ശ്രേയസ് അയ്യർ ക്യാപ്റ്റൻ, ഗിൽ ഇല്ല, കോഹ്ലി ടീമിൽ; ഐപിഎൽ 2025 ലെ ടീം ഓഫ് ദി ടൂർണമെന്റ്

Curated by: ഗോകുൽ എസ്|Samayam Malayalam•4 Jun 2025, 2:57 pm

റോയൽ ചലഞ്ചേഴ്സ് ബംഗളൂരുവിന്റെ കിരീട നേട്ടത്തോടെ 2025 സീസൺ ഇന്ത്യൻ പ്രീമിയർ ലീഗിന് തിരശീല വീണിരിക്കുകയാണ്. ചൊവ്വാഴ്ച നടന്ന ആവേശകരമായ ഫൈനലിൽ ശ്രേയസ് അയ്യർ നയിച്ച പഞ്ചാബ് കിങ്സിനെ വീഴ്ത്തിയായിരുന്നു ആർസിബി കന്നി കിരീടത്തിൽ മുത്തമിട്ടത്. ഐപിഎൽ സീസൺ അവസാനിച്ച പശ്ചാത്തലത്തിൽ ഇക്കുറി മികച്ച പ്രകടനം കാഴ്ച വെച്ച താരങ്ങളെ അണിനിരത്തിക്കൊണ്ട് സീസണിന്റെ മികച്ച ടീമിനെ തെരഞ്ഞെടുത്താൽ എങ്ങനെയിരിക്കുമെന്ന് നോക്കാം.2025 സീസൺ ഐപിഎല്ലിലെ ഓറഞ്ച് ക്യാപ്പ് ജേതാവായ സായ് സുദർശന് ടീം ഓഫ് ദി ടൂർണമെന്റിലും സ്ഥാനം ഉറപ്പാണ്. ഗുജറാത്ത് ടൈറ്റൻസിന്റെ വിശ്വസ്ത ബാറ്ററായ സായ്, 15 ഇന്നിങ്സുകളിൽ നിന്ന് 759 റ‌ൺസാണ് ഇക്കുറി സ്കോർ ചെയ്തത്. ഒരു സെഞ്ചുറിയും ആറ് അർധസെ‌ഞ്ചുറികളും താരത്തിന്റെ ബാറ്റിൽ നിന്ന് പിറന്നു. വിരാട് കോഹ്ലിയാണ് ഈ ടീമിന്റെ മറ്റൊരു ഓപ്പണർ. ആർസിബിയുടെ കിരീട നേട്ടത്തിൽ നിർണായക പങ്ക് വഹിച്ച കോഹ്ലി, 657 റൺസാണ് ഇക്കുറി സ്കോർ ചെയ്തത്. എട്ട് അർധസെഞ്ചുറികളും കോഹ്ലിയുടെ ബാറ്റിൽ നിന്ന് പിറന്നു.


നിക്കോളാസ് പുറാനാണ് മൂന്നാം നമ്പരിൽ. വെടിക്കെട്ട് ബാറ്റിങ്ങിന്റെ ആശാനായ പുറാൻ, ഈ സീസണിൽ 14 ഇന്നിങ്സുകളിൽ നിന്ന് 524 റൺസാണ് നേടിയത്. അഞ്ച് അർധസെഞ്ചുറികളും ലക്നൗ സൂപ്പർ ജയന്റ്സിനായി കളിക്കുന്ന വിൻഡീസ് താരം നേടി. സൂര്യകുമാർ യാദവാ‌ണ് ടീമിൽ സ്ഥാനം ഉറപ്പുള്ള മറ്റൊരു ബാറ്റർ.‌ സ്കൈയുടെ ഏറ്റവും മികച്ച ഐപിഎൽ സീസൺ കൂടിയായിരുന്നു ഇത്തവണത്തേത്. 15 കളികളിൽ നിന്ന് 717 റൺസാണ് സൂര്യകുമാർ യാദവ് ഇക്കുറി നേടിയത്. 15 ഇന്നിങ്സുകളിലും 15 റൺസിന് മുകളിൽ ഈ മുംബൈ താരം സ്കോർ ചെയ്തു എന്നത് ഏറെ ശ്രദ്ധേയം.

