വ്യാവസായിക വിപ്ലവം പേശികളെ ഇല്ലാതാക്കി, എഐ തലച്ചോറിനെയും; മുന്നറിയിപ്പുമായി രാം ഗോപാൽ വർമ്മ

ആർട്ടിഫിഷ്യൽ ഇന്റലിജൻസിന്റെ (AI) വളർച്ച മനുഷ്യന്റെ ബുദ്ധിക്കും സർഗാത്മകതയ്ക്കും ഭീഷണിയാകുമെന്ന് സംവിധായകൻ രാം ഗോപാൽ വർമ്മ. വ്യാവസായിക വിപ്ലവം മാനുവൽ ജോലികളെ ഇല്ലാതാക്കിയതുപോലെ, എഐ ചിന്തയെ അടിസ്ഥാനമാക്കിയുള്ള ജോലികളെയും ഇല്ലാതാക്കുമെന്നാണ് വർമ്മയുടെ മുന്നറിയിപ്പ്.

സോഷ്യൽ മീഡിയ പ്ലാറ്റ്‌ഫോമായ ‘എക്‌സി’ൽ പങ്കുവെച്ച ദീർഘ കുറിപ്പിലാണ് വർമ്മ തന്റെ നിലപാട് വ്യക്തമാക്കിയത്. എഐ ഉടൻ സ്വീകരിക്കാത്തവരുടെ ജോലികളായിരിക്കും ആദ്യം ഇല്ലാതാകുകയെന്ന് അദ്ദേഹം അഭിപ്രായപ്പെട്ടു.

സാങ്കേതികവിദ്യ എല്ലായ്പ്പോഴും മനുഷ്യരുടെ സൗകര്യത്തിനും ശാരീരിക അധ്വാനം കുറയ്ക്കുന്നതിനുമാണ് വികസിച്ചതെന്ന് വർമ്മ ചൂണ്ടിക്കാട്ടി. മനുഷ്യർക്ക് പ്രധാനമായും രണ്ട് കഴിവുകളാണുള്ളത്—പേശിശക്തിയും ചിന്തിക്കുന്ന തലച്ചോറും. വ്യാവസായിക വിപ്ലവം പേശിശക്തിയുടെ ആവശ്യം കുറച്ചെങ്കിൽ, ഇപ്പോൾ എഐ മനുഷ്യന്റെ ചിന്താശേഷിയെ തന്നെ മറികടക്കുന്ന ഘട്ടത്തിലേക്കാണ് നീങ്ങുന്നതെന്നും അദ്ദേഹം പറഞ്ഞു.

അതേസമയം, വർമ്മ നിലവിൽ നിരവധി സിനിമാ പ്രോജക്ടുകളുടെ തിരക്കിലാണ്. മനോജ് ബാജ്‌പേയിയും ജെനീലിയ ദേശ്മുഖും പ്രധാന കഥാപാത്രങ്ങളാകുന്ന ‘പോലീസ് സ്റ്റേഷൻ മേം ഭൂത്’ എന്ന ചിത്രം അദ്ദേഹം നിർമ്മിക്കുന്നുണ്ട്.

‘പോലീസ് കമ്പനി’ എന്ന മറ്റൊരു ചിത്രവും വർമ്മയുടെ സംവിധാനത്തിൽ ഒരുങ്ങുന്നുണ്ട്. ഹർഷവർദ്ധൻ റാണെയാണ് ചിത്രത്തിൽ പ്രധാന വേഷത്തിലെത്തുന്നത്. ‘ഡി കമ്പനിയേക്കാൾ അപകടകരമാണ്’ എന്നതാണ് ചിത്രത്തിന്റെ ടാഗ്‌ലൈൻ.

അധികാരവും അധികാരപരിധിയും വർധിക്കുമ്പോൾ ഒരു പോലീസ് സേന എങ്ങനെ ഒരു കമ്പനിയായി മാറുന്നു എന്നതാണ് ചിത്രത്തിന്റെ പ്രമേയമെന്ന് വർമ്മ നേരത്തെ വ്യക്തമാക്കിയിരുന്നു. ദാവൂദ് ഇബ്രാഹിമും ഛോട്ടാ രാജനും തമ്മിലുള്ള അഭിപ്രായവ്യത്യാസങ്ങൾക്ക് പിന്നാലെ മുംബൈ അധോലോകത്തിൽ രൂപപ്പെടുന്ന ശൂന്യതയുടെ പശ്ചാത്തലത്തിലാണ് കഥയെന്നും അദ്ദേഹം പറഞ്ഞിരുന്നു. ദയാ നായക് എന്ന കഥാപാത്രത്തിൽനിന്ന് പ്രചോദനം ഉൾക്കൊണ്ടാണ് ഹർഷവർദ്ധൻ റാണെ ചിത്രത്തിലെ കഥാപാത്രത്തെ അവതരിപ്പിക്കുന്നതെന്നാണ് റിപ്പോർട്ടുകൾ.