'ഷോർട്ട്‌കട്ടുകളുടെ കാലത്ത് മാതൃത്വം തിരഞ്ഞെടുത്തു'; കത്രീനയ്ക്ക് ദിയ കൃഷ്ണയുടെ പിന്തുണ, ചർച്ചയായി താരത്തിന്റെ പോസ്റ്റ്പാർട്ടം ലുക്ക്

ഗണപതി ആഘോഷത്തിന്റെ നിറപ്പകിട്ടിൽ തിളങ്ങി നിൽക്കുന്ന താരങ്ങൾക്കിടയിൽ കത്രീന കൈഫിന്റെ സാന്നിധ്യവും വളരെ ശ്രദ്ധ നേടി. ഭർത്താവ് വിക്കി കൗശലിനൊപ്പമാണ് മുംബൈയിലെ അംബാനി വസതിയിൽ നടന്ന ഗണേശ ചതുർത്ഥി ആഘോഷത്തിൽ കത്രീന എത്തിയത്. പിസ്റ്റാഷിയോ-ഗ്രീൻ നിറത്തിലുള്ള അനാർക്കലി വേഷത്തിൽ അതീവ മനോഹരിയായാണ് താരം പ്രത്യക്ഷപ്പെട്ടത്. എന്നാൽ വസ്ത്രത്തിന്റെയും ആഘോഷത്തിന്റെയും ഭംഗിയെക്കാൾ സോഷ്യൽ മീഡിയയിൽ ചർച്ചയായത് കത്രീനയുടെ ശരീരമായിരുന്നു.

2025 നവംബറിൽ മകൻ വിഹാന്റെ ജനനത്തിന് ശേഷം കത്രീന പൊതുവേദികളിൽ നിന്ന് ഏറെ അകന്നു നിന്നിരുന്നു. അതുകൊണ്ടുതന്നെ ഗണപതി ആഘോഷത്തിലെ ഈ പ്രത്യക്ഷപ്പെടലിന് വലിയ ശ്രദ്ധ ലഭിച്ചു. എന്നാൽ പതിവുപോലെ, ഒരു സ്ത്രീയുടെ കഴിവുകളെയും വ്യക്തിത്വത്തെയുംക്കാൾ ശരീരത്തിന്റെ വലുപ്പവും രൂപവും വിലയിരുത്തുന്ന കമന്റുകളാണ് പലരുടെയും ഭാഗത്തുനിന്നും ഉണ്ടായത്. ചിലർ കത്രീനയുടെ പഴയ ചിത്രങ്ങളുമായി ഇപ്പോഴത്തെ രൂപത്തെ താരതമ്യം ചെയ്തപ്പോൾ, മറ്റുചിലർ മറ്റ് നടിമാരെ ഉദാഹരണമായി ചൂണ്ടിക്കാട്ടുകയും ചെയ്തു.

ഒരിക്കല്‍ കൂടെ അഹാന അത് തെളിയിച്ചു എന്ന് അശ്വിന്‍; സ്വപ്‌നം കണ്ട ദിവസം, പ്ലാനിങ് സമ്മതിക്കണം!
ഗർഭധാരണവും പ്രസവവും ഒരു സ്ത്രീയുടെ ശരീരത്തിലും ജീവിതത്തിലും വലിയ മാറ്റങ്ങൾ കൊണ്ടുവരുന്ന സ്വാഭാവിക ഘട്ടങ്ങളാണ്. പ്രസവത്തിന് പിന്നാലെ ഉടൻ തന്നെ പഴയ ശരീരത്തിലേക്ക് ‘തിരിച്ചെത്തണം’ എന്ന സമൂഹത്തിന്റെ പ്രതീക്ഷ പുതിയ അമ്മമാർക്ക് മറ്റൊരു സമ്മർദ്ദമായി മാറുന്നു. ഉറക്കക്കുറവ്, കുഞ്ഞിന്റെ പരിചരണം, മുലയൂട്ടൽ, ഹോർമോൺ മാറ്റങ്ങൾ, സ്വന്തം ആരോഗ്യത്തിനും വിശ്രമത്തിനും സമയം കണ്ടെത്താനാകാത്ത അവസ്ഥ. മാതൃത്വത്തിന്റെ യാഥാർഥ്യം എന്നത് ഒരു ഫോട്ടോയിലെ ‘പെർഫെക്റ്റ് ലുക്ക്’ കൊണ്ട് അളക്കാനാവില്ല.

