്സ് ഇങ്ങനെ: നേരത്തെ മത്സരത്തിൽ ടോസ് നേടിയ പഞ്ചാബ് കിങ്സ് നായകൻ ശ്രേയസ് അയ്യർ, ആർസിബിയെ ബാറ്റിങ്ങിന് അയക്കുകയായിരുന്നു. ഫിൽ സാൾട്ട് ആക്രമിച്ച് തുടങ്ങിയെങ്കിലും അധിക നേരം ക്രീസിൽ തുടരാനായില്ല. ഒൻപത് പന്തിൽ രണ്ട് ഫോറുകളും ഒരു സിക്സറുമടക്കം 16 റൺസെടുത്താണ് താരം പുറത്തായത്. ടീം സ്കോർ 56 എത്തിയപ്പോൾ മയങ്ക് അഗർവാൾ വീണു. 18 പന്തിൽ 24 റൺസായിരുന്നു
മയങ്കിന്റെ സമ്പാദ്യം.

ഐപിഎൽ ഫൈനലിൽ ആദ്യ മുൻതൂക്കം പഞ്ചാബ് കിങ്സിന്, ടോസ് നേടി; കിടിലൻ പ്ലേയിങ് ഇലവനുകൾ ഇങ്ങനെ
ക്യാപ്റ്റൻ രജത് പാട്ടിദാർ നല്ല രീതിയിൽ തുടങ്ങിയെങ്കിലും സാൾട്ടിനെ പോലെ തന്നെ അധിക നേരം ക്രീസിൽ തുടരാനായില്ല. 16 പന്തിൽ ഒരു ഫോറും രണ്ട് സിക്സറുകളുമടക്കം 26 റൺസെടുത്താണ് ആർസിബി നായകൻ വീണത്. വിരാട് കോഹ്ലി 35 പന്തിൽ 43 റൺസെടുത്ത് പുറത്താകുമ്പോൾ ആർസിബി 131/4. ലിയാം ലിവിങ്സ്റ്റണും, ജിതേഷ് ശർമയും ഒത്തുചേർന്നതോടെ ആർസിബി സ്കോർ കുതിച്ചുകയറി. എന്നാൽ ഇരുവരും അടുത്തടുത്ത് പുറത്താവുകയായിരുന്നു. ലിവിങ്സ്റ്റൺ 15 പന്തിൽ 25 റൺസും, ജിതേഷ് ശർമ 10 പന്തിൽ 24 റൺസും നേടി.

Also Read: ആര്‍സിബി ഐപിഎല്‍ കിരീടം നേടുമെന്ന് 6.4 കോടി രൂപക്ക് പന്തയം വെച്ചിരിക്കുകയാണ് കനേഡിയന്‍ റാപ്പ് ഗായകന്‍

റൊമാരിയോ ഷെഫേഡ് ആർസിബി സ്കോർ 200 കടത്തുമെന്ന് കരുതിയിരുന്നപ്പോളാണ് അവസാന ഓവറിൽ അർഷ്ദീപ് സിങ് കിടിലൻ ബൗളിങ് കാഴ്ച വെച്ചത്. ഒമ്പത് പന്തിൽ 17 റൺസ് നേടിയ ഷെഫേഡിന്റെ അടക്കം മൂന്ന് വിക്കറ്റുകളാണ് ഇരുപതാം ഓവറിൽ അർഷ്ദീപ് നേടിയത്. വിട്ടുകൊടുത്തത് മൂന്ന് റൺസ് മാത്രവും. ഇതോടെ ആർസിബി സ്കോർ 20 ഓവറിൽ 190/9 ൽ അവസാനിച്ചു.