വൈഭവ് സൂര്യവംശി ഉടൻ ഇന്ത്യയുടെ ടി20 ടീമിലെത്തും, കിടിലൻ സെഞ്ചുറിക്ക് പിന്നാലെ പ്രതീക്ഷകളുമായി താരത്തിന്റെ പരിശീലകൻ

Curated byഗോകുൽ എസ് | Samayam Malayalam | Updated: 29 Apr 2025, 3:56 pm

രാജസ്ഥാൻ റോയൽസിന്റെ കൗമാര സെൻസേഷൻ വൈഭവ് സൂര്യവംശിയാണ് ഇപ്പോൾ ഇന്ത്യൻ ക്രിക്കറ്റിലെ പ്രധാന ചർച്ചാവിഷയം. ഐപിഎല്ലിൽ ഇന്നലെ ഗുജറാത്ത് ടൈറ്റൻസിന് എതിരെ നടന്ന കളിയിൽ മാസ്മരിക സെഞ്ചുറി നേടി ഈ പതിനാലുകാരൻ എല്ലാവരെയും ഞെട്ടിച്ചുകഴിഞ്ഞു. 35 പന്തിൽ സെഞ്ചുറി നേടിയ വൈഭവ് 38 പന്തിൽ 101 റൺസ് നേടിയാണ് മത്സരത്തിൽ പുറത്തായത്. ഈ ഇന്നിങ്സിന് പിന്നാലെ വൈഭവിനെ വാഴ്ത്തി ക്രിക്കറ്റ് ലോകം ഒന്നടങ്കം രംഗത്തെത്തി. ഇപ്പോളിതാ താരം ഉടൻ ഇന്ത്യയുടെ ടി20 ടീമിലേക്ക് എത്തുമെന്ന് അഭിപ്രായപ്പെട്ടിരിക്കുകയാണ് അദ്ദേഹത്തിന്റെ മുൻ പരിശീലകനായ മനീഷ് ഓജ. ഒന്നോ രണ്ടോ വർഷത്തിനുള്ളിൽ വൈഭവ് ഇന്ത്യൻ ജേഴ്സി അണിയുമെന്നാണ് ഓജയുടെ പക്ഷം. തന്നെ‌ സംബന്ധിച്ച് വളരെ അഭിമാനകരമായ നിമിഷമാണ് ഇതെന്നും ബീഹാറിനെ ഇന്ത്യയുടെ ക്രിക്കറ്റ് ഭൂപടത്തിൽ ഉൾപ്പെടുത്താൻ വൈഭവിന് കഴിഞ്ഞതായും ഓജ അഭിപ്രായപ്പെട്ടു‌.


"പരിശീലകനെന്ന നിലയിൽ ഇതെനിക്ക് അഭിമാന നിമിഷമാണ്. കായിക രംഗത്ത് അത്ര ശക്തമല്ലാത്ത ബിഹാർ പോലൊരു സംസ്ഥാനത്തിന് ഇത് വലിയ പ്രകാശമാണ്. അവൻ നിരവധി ആളുകളെ പ്രചോദിപ്പിക്കും, ബിഹാറിനെ ഇന്ത്യയുടെ ക്രിക്കറ്റ് ഭൂപടത്തിൽ ഉൾപ്പെടുത്താൻ അവന് കഴിഞ്ഞു. ഇതുപോലെ കളി തുടർന്നാൽ ഒന്നു രണ്ട് വർഷത്തിനുള്ളിൽ അവൻ ഇന്ത്യയുടെ ടി20 ടീമിലെത്തുമെന്ന് എനിക്ക് തോന്നുന്നു."

വെടിക്കെട്ടിനായി ഒഴിവാക്കിയത് 'പിസയും മട്ടനും'; യുവിയുടെ അഗ്രഷനും ലാറയുടെ ധൈര്യവുമുള്ള പതിനാലുകാരൻ, വൈഭവിനെ കുറിച്ച് ഡയറ്റീഷ്യൻ
"ഞങ്ങൾ അവനെ പരിശീലിപ്പിച്ചിട്ടുണ്ട്. പക്ഷേ അവന് സ്വാഭാവികമായ കഴിവുകളുണ്ടായിരുന്നു. എല്ലാം പഠിക്കാനുള്ള ഒരു മനോഭാവം അവനുണ്ട്. എന്ത് പറഞ്ഞുകൊടുത്താലും അവൻ വളരെ വേഗത്തിൽ അത് പഠിച്ചെടുക്കും. തുടക്കം മുതൽക്കേ അവൻ ആക്രമണകാരിയായ കളിക്കാരനാണ്. ഷോട്ടുകൾ കളിക്കാൻ അവൻ വളരെയധികം ഇഷ്ടപ്പെടുന്നു.

" രണ്ട് വർഷം മുൻപ് അക്കാദമിയിൽ ഒരു പരിശീലന സെഷൻ ഉണ്ടായിരുന്നു. അന്ന് സിംഗിളുകളും ഡബിളുകളും എടുക്കാത്തത് എന്ത് കൊണ്ടാണെന്ന് ഞാൻ അവനോട് ചോദിച്ചു. എന്നാൽ സിക്സറുകൾ അടിക്കാൻ കഴിയുമെങ്കിൽ എനിക്ക് സിംഗിളുകളുടെ ആവശ്യമില്ലെന്നാണ് അവൻ പറഞ്ഞത്. കുട്ടിക്കാലം മുതൽക്കേ അവന്റെ മനസിൽ വ്യക്തത ഉണ്ടായിരുന്നു. എങ്ങനെ കളിക്കണം, മത്സരങ്ങളെ എങ്ങനെ സമീപിക്കണം എന്നതിനെക്കുറിച്ച് അവന് വ്യക്തമായ ഐഡിയ ഉണ്ടായിരുന്നു." പിടിഐയോട് സംസാരിക്കവെ താരത്തിന്റെ പരിശീലകൻ പറഞ്ഞു.

ആ നിർണായക മാറ്റം വന്നാൽ രാജസ്ഥാൻ റോയൽസ് ഡബിൾ സ്ട്രോങ്ങാകും; അടുത്ത കളിയിൽ അവസരം നൽകേണ്ടത് സ്റ്റാർ ബോളർക്ക്
അതേ സമയം ഐപിഎൽ ചരിത്രത്തിലെ തന്നെ എക്കാലത്തെയും മികച്ച ഇന്നിങ്സുകളിലൊന്നാണ് ഇന്നലെ സൂര്യവംശി കാഴ്ചവെച്ചത്. യശസ്വി ജയ്സ്വാളിന് ഒപ്പം രാജസ്ഥാൻ റോയൽസിന്റെ ഓപ്പണറായി ബാറ്റിങ്ങിന് എത്തിയ കൗമാര താരം 38 പന്തുകളിൽ ഏഴ് ഫോറുകളും 11 സിക്സറുകളുമടക്കം 101 റൺസാണ് നേടിയത്. 265.79 എന്ന കിടിലൻ സ്ട്രൈക്ക് റേറ്റിലായിരുന്നു താരത്തിന്റെ ഇന്നിങ്സ്. ഐപിഎൽ ചരിത്രത്തിലെ ഏറ്റവും പ്രായം കുറഞ്ഞ സെഞ്ചൂറിയനായും വൈഭവ് ഇന്നലെ മാറി.