സഞ്ജു സാംസണിന് കീപ്പര്‍ ഗൗസ് അണിയാന്‍ സിഒഇ അനുമതി; രാജസ്ഥാന്‍ റോയല്‍സിന്റെ ക്യാപ്റ്റന്‍സി വീണ്ടും ഏറ്റെടുക്കും

Authored byനിഷാദ് അമീന്‍ | Samayam Malayalam | Updated: 2 Apr 2025, 7:19 pm

Samayam Malayalamസഞ്ജു സാംസണ്‍

ഇന്ത്യന്‍ ടി20 വിക്കറ്റ് കീപ്പറും ഓപണറുമായ സഞ്ജു സാംസണിന് (Sanju Samson) ഫിറ്റ്‌നസ് ക്ലിയറന്‍സ്. ഇന്ത്യന്‍ ക്രിക്കറ്റ് കണ്‍ട്രോള്‍ ബോര്‍ഡിന്റെ ബെംഗളൂരുവിലെ സെന്റര്‍ ഓഫ് എക്‌സലന്‍സ് (CoE) മെഡിക്കല്‍ ടീമാണ് (മുമ്പ് നാഷനല്‍ ക്രിക്കറ്റ് അക്കാദമി) അനുമതി നല്‍കിയത്. ഇതോടെ ഐപിഎല്‍ 2025ല്‍ വിക്കറ്റ് കീപ്പര്‍, ഫീല്‍ഡിങ് എന്നിവ ചെയ്യുന്നതിനുള്ള തടസ്സം നീങ്ങി.രാജസ്ഥാന്‍ റോയല്‍സിന്റെ (Rajasthan Royals) അടുത്ത മല്‍സരത്തില്‍ സഞ്ജു വിക്കറ്റ് കീപ്പര്‍, ടീം ക്യാപ്റ്റന്‍ ചുമതലകള്‍ ഏറ്റെടുക്കും. ചൂണ്ടുവിരലിന് ഒടിവുണ്ടായതോടെ ശസ്ത്രക്രിയക്ക് വിധേയനായി നാലാഴ്ച കഴിഞ്ഞാണ് ഐപിഎല്ലിന് എത്തിയതെങ്കിലും സഞ്ജുവിന് ബാറ്റ് ചെയ്യാന്‍ മാത്രമാണ് അനുമതി ഉണ്ടായിരുന്നത്. ഇതോടെ സഞ്ജു ഇംപാക്റ്റ് സബ് ആയി ഓപണറുടെ റോളില്‍ എത്തുകയായിരുന്നു.

രാജസ്ഥാന്‍ റോയല്‍സിന്റെ ആദ്യ മൂന്ന് മല്‍സരങ്ങളില്‍ സഞ്ജു വിക്കറ്റ് കീപ്പറാവുകയോ രാജസ്ഥാന്‍ റോയല്‍സിന്റെ ക്യാപ്റ്റന്‍സി ഏറ്റെടുക്കുകയോ ചെയ്തിരുന്നില്ല. ടീമിന്റെ ബൗളിങ് സമയത്ത് ഫീല്‍ഡില്‍ ഇറങ്ങാന്‍ സാധിക്കാത്തതിനാല്‍ ക്യാപ്റ്റന്‍ സ്ഥാനം താല്‍ക്കാലികമായി ഓള്‍റൗണ്ടര്‍ റിയാന്‍ പരാഗിനെ ഏല്‍പ്പിക്കുകയായിരുന്നു. ധ്രുവ് ജുറെല്‍ ആയിരുന്നു വിക്കറ്റ് കീപ്പര്‍.

സഞ്ജുവിന്റെ ഫിറ്റ്‌നസ് ക്ലിയറന്‍സ് രാജസ്ഥാന്‍ റോയല്‍സിന് വലിയ ഉത്തേജനം നല്‍കും. മെഡിക്കല്‍ ടീമില്‍ നിന്ന് അനുമതി തേടാന്‍ സഞ്ജു ഈ ആഴ്ച ആദ്യം ഗുവാഹത്തിയില്‍ നിന്ന് ബെംഗളൂരുവിലേക്ക് പോയിരുന്നു. സെന്റര്‍ ഓഫ് എക്‌സലന്‍സില്‍ നടന്ന അവസാന ഫിറ്റ്‌നസ് പരിശോധനകളില്‍ സഞ്ജു വിജയിച്ചതായി ബിസിസിഐ വൃത്തങ്ങളെ ഉദ്ധരിച്ച് ടൈംസ് ഓഫ് ഇന്ത്യ റിപോര്‍ട്ട് ചെയ്തു.

രാജസ്ഥാന്‍ റോയല്‍സിന്റെ അടുത്ത മല്‍സരം ഏപ്രില്‍ അഞ്ചിന് പഞ്ചാബ് കിങ്‌സിനെതിരെ (IPL 2025 RR vs PBKS) മുള്ളന്‍പൂരില്‍ ആണ്. കളിച്ച രണ്ട് മാച്ചുകളും വിജയിച്ച് പോയിന്റ് പട്ടികയില്‍ രണ്ടാം സ്ഥാനത്തുള്ള പഞ്ചാബ് കിങ്‌സ് മികച്ച ഫോമിലാണ്. റോയല്‍സിന് മൂന്ന് മല്‍സരങ്ങളില്‍ ഒരു വിജയമാണുള്ളത്.

ആദ്യ മൂന്ന് മാച്ചുകളിലും ക്യാപ്റ്റനായ റിയാന്‍ പരാഗിന്റെ വ്യക്തിഗത പ്രകടനവും മികച്ചതായിരുന്നില്ല. 23കാരന്‍ ആദ്യമായാണ് റോയല്‍സിന്റെ ക്യാപ്റ്റനാവുന്നത്. ആദ്യ രണ്ട് മാച്ചുകളും തോറ്റു. അസമില്‍ നിന്ന് ഇന്ത്യന്‍ ക്രിക്കറ്റ് ടീമിലെത്തിയ ആദ്യ പുരുഷ താരമാണ് പരാഗ്.

സഞ്ജു ആദ്യ മാച്ചില്‍ സണ്‍റൈസേഴ്‌സ് ഹൈദരാബാദിനെതിരെ 66 റണ്‍സ് നേടിയിരുന്നു. കെകെആറിനെതിരെ സഞ്ജു 13 റണ്‍സും ചെന്നൈ സൂപ്പര്‍ കിങ്‌സിനെതിരെ 20 റണ്‍സുമാണ് നേടിയിരുന്നത്.