സഞ്ജുവിന് ആയിരിക്കില്ല, ആ നേട്ടം ലഭിക്കുക മറ്റ് രണ്ടുപേർക്ക്; നിർണായക സൂചന നൽകി ആർ അശ്വിൻ

Authored by: അനുഷ ഗംഗാധരൻ|Samayam Malayalam•12 Aug 2025, 11:20 am

ഇന്ത്യൻ പ്രീമിയർ ലീഗും അതുമായി ബന്ധപ്പെട്ട താരലേലങ്ങളും ആരാധകരെ സംബന്ധിച്ചിടത്തോളം ഏറെ നിർണായകമായ ഒന്നാണ്. 2024 ൽ നടന്ന മെഗാ താരലേലത്തിൽ വമ്പൻ മാറ്റങ്ങളാണ് പല ടീമുകളും കൊണ്ടുവന്നത്. റെക്കോഡ് തുകയ്ക്ക് താരങ്ങളെ സ്വന്തമാക്കിയപ്പോൾ ചിലർ ആരാലും തെരഞ്ഞെടുക്കപ്പെടാതെ പുറത്താവുകയും ചെയ്‌തു. ഇന്നിപ്പോൾ ആരാധകർ കാത്തിരിക്കുന്നത് 2026 ലെ മിനി താരലേലലത്തിൽ ഏതെല്ലാം താരങ്ങൾ ടീം വിട്ട് മറ്റു ടീമിലേക്ക് ചേക്കേറും എന്നും ആരായിരിക്കും ഏറ്റവും വലിയ ലേല തുക സ്വന്തമാക്കുക എന്നുമാണ്. കഴിഞ്ഞ കുറച്ചുനാളുകളായി സഞ്ജു സാംസൺ രാജസ്ഥാൻ റോയൽസ് വിടുകയാണ് എന്ന അഭ്യൂഹങ്ങൾ പ്രചരിക്കുന്നുണ്ട്. എന്നാൽ സഞ്ജുവും രാജസ്ഥാൻ റോയൽസും ഇത് സംബന്ധിച്ച യാതൊരു ഔദ്യോഗിക വിശദീകരണവും നൽകിയിട്ടില്ല.
ഇന്ത്യ ടി20 സ്‌ക്വാഡിൽ സർപ്രൈസ് നീക്കം നടന്നേക്കും; പേസ്നിരയെ ശക്തമാക്കാൻ ജസ്പ്രീത് ബുംറ എത്തിയേക്കും
അതേസമയം സഞ്ജു ചെന്നൈ സൂപ്പർ കിങ്സിലേക്ക് പോകാനുള്ള സാധ്യത കൂടുതലാണ് എന്ന റിപ്പോർട്ടും എത്തുന്നുണ്ട്. ഈ സാഹചര്യത്തിൽ മറ്റൊരു പ്രവചനവുമായി രംഗത്തെത്തിയിരിക്കുകയാണ് മുൻ ഇന്ത്യൻ താരം ആർ അശ്വിൻ . മിനി താരലേലത്തിൽ ഏറ്റവും കൂടുതൽ തുക ഏത് താരം സ്വന്തമാക്കും എന്ന പ്രവചനമാണ് അശ്വിൻ നടത്തിയത്.

രണ്ട് ഓസ്‌ട്രേലിയൻ താരങ്ങളാകും മിനി താരലേലത്തിൽ ഏറ്റവും കൂടുതൽ തുക സ്വന്തമാക്കുക എന്നാണ് അശ്വിൻ പറയുന്നത്. തന്റെ ഹിന്ദി യൂട്യൂബ് ചാനലായ ആഷ് കി ബാത്തിലെ ഒരു വീഡിയോയിൽ ആണ് വിദേശ താരങ്ങളായിരിക്കും വിലകൂടിയ തുകയ്ക്ക് ടീമുകൾ തെരഞ്ഞെടുക്കുക എന്നും ഇന്ത്യൻ താരങ്ങളെ അത്തരത്തിൽ സ്വന്തമാക്കുന്നത് ടീമുകൾക്ക് ബുദ്ധിമുട്ടായിരിക്കും എന്നും അദ്ദേഹം പറഞ്ഞത്.

'ഇതൊരു മിനി ലേലമായിരിക്കും, അവിടെ ഇന്ത്യൻ താരങ്ങളെ കിട്ടാൻ ബുദ്ധിമുട്ടായിരിക്കും. ഒരുപക്ഷേ പുതിയ കളിക്കാർ മാത്രമേ വരൂ. അതുകൊണ്