വിവാഹ മോചനത്തിന് ശേഷം കുഞ്ഞു പിറന്നു, സന്തോഷ വാര്‍ത്ത പങ്കുവച്ച് നടി ലീ സീ യങ്

Authored by: അശ്വിനി പി|Samayam Malayalam•6 Nov 2025, 4:02 pm

തനിക്ക് രണ്ടാമതൊരു പെണ്‍കുഞ്ഞ് പിറന്നു എന്ന സന്തോഷ വാര്‍ത്ത പങ്കുവച്ച് നടി ലീ സീ യങ് . തന്റെയും കുഞ്ഞിന്റേയും ഏതാനും ചിത്രങ്ങള്‍ പങ്കുവച്ചുകൊണ്ടാണ് ലീ സീ യങ് ആ സന്തോഷ വാര്‍ത്ത അറിയിക്കുന്നത്. ഇന്നലെ ജന്മം നല്‍കിയ കുഞ്ഞിനൊപ്പമുള്ള, ആശുപത്രിയില്‍ നിന്നുള്ള ചിത്രങ്ങളാണ് പങ്കുവച്ചിരിയ്ക്കുന്നത്. ദൈവം തന്ന സമ്മാനമാണ് അവള്‍ എന്ന് നടി പറയുന്നു

വിവാഹ മോചനം കഴിഞ്ഞ് ഏതാണ്ട് ഒരു വര്‍ഷത്തിന് ശേഷം ഇങ്ങനെ ഒരു വാര്‍ത്ത പ്രഖ്യാപിച്ചത് ആരാധകര്‍ക്കും കൗതുകമാണ്. ഐ വി എഫി ലൂടെയാണ് ഗര്‍ഭം ധരിച്ചത്. നേരത്തെ മുന്‍ ഭര്‍ത്താവില്‍ നിന്ന് നടിക്കൊരു മകന്‍ പിറന്നിരുന്നു. ഈ വര്‍ഷം തുടക്കത്തിലാണ് ലീ സീ യങ് ഭര്‍ത്താവുമായി വേര്‍പിരിഞ്ഞത്.

Also Read: ദിലീപിന്റെ രാശിയാണത്! റാണിയും ക്ലിക്കായി, പൂക്കി ലുക്കില്‍ ദിലീപിന്റെ നായിക

ദൈവം എന്റെ അമ്മയ്ക്ക് നല്‍കിയ സമ്മാനമാണിതെന്ന് ഞാന്‍ കരുതുന്നു. എന്റെ ജീവിതകാലം മുഴുവന്‍ ഞാന്‍ നിങ്ങളെ സന്തോഷിപ്പിക്കും. പ്രൊഫസര്‍ വോണ്‍ ഹൈ സുങ്ങിന് വളരെ നന്ദി, ആ നന്ദിയുള്ള ഹൃദയം ഞാന്‍ ഒരിക്കലും മറക്കില്ല- എന്നാണ് ഫോട്ടോകള്‍ക്കൊപ്പം ലീ സീ യങ് ഇന്‍സ്റ്റഗ്രാമില്‍ കുറിച്ചത്.

2017 ല്‍ ആണ് ലീ സീ യങ് വിവാഹിതയായത്. ഭര്‍ത്താവ് സെലിബ്രിറ്റി ആയിരുന്നില്ല, റസ്റ്റോറന്റ് ബിസിനസ്സുകാരനായിരുന്നു. നടിയെക്കാള്‍ ഒന്‍പത് വയസ്സ് മൂത്ത ആളാണ് ഭര്‍ത്താവ് എന്നാണ് റിപ്പോര്‍ട്ടുകള്‍. ഇരുവര്‍ക്കും ഒരു മകനും പിറന്നു. എട്ട് വര്‍ഷത്തെ ദാമ്പത്യ ജീവിതത്തിന് ശേഷം, 2025 മാര്‍ച്ച് മാസത്തോടെയാണ് താന്‍ വിവാഹ മോചിതയാകുന്നു എന്ന് 43 കാരിയായ നടി പ്രഖ്യാപിച്ചത്.


വിവാഹമോചനം കഴിഞ്ഞ് ഏതാനും മാസങ്ങള്‍ക്ക് ശേഷം, ജൂലൈയില്‍ താന്‍ രണ്ടാമത്തെ കുഞ്ഞിനെ ഗര്‍ഭം ധരിച്ചു എന്ന സന്തോഷ വാര്‍ത്ത ലീ സീ യങ് അറിയിച്ചു. തന്റെ പങ്കാളിയുമായുള്ള വിവാഹസമയത്ത് മരവിപ്പിച്ചിരുന്ന ഒരു ഭ്രൂണം ഇംപ്ലാന്റ് ചെയ്തതാണെന്നും വ്യക്തമാക്കി. ഉപേക്ഷിക്കാന്‍ തോന്നിയില്ല, അതുകണ്ട് ഉപയോഗിച്ചു എന്നായിരുന്നു നടി പറഞ്ഞത്. എന്നാല്‍ ഒരു അഭിമുഖത്തില്‍, മുന്‍ ഭര്‍ത്താവ് രണ്ടാമ്തതെ കുട്ടിയെ സ്വീകരിക്കുന്നതില്‍ ആദ്യം എതിര്‍പ്പ് പ്രകടിപ്പിച്ചതായി നടി പറഞ്ഞു. അതേ സമയം തന്റെ ആഗ്രഹത്തെ മാനിച്ച് പിതാവെന്ന നിലയില്‍ ഉത്തരവാദിത്വം നിറവേറ്റാന്‍ തയ്യാറാവുകയുമായിരുന്നുവത്രെ.