സഞ്ജു സാംസണിന്റെ ബാറ്റിങ് പൊസിഷനിൽ നിർണായക മാറ്റം വരും? അടുത്ത കളിയിൽ തിരിച്ചെത്തുമ്പോൾ പുതിയ റോളിൽ കണ്ടേക്കാം

Curated byഗോകുൽ എസ് | Samayam Malayalam | Updated: 7 May 2025, 6:09 pm

2025 സീസൺ ഐപിഎല്ലിൽ പരിക്ക് കനത്ത തിരിച്ചടി നൽകിയ താരമാണ് രാജസ്ഥാൻ റോയൽസ് നായകൻ സഞ്ജു സാംസൺ‌. ഫിറ്റ്നസ് പ്രശ്നങ്ങളെ തുടർന്ന് സീസണിലെ ആദ്യ മൂന്ന് കളികളിലും സ്പെഷ്യലിസ്റ്റ് ബാറ്റർ മാത്രമായി കളിച്ച സഞ്ജുവിന് ഡെൽഹി ക്യാപിറ്റൽസിന് എതിരായ കളിക്കിടെ വീണ്ടും പരിക്ക് പറ്റി. ഈ കളിയിൽ ബാറ്റ് ചെയ്യുന്നതിനിടെ പരിക്കിന്റെ പിടിയിലായ സഞ്ജുവിന് റിട്ടയേഡ് ഹർട്ടാവേണ്ടി വരുകയായിരുന്നു. ഇതിന് ശേഷം ഇതുവരെ റോയൽസിനായി ഒരു മത്സരം പോലും കളിക്കാൻ താരത്തിനായില്ല‌. ഇത് റോയൽസിന്റെ പ്രകടനങ്ങളെയും ബാധിച്ചു‌‌. പരിക്ക് മൂലം കഴിഞ്ഞ അഞ്ച് കളികളും താരത്തിന് നഷ്ടമായി‌. ഈ മാസം 12 ന് ചെന്നൈ സൂപ്പർ കിങ്സിന് എതിരെയാണ് രാജസ്ഥാൻ റോയൽസിന്റെ അടുത്ത മത്സരം. ഈ സമയത്തേക്ക് സഞ്ജു പരിക്കിൽ നിന്ന് പൂർണമായി മുക്തമാകുമെന്നും ടീമിലേക്ക് തിരിച്ചെത്തുമെന്നുമാണ് സൂചനകൾ. അടുത്ത കളിയിൽ ടീമിലേക്ക് മടങ്ങിയെത്തുമ്പോൾ താരത്തിന്റെ ബാറ്റി‌ങ് പൊസിഷനിൽ സുപ്രധാന മാറ്റമുണ്ടാകുമെന്നാണ് കരുതപ്പെടുന്നത്.


രാജസ്ഥാൻ റോയൽസിന്റെ പ്രധാന ഓപ്പണറായിരുന്നു സഞ്ജു സാംസൺ. എന്നാൽ താരം പരിക്കേറ്റ് പുറത്തായതിന് ശേഷം കൗമാര ബാറ്റർ വൈഭവ് സൂര്യവംശിയെ റോയൽസ് ഓപ്പണിങ്ങിലേക്ക് കൊണ്ടു വന്നു. ലക്നൗവിന് എതിരായ ഐപിഎൽ അരങ്ങേറ്റത്തിൽ 34 റൺസ് നേടി തുടങ്ങിയ സൂര്യവംശി, ഗുജറാത്ത് ടൈറ്റൻസിന് എതിരെ സെഞ്ചുറി നേടി ഞെട്ടിച്ചു. ഇതിന് ശേഷമുള്ള രണ്ട് കളികളിലും താരം നിരാശപ്പെടുത്തിയെങ്കിലും തന്റെ മികവ് തെളിയിച്ചുകഴിഞ്ഞ താരത്തെ ഈ സീസണിലെ ശേഷിക്കുന്ന കളികളിലും റോയൽസ് കളിപ്പിക്കാനാണ് സാധ്യത. ഓപ്പണിങ്ങിൽ തന്നെ വൈഭവിന് അവസരം ലഭിക്കാനുള്ള സാധ്യതകളാണ് ഉയർന്നു നിൽക്കുന്നത്.