കത്രീനയെ പിന്തുണച്ച് നിരവധി ആരാധകരും സോഷ്യൽ മീഡിയ ഉപയോക്താക്കളും രംഗത്തെത്തി. പ്രസവശേഷമുള്ള ശരീരമാറ്റങ്ങളെ പരിഹസിക്കുന്നതിനു പകരം ഒരു സ്ത്രീ കടന്നുപോകുന്ന ജീവിതഘട്ടത്തെ ബഹുമാനിക്കണമെന്നായിരുന്നു അവരുടെ പ്രതികരണം.

കേരളത്തിലും ഈ വിഷയത്തിന് ശ്രദ്ധേയമായ പ്രതികരണങ്ങൾ ലഭിച്ചു. ഇൻഫ്ലുവൻസർ ദിയ കൃഷ്ണ കത്രീനയുടെ ചിത്രം പങ്കുവെച്ച്, “ഇൻ ദി ഏജ് ഓഫ് ഷോർട്ട്‌കട്ട്സ്, ചൂസിങ് മദർഹുഡ് ടേക്സ് കറേജ്” എന്ന സന്ദേശത്തിലൂടെ മാതൃത്വത്തെ പിന്തുണച്ചു. സ്വന്തം പ്രസവശേഷം ശരീരത്തെക്കുറിച്ച് നേരിട്ട വിമർശനങ്ങളും താരതമ്യങ്ങളും ദിയക്കും പരിചിതമാണ്. സഹോദരിമാരുടെ ശരീരവുമായി പോലും തന്നെ താരതമ്യം ചെയ്തിരുന്നുവെന്ന തരത്തിലുള്ള സോഷ്യൽ മീഡിയ ചർച്ചകൾക്കിടയിലും ദിയ തന്റെ അനുഭവങ്ങളെ തുറന്നുപറഞ്ഞിരുന്നു.

കത്രീനയുടെ കാര്യത്തിൽ മാത്രം ഒതുങ്ങുന്നതല്ല ഈ പ്രശ്നം. ഐശ്വര്യ റായ് ഉൾപ്പെടെയുള്ള മുതിർന്ന താരങ്ങളെ പോലും പ്രായം, ശരീരഭാരം, മുഖഭാവം തുടങ്ങിയവയുടെ പേരിൽ നിരന്തരം താരതമ്യം ചെയ്യുന്നത് ഇതേ മനോഭാവത്തിന്റെ ഭാഗമാണ്. സ്ത്രീകൾ എപ്പോഴും ‘സുന്ദരി’, ‘മെലിഞ്ഞ’, ‘യുവതി’ എന്നീ നിർവചനങ്ങളിൽ ഒതുങ്ങണമെന്ന പ്രതീക്ഷ ഇന്നും ശക്തമാണ്.

‘ശാലീനസുന്ദരി’ എന്ന ടാഗ് ലഭിക്കണമെന്ന ആഗ്രഹത്തിൽ സ്ത്രീകളുടെ സ്വാഭാവിക ശരീരമാറ്റങ്ങളെ പോലും കുറവായി കാണുന്ന സംസ്കാരം മാറേണ്ട സമയമാണിത്. ശാരീരിക ആരോഗ്യം പ്രധാനമാണ്. എന്നാൽ അതിനൊപ്പം മാനസികാരോഗ്യവും അത്രതന്നെ പ്രധാനമാണ്.

ഒരു നടി സിനിമയിലെ കഥാപാത്രമല്ല. അവൾക്കും പ്രായമാകും, ശരീരം മാറും, അമ്മയാകും, ക്ഷീണിക്കും, സന്തോഷിക്കും. ക്യാമറയ്ക്ക് മുന്നിൽ കാണുന്ന ഓരോ സ്ത്രീക്കും ക്യാമറയ്ക്ക് പുറത്തൊരു ജീവിതമുണ്ട്.

അതുകൊണ്ട് കത്രീനയുടെ ഗണപതി ആഘോഷത്തിലെ ചിത്രങ്ങൾ കാണുമ്പോൾ ചോദിക്കേണ്ടത് ‘അവൾക്ക് എന്താണ് സംഭവിച്ചത്?’ എന്നല്ല. ‘അവൾ സന്തോഷവതിയായിരിക്കുന്നുണ്ടോ?' എന്നായിരിക്കണം എന്ന് ഒരു കൂട്ടം ആരാധകർ പറയുന്നു. കാരണം ഒരു അമ്മയുടെ ശരീരം സമൂഹത്തിന്റെ സൗന്ദര്യ മാനദണ്ഡം പാലിക്കാനുള്ള വസ്തുവല്ല. അത് ഒരു ജീവിതം സൃഷ്ടിച്ച ശരീരമാണ്. അതിനെ വിലയിരുത്തുന്നതിന് മുമ്പ് അതിനോട് ബഹുമാനം പുലർത്തേണ്ടത് അത്യാവശ്യമാണ്.