വെടിക്കെട്ട് ബാറ്റി‌ങ്ങുമായി ശ്രേയസ് അയ്യർ, വിഷ്ണു‌ വിനോദും തിളങ്ങി; പഞ്ചാബ് കിങ്സിന്റെ പരിശീലന മത്സരത്തിൽ നടന്നത് ഇങ്ങനെ

Curated byഗോകുൽ എസ് | Samayam Malayalam | Updated: 20 Mar 2025, 3:31 pm

Samayam Malayalamവിഷ്ണു‌ വിനോദ് & ശ്രേയസ് അയ്യർ

ഐപിഎല്ലിൽ ഇതുവരെ കിരീടം നേടാൻ സാധിച്ചിട്ടില്ലാത്ത ടീമാണ് പഞ്ചാബ് കിങ്സ്. അതിനൊരു അവസാനം കുറിക്കുകയെന്ന ലക്ഷ്യവുമായാണ് 2025 സീസണ് അവരെത്തുന്നത്. മെഗാ താരലേലം കഴിഞ്ഞതോടെ ടീമിന്റെ മുഖം മാറി. ടൂർണമെന്റിലെ മികച്ച സ്ക്വാഡുകളിലൊന്ന് ഇപ്പോൾ അവർക്ക് അവകാശപ്പെടാനാകും. ഇന്ത്യൻ ക്രിക്കറ്റിലെ സൂപ്പർ താരങ്ങളിൽ ഒരാളായ ശ്രേയസ് അയ്യരാണ് ഇത്തവണ പഞ്ചാബ് കിങ്സിന്റെ നായകൻ. ഇക്കഴിഞ്ഞ ഐസിസി ചാമ്പ്യൻസ് ട്രോഫിയിൽ ഇന്ത്യക്ക് വേണ്ടി ഉജ്ജ്വല പ്രകടനം കാഴ്ച വെച്ചതിന് ശേഷമാണ് ശ്രേയസ് അയ്യർ ഐപിഎല്ലിലേക്ക് എത്തുന്നത്. ഇപ്പോളിതാ ഐപിഎല്ലിന് മുൻപ് നടന്ന പഞ്ചാബ് കിങ്സിന്റെ ഇൻട്രാ സ്ക്വാഡ് പരിശീലന മത്സരത്തിലും ശ്രേയസ് അയ്യർ തിളങ്ങിയിരിക്കുന്നു. ശ്രേയസിന് ഒപ്പം മലയാളി താരം വിഷ്ണു‌ വിനോദും ഈ കളിയിൽ ശ്രദ്ധേയ പ്രകടനം കാഴ്ചവെച്ചു എന്നതാണ്‌ ശ്രദ്ധേയം.


ചണ്ഡീഗഢിലെ ന്യൂ പിസിഎ സ്റ്റേഡിയത്തിലാണ് പഞ്ചാബ് കിങ്സ് രണ്ട് ടീമുകളായി തിരിഞ്ഞ് ഇൻട്രാ സ്ക്വാഡ് പരിശീലന മത്സരം കളിച്ചത്. മത്സരത്തിൽ ആദ്യം ബാറ്റ് ചെയ്ത ടീം ബി നിശ്ചിത 20 ഓവറിൽ 205 റൺസാണ് നേടിയത്. ശ്രേയസ് അയ്യരായിരുന്നു ടീമിന്റെ ബാറ്റിങ് ഹീറോ. 41 പന്തുകളിൽ‌ 85 റൺസാണ് ശ്രേയസ് അടിച്ചുകൂട്ടിയത്. ടീം എ ക്ക് വേണ്ടി ശശാങ്ക്‌ സിങ് 38 റൺസിന് രണ്ട് വിക്കറ്റുകൾ വീഴ്ത്തി.

Also Read: രാജസ്ഥാൻ റോയൽസിന് പുതിയ ക്യാപ്റ്റൻ, സഞ്ജു ആദ്യ മൂന്ന് മത്സരം കളിക്കുക സ്പെഷ്യലിസ്റ്റ് ബാറ്ററായി മാത്രം

206 റൺസ് വിജയലക്ഷ്യം പിന്തുടർന്ന ടീം എ ക്ക് വേണ്ടി പ്രിയാൻഷ് ആര്യയും പ്രഭ്സിമ്രാൻ സിങ്ങും ചേർന്ന് വെടിക്കെട്ട് തുടക്കമാണ് നൽകിയത്. പ്രിയാൻഷ് ആര്യ 31 പന്തിൽ ‌72 റൺസും, പ്രഭ്സിമ്രാൻ സിങ് 42 പന്തിൽ 66 റൺസുമാണ് നേടിയത്. മലയാളി സൂപ്പർ താരം വിഷ്ണു‌ വിനോദും ചെറിയ വെടിക്കെട്ട് നടത്തി. 10 പന്തിൽ 26 റൺസെടുത്ത് അദ്ദേഹം പുറത്താകാതെ നിന്നു.

ടീം എ 198 റൺസാണ് നേടിയത്. ഇതോടെ മത്സരത്തിൽ അവർക്ക് ഏഴ് റൺസിന്റെ തോൽവി നേരിടേണ്ടി വന്നു. അർഷ്ദീപ് സിങ്ങാണ് ടീം ബി ക്കായി ബൗളിങ്ങിൽ തിളങ്ങിയത്. നാല് ഓവറുകളിൽ 22 റൺസിന് രണ്ട് വിക്കറ്റുകളാണ് അദ്ദേഹം നേടിയത്.

Also Read: വെടിക്കെട്ട് സെഞ്ചുറി നേടി റിയാൻ പരാഗ്, ഞെട്ടിച്ച് ജൂറലും ജയ്സ്വാളും; സഞ്ജുവും ടീമും ഇക്കുറി ഡബിൾ സ്ട്രോങ്ങ്

അതേ സമയം 22 ന് ആരംഭിക്കാനിരിക്കുന്ന 2025 സീസൺ ഇന്ത്യൻ പ്രീമിയർ ലീഗിൽ പഞ്ചാബ് കിങ്സിന്റെ ആദ്യ മത്സരം ഈ മാസം 25 നാണ്. ശുഭ്മാൻ ഗിൽ നയിക്കുന്ന ഗുജറാത്ത് ടൈറ്റൻസാണ് എതിരാളികൾ.