സഞ്ജു സാംസണിന്റെ തിരിച്ചുവരവ്, സുപ്രധാന സൂചന പുറത്ത്; രാജസ്ഥാൻ റോയൽസ് ആരാധകർ കാത്തിരിക്കുന്ന വാർത്ത
അടുത്ത കളിയിൽ പരിക്ക് മാറി ടീമിലേക്ക് തിരിച്ചെത്തിയാലും സഞ്ജു സാംസണ് ഓപ്പണിങ്ങിൽ നിന്ന് മാറേണ്ടി വരാനുള്ള സാധ്യതകൾ ഇതോടെ കൂടി‌. ചെന്നൈ സൂപ്പർ കിങ്സിന് എതിരെ മടങ്ങിയെത്തുന്ന സഞ്ജു മൂന്നാം നമ്പരിലേക്ക് മാറിയേക്കുമെന്നാണ് കരുതപ്പെടുന്നത്. കഴിഞ്ഞ സീസൺ വരെ രാജസ്ഥാൻ റോയൽസിന്റെ മൂന്നാം നമ്പരിലായിരുന്നു സഞ്ജു കളിച്ചുകൊണ്ടിരുന്നത്. മൂന്നാം നമ്പരിൽ മികച്ച റെക്കോഡും താരത്തിനുണ്ട്. യുവ താരത്തിന് വേണ്ടി ഓപ്പണിങ് സ്ഥാനം വിട്ടുകൊടുക്കാൻ അതുകൊണ്ടു തന്നെ സഞ്ജുവിനും മടിയുണ്ടാകില്ല.

അതേ സമയം ഈ സീസണിൽ ഏഴ് മത്സരങ്ങൾ മാത്രമാണ് സഞ്ജു സാംസണ് കളിക്കാനായത്. ഇതിൽ 224 റൺസാണ് താരത്തിന്റെ സമ്പാദ്യം. 66, 13, 20, 38, 41, 15, 31* എന്നിങ്ങനെയാണ് ഈ സീസണിൽ സഞ്ജുവിന്റെ സ്കോറുകൾ.

മഴയ്ക്കും തോല്‍പ്പിക്കാനാവാത്ത പോരാട്ട വീര്യം, മുംബൈക്കെതിരേ അവസാന പന്തില്‍ വിജയം; ഗുജറാത്ത് ടൈറ്റന്‍സ് വീണ്ടും ഒന്നാമത്
2025 സീസൺ ഇന്ത്യൻ പ്രീമിയർ ലീഗിൽ നിരാശാജനകമായ പ്രകടനമാണ് രാജസ്ഥാൻ റോയൽസിന്റേത്. ഇതുവരെ കളിച്ച 12 മത്സരങ്ങളിൽ മൂന്ന് ജയങ്ങൾ മാത്രമാണ് അവർക്ക് നേടാനായത്. ആകെ ആറ് പോയിന്റ് മാത്രം നേടാനായ ടീം പോയിന്റ് പട്ടികയിൽ ഒൻപതാം സ്ഥാനത്താണ്. ശേഷിക്കുന്ന രണ്ട് കളികളിലും ജയം നേടി തല ഉയർത്തി സീസൺ അവസാനിപ്പിക്കുകയാവും ഇനി ടീമിന്റെ ലക്ഷ്യം.

ഈ മാസം 12 ന് ചെന്നൈ സൂപ്പർ കിങ്സിന് എതിരെയും, 16 ന് പഞ്ചാബ് കിങ്സിന് എതിരെയുമാണ് ടീമിന്റെ അടുത്ത മത്സരങ്ങൾ. ഇതിൽ ചെന്നൈക്ക് എതിരായ മത്സരം ചെപ്പോക്കിലും പഞ്ചാബ് കിങ്സിന് എതിരായ അവസാന മത്സരം ഹോം ഗ്രൗണ്ടായ ജയ്പൂരിലുമാണ് രാജസ്ഥാൻ റോയൽസ് കളിക്കുക.