ശ്രേയസ് അയ്യരെ പേടിപ്പിച്ച് ഇക്കാര്യം; ഐപിഎൽ ഫൈനലിന് മുൻപ് പഞ്ചാബ് കിങ്സിന് മുന്നിലെ ആശങ്കകൾ ഇങ്ങനെ

Curated by: ഗോകുൽ എസ്|Samayam Malayalam•3 Jun 2025, 7:18 pm

2025 സീസൺ ഇന്ത്യൻ പ്രീമിയർ ലീഗിന്റെ ഫൈനലിൽ ഇന്ന് റോയൽ ചലഞ്ചേഴ്സ് ബംഗളൂരുവും പഞ്ചാബ് കിങ്സും തമ്മിൽ ഏറ്റുമുട്ടുകയാണ്. ഇരു ടീമുകളും അവരുടെ ആദ്യ കിരീടം ലക്ഷ്യം വെച്ചാണ് ഫൈനൽ മത്സരത്തിന് ഇറങ്ങുന്നത്. ആദ്യ ക്വാളിഫയർ ജയിച്ചാണ് ആർസിബി ഫൈനലിലേക്ക് മാർച്ച് ചെയ്തതെങ്കിൽ ആവേശകരമായ രണ്ടാം ക്വാളിഫയറിൽ മുംബൈ ഇന്ത്യൻസിനെ വീഴ്ത്തിയാണ് പഞ്ചാബ് കിങ്സിന്റെ ഫൈനൽ പ്രവേശം. ഫൈനൽ മത്സരത്തിന് ഇനി മണിക്കൂറുകൾ മാത്രം ബാക്കി നിൽക്കെ പഞ്ചാബ് കിങ്സിന് ആശങ്ക‌ സമ്മാനിക്കുന്ന മൂന്ന് കാര്യങ്ങൾ നോക്കാം. യുസ്വേന്ദ്ര ചഹലിന്റെ ഫിറ്റ്നസാണ് ഫൈനലിന് മുൻപ് പഞ്ചാബ് കിങ്സിന് ഏറ്റവും വലിയ ആശങ്ക നൽകുന്നത്. പരിക്കിനെ തുടർന്ന് ഇക്കുറി ചില മത്സരങ്ങൾ ചഹലിന് നഷ്ടമായിരുന്നു. ചഹലിന് ഈ മത്സരത്തിൽ കളിക്കാനായില്ലെങ്കിൽ പഞ്ചാബിന്റെ ബൗളിങ് അല്പം ദുർബലമാകും.


ക്യാപ്റ്റൻ ശ്രേയസ് അയ്യരുടെ ഹീറോയിസമായിരുന്നു രണ്ടാം ക്വാളിഫയറിൽ പഞ്ചാബ് കിങ്സിനെ ത്രില്ലിങ് വിജയത്തിലേക്ക് എത്തിച്ചത്. 2025 സീസൺ ഐപിഎല്ലിൽ ഉജ്ജ്വല ഫോമിലുള്ള ശ്രേയസ് അയ്യർ, 16 കളികളിൽ നിന്ന് 603 റൺസ് നേടിക്കഴിഞ്ഞു. ഫൈനലിലും ശ്രേയസിന്റെ പ്രകടനം പഞ്ചാബിന് നിർണായകമാകും.

Also Read: ഐപിഎൽ 2025 ഫൈനൽ പോരാട്ടം; ആർസിബിയുടെ സൂപ്പർ താരം തിരിച്ചെത്തി

അതേ സമയം ആർസിബിയുടെ പ്രധാന പേസറായ ജോഷ് ഹേസൽവുഡിന് എതിരെ ശ്രേയസ് അയ്യർക്കുള്ള മോശം റെക്കോഡ് പഞ്ചാബിനെ ആശങ്കപ്പെടുത്തുന്നുണ്ട്. നേർക്കുനേർ വന്ന ആറ് മത്സരങ്ങളിൽ നാലിലും ശ്രേയസ് അയ്യരെ പുറത്താക്കിയിട്ടുള്ള താരമാണ് ജോഷ് ഹേസൽവുഡ്. ഈ കളികളിൽ ഹേസൽ വുഡിന് എതിരെ 11 റൺസ് മാത്രമാണ് അയ്യർക്ക്‌ നേടാനായത് എന്നതും ശ്രദ്ധേയം.

Also Read: ഐപിഎൽ 2025 ഫൈനൽ മത്സരത്തിൽ ടോസ് നേടുക നിർണായകം

കഴിഞ്ഞ മത്സരങ്ങളിലെ അർഷ്ദീപ് സിങ്ങിന്റെ മോശം ഫോമും ഫൈനലിന് ഇറങ്ങുമ്പോൾ പഞ്ചാബ് കിങ്സിനെ ആശങ്കപ്പെടുത്തുന്നതാണ്. അവസാന അഞ്ച് മത്സരങ്ങളിൽ രണ്ട് വിക്കറ്റുകൾ മാത്രമാണ് ഈ ഇടം കൈയ്യൻ പേസർ നേടിയത്. ഇടവേളക്ക് ശേഷം ഐപിഎൽ പുനരാരംഭിച്ചു കഴിഞ്ഞ് മികവിലേക്ക് ഉയരാൻ അർഷ്ദീപിന് കഴിഞ്ഞിട്ടില്ല. ഫൈനലിൽ ഫോമിലേക്ക് തിരിച്ചെത്താൻ അർഷ്ദീപിന് സാധിച്ചില്ലെങ്കിൽ പഞ്ചാബ് കിങ്സ് വിയർക്കും.