ശരീരത്തിൽ മുറിപ്പാടുകൾ, സൈനിക കാമ്പിൽ വച്ച് പരിക്കേറ്റോ; ലൈവിൽ സു​ഗയെ കണ്ട ആരാധകരുടെ ആശങ്ക

Authored by: അശ്വിനി പി|Samayam Malayalam•3 Jul 2025, 6:49 pm

ബി ടി എസ് താരങ്ങൾ ഏഴ് പേരും ഒന്നിച്ചെത്തുന്ന അടുത്ത പെർഫോമൻസിനും ആൽബത്തിനും വേണ്ടി 2026 മാർച്ച വരെ കാത്തിരിക്കണം എന്നാണ് നിലവിലെ ഔദ്യോഗിക വിവരം. അതിനിടയിൽ സോഷ്യൽ മീഡിയയിലും മറ്റ് പൊതു ചടങ്ങുകളിലുമെല്ലാം ഒരുമച്ചല്ലെങ്കിലും ഏഴ് പേരും എത്തുന്നതും അവരുടെ വിശേഷങ്ങൾ അറിയുന്നതും ആരാധകർക്ക് വളരെ ത്രില്ലിങ് ആയിട്ടുള്ള കാര്യം തന്നെയാണ്. പക്ഷേ ഏറ്റവുമൊടുവിൽ പുറത്തുവന്ന വീഡിയോയുടെ പേരിൽ സുഗ ആർമിയ്ക്ക് ചെറിയ നിരാശയുണ്ട്.

കഴിഞ്ഞദിവസം ഫാൻ കമ്മ്യൂണിറ്റി പ്ലാറ്റ്‌ഫോമായ വെവേഴ്‌സിൽ (Weverse) നടന്ന ലൈവ് വീഡിയോയ്ക്ക് ശേഷം സുഗയ്ക്ക് എന്താണ് സംഭവിച്ചത് എന്ന ആശങ്കയിലാണ് ആരാധകർ. ഏകദേശം മൂന്ന് വർഷത്തിന് ശേഷമാണ് സുഗ ആദ്യമായി ലൈവിൽ എത്തി ആരാധകർ കാണുന്നത്. സുഗ തന്റെ കൈകൾ മറക്കാൻ ശ്രമിക്കുന്നതും, ദേഹത്ത് കണ്ട മുറിപ്പാടുകളും കാരണം സൈനിക കാമ്പിൽ നിന്ന് പരിക്കേറ്റോ എന്നാണ് ആരാധകർക്ക് സംശയം.

Also Read: കരഞ്ഞു തീർക്കാൻ പറ്റുന്നത് ഒറ്റയ്ക്ക് കരഞ്ഞ് തന്നെ തീർക്കും, കൂടെ ആരും ഇല്ല എന്ന തിരിച്ചറിവാണ് ശക്തി; സോഷ്യൽ മീഡിയയിൽ കാണുന്നതല്ല ജീവിതം എന്ന് മഹീന

സുഗയ്ക്ക് നേരത്തെ ഒരു തോളെല്ലിന് പരിക്ക് പറ്റിയിരുന്നു. അതുകൊണ്ടാണ് താരം സജീവ സൈനിക സേവനത്തിന് പകരം ഒരു സോഷ്യൽ സർവീസ് ഏജന്റായി ബദൽ സൈനിക സേവനം നടത്തിയത്. മറ്റ് ബിടിഎസ് അംഗങ്ങൾ 18 മാസം സൈനിക സേവനം ചെയ്തപ്പോൾ, സുഗ തന്റെ ആരോഗ്യപ്രശ്നം കാരണം 21 മാസമാണ് ബദൽ സേവനം ചെയ്തത്. 2025 ജൂൺ 21-നാണ് സുഗയുടെ സൈനിക സേവനം പൂർത്തിയാക്കി പുറത്തിറങ്ങിയത്. തോളെല്ലിലെ ശസ്ത്രക്രിയയുമായി ബന്ധപ്പെട്ട മുറിപ്പാടാണോ ഇത് എന്ന സംശയവും ചിലർക്കുണ്ട്.

വെവേഴ്‌സിൽ (Weverse) നടന്ന തത്സമയ വീഡിയോയിൽ, 2026 പുറത്തിറങ്ങാനിരിക്കുന്ന പുതിയ ആൽബത്തെക്കുറിച്ചും മറ്റ് കാര്യങ്ങളെക്കുറിച്ചും ബിടിഎസ് അംഗങ്ങൾ സംസാരിച്ചു. ആരാധകർക്ക് ഏറെ സന്തോഷം നൽകുന്ന വാർത്തയെ കുറിച്ച് നേതാവായ ആർഎം (RM) സംസാരിക്കുകയായിരുന്നു. കാത്തിരിക്കൂ, എന്ന് ആർഎം പറഞ്ഞപ്പോൾ മറ്റ് അംഗങ്ങൾ കൈകൾ മുന്നോട്ട് നീട്ടി ഉള്ളംകൈ കാണിച്ചു.


മറ്റ് ആറുപേരും ഒരേ സമയം "കാത്തിരിക്കൂ" എന്ന ആക്ഷൻ കാണിച്ചപ്പോൾ, സുഗ മാത്രം അതിൽ നിന്ന് വിട്ടുനിന്നു. ഇത് ആദ്യം സാധാരണമായി തോന്നിയെങ്കിലും, പിന്നീട് ലൈവ് സ്ട്രീമിന്റെ ഓരോ ചെറിയ കാര്യങ്ങളും ആരാധകർ ഇഴകീറി പരിശോധിച്ചപ്പോൾ, സുഗയുടെ കൈപ്പത്തിയിൽ ഒരു മുറിവ് കണ്ടെത്തുകയായിരുന്നു. എന്നാൽ, ഈ വിഷയത്തിൽ സുഗയോ അദ്ദേഹത്തിന്റെ ഏജൻസിയോ ഇതുവരെ പ്രതികരിച്ചിട്ടില്ല.