വീണ്ടും റെക്കോഡ് തിളക്കം; ഇത് ചിലരോടുള്ള പ്രതികാര താണ്ഡവം തന്നെ; ഐപിഎല്ലിൽ ഡേവിഡ് വാർണറെ മറികടന്ന് ചരിത്രം സൃഷ്ടിച്ച് കെ എൽ രാഹുൽ

Edited byഅനുഷ ഗംഗാധരൻ | Samayam Malayalam | Updated: 23 Apr 2025, 9:49 am

ലക്‌നൗ: ഇന്ത്യൻ പ്രീമിയർ ലീഗ് 2025 സീസണിൽ വീണ്ടും റെക്കോഡ് നേട്ടത്തിൽ തിളങ്ങി കെ എൽ രാഹുൽ. കഴിഞ്ഞ ദിവസം ലക്‌നൗ സൂപ്പർ ജെയ്ന്റ്സ് - ഡൽഹി ക്യാപിറ്റൽസ് മത്സരത്തിൽ അർദ്ധ സെഞ്ചുറി നേടിയ താരം മാച്ച് ഫിനിഷിങ് പ്രകടനമാണ് മത്സരത്തിൽ കാഴ്ചവെച്ചത്. ഈ മത്സരത്തിൽ 57 റൺസ് നേടിയ താരം മറ്റൊരു റെക്കോഡ് കൂടി സ്വന്തമാക്കി.
കൈവിട്ടത് മാണിക്യത്തെ എന്ന് ഇപ്പോൾ മനസ്സിലായിക്കാണും; കെ എൽ രാഹുലിന്റെ ഫിനിഷിങ് കണ്ട ലക്‌നൗ ഉടമയുടെ റിയാക്ഷൻ വീഡിയോ വൈറലാകുന്നുഐപിഎല്ലിൽ ഏറ്റവും വേഗത്തിൽ 5000 റൺസ് നേടുന്ന താരം എന്ന റെക്കോഡാണ് കെഎൽ രാഹുൽ സ്വന്തമാക്കിയത്. 130 ഇന്നിങ്‌സുകളിൽ നിന്നാണ് ഡൽഹി വിക്കറ്റ് കീപ്പർ ബാറ്റർ ഈ നാഴികക്കല്ല് പിന്നിട്ടത്. 2020 സീസണിൽ ഡേവിഡ് വാർണർ സ്വന്തമാക്കിയ റെക്കോഡ് ആണ് ഇതോടെ പഴങ്കഥയായത്. 135 ഇന്നിങ്‌സ് തികഞ്ഞപ്പോൾ ആണ് ഡേവിഡ് വാർണർ 5000 റൺസ് നേടുന്നത്. ഇതാണ് കെഎൽ രാഹുൽ അനായാസം മറികടന്ന് എലൈറ്റ് ക്ലബ്ബിൽ ഒന്നാമതെത്തിയിരിക്കുന്നത്.
45നു മുകളിൽ ശരാശരിയോടെ ഈ നേട്ടത്തിലെത്തുന്ന ഒരേ ഒരു താരവും കെഎൽ രാഹുൽ തന്നെയാണ്. അതേസമയം ഐപിഎൽ ചരിത്രത്തിൽ ഏറ്റവും വേഗത്തിൽ 3500, 4000, 4500 റൺസ് തികയ്ക്കുന്ന താരം കൂടിയാണ് രാഹുൽ. റോയൽ ചലഞ്ചേഴ്‌സ് ബെംഗളൂരു , സൺറൈസേഴ്‌സ് ഹൈദരാബാദ് , പഞ്ചാബ് കിങ്‌സ് , ലക്‌നൗ സൂപ്പർ ജെയ്ന്റ്സ് എന്നീ ടീമുകളിലാണ് ഐപിഎല്ലിൽ താരം ഇതുവരെ കളിച്ചത്. ഈ സീസണിൽ ഡൽഹി ക്യാപിറ്റൽസിൽ എത്തിയ താരം മികച്ച ഫോമിലാണ് കളിക്കുന്നത്. വിക്കറ്റ് കീപ്പിങ്ങിലും ബാറ്റിങ്ങിലും തിളങ്ങിയ താരം പലപ്പോഴും ഡൽഹിയുടെ വിജയ ശില്പിയായി മാറിയിട്ടുണ്ട്.

കഴിഞ്ഞ ദിവസം നടന്ന മത്സരത്തിലും കെഎൽ രാഹുൽ തന്നെയായിരുന്നു ഡൽഹി ക്യാപിറ്റൽസിന്റെ വിജയ ശില്പി. ഈ സീസണിൽ താരം ഏറ്റവും കൂടുതൽ റൺസ് നേടിയത് ചിന്നസ്വാമി സ്റ്റേഡിയത്തിൽ വെച്ച് നടന്ന റോയൽ ചലഞ്ചേഴ്‌സ് ബംഗളുരുവിനെതിരെയുള്ള മത്സരത്തിലാണ്. 93 റൺസാണ് താരം സ്വന്തമാക്കിയത്.

ഡൽഹി ക്യാപിറ്റലിസിന്റെ അടുത്ത മത്സരം വീണ്ടും ആർസിബിയ്ക്ക് എതിരെയാണ്. ഈ മത്സരം ബാംഗ്ളൂരിന്റെ എവേ പോരാട്ടം ആയതുകൊണ്ട് തന്നെ ഇതുവരെയുള്ള സീസണിലെ ട്രെന്റ് വെച്ചുനോക്കുമ്പോൾ ആർസിബിയ്ക്കാണ് ജയ സാധ്യത കൂടുതലുള്ളത്. ആർസിബിയുടെ എവേ മത്സരങ്ങളിലെ തുടർച്ചയായുള്ള ജയം ഡൽഹി തിരുത്തികുറിക്കുമോ എന്നാണ് ആരാധകർക്ക് ഇനി അറിയേണ്ടത്.