ഐപിഎല്‍ 2025 കിരീടം ആര്‍സിബിക്ക്; 18 വര്‍ഷത്തെ ചരിത്രത്തില്‍ ആദ്യം, പഞ്ചാബിനെ ആറ് റണ്‍സിന് വീഴ്ത്തി
പഞ്ചാബ് കിങ്സിനെ ഐപിഎൽ ഫൈനലിൽ എത്തിച്ച ശ്രേയസ് അയ്യരാ‌ണ് ടീം ഓഫ് ദി ടൂർണമെന്റിന്റെയും ക്യാപ്റ്റൻ. പഞ്ചാബിനെ എല്ലാ രീതിയിലും മുന്നിൽ നിന്ന് നയിച്ച ശ്രേയസ് 17 കളികളിൽ 604 റൺസാണ് നേടിയത്. വിക്കറ്റ് കീപ്പർ ബാറ്റർ കെ എൽ രാഹുലിനും ടീമിൽ സ്ഥാനം നൽകാം. 13 കളികളിൽ 539 റ‌ൺസായിരുന്നു ഈ സീസണിൽ രാഹുലിന്റെ സമ്പാദ്യം. ഐപിഎൽ ഫൈനലിൽ പഞ്ചാബ് കിങ്സിന് വേണ്ടി 30 പന്തിൽ 61 റൺസ് നേടിയ ശശാങ്ക് സിങ്ങാണ് ടീമിന്റെ പ്രധാന ഫിനിഷർ. വെടിക്കെട്ട് ബാറ്റിങ്ങിന് പേരുകേട്ട ശശാങ്ക്, 14 ഇന്നിങ്സുകളിൽ മറന്ന് 328 റൺസാണ് ഇക്കുറി നേടിയത്.

മുംബൈ ഇന്ത്യൻസിന്റെ ജസ്പ്രിത് ബുംറയാണ് പേസ് നിരയെ നയിക്കുന്നത്. മുംബൈ ഇന്ത്യൻസിന്റെ പ്ലേ ഓഫ് പ്രവേശനത്തിൽ നിർണായക പങ്ക് വഹിച്ച ബുംറ, 12 കളികളിൽ 18 വിക്കറ്റുകളാണ് ഇത്തവണ നേടിയത്‌. 6.67 ആണ് എക്കോണമി. ഗുജറാത്ത് ടൈറ്റൻസിന്റെ പ്രസിദ് കൃഷ്ണയാണ് ടീമിലെ മറ്റൊരു പേസർ. 25 വിക്കറ്റുകളുമായി ഈ സീസണിലെ പർപ്പിൾ ക്യാപ്പ് ജേതാവാണ് പ്രസിദ്.

ഐപിഎൽ ഫൈനലിൽ വഴിത്തിരിവായത് ഇക്കാര്യം, പഞ്ചാബിനെ തോൽപ്പിച്ചത് ആ താരം; ആർസിബി നന്ദി പറയേണ്ടത് കൃണാലിന്
ആർസിബിയുടെ ഓസ്ട്രേലിയൻ പേസർ ജോഷ് ഹേസൽവുഡിനെയും ഈ ടീമിൽ ഉൾപ്പെടുത്തിയിട്ടു‌ണ്ട്. 12 കളികളിൽ 22 വിക്കറ്റാണ് ഇക്കുറി ജോഷ് ഹേസൽവുഡ് നേടിയത്. ആർസിബിയുടെ കിരീട നേട്ടത്തിൽ സുപ്രധാന പങ്കായിരുന്നു ഹേസൽവുഡ് വഹിച്ചത്. ചെന്നൈ സൂപ്പർ കിങ്സ് താരം നൂർ അഹമ്മദാണ് ടീം ഓഫ് ദി ടൂർണമെന്റിലെ സ്പെഷ്യലിസ്റ്റ് സ്പിന്നർ. 24 വിക്കറ്റുകളാണ് ഈ അഫ്ഗാൻ സ്പിന്നർ ഇക്കുറി നേടിയത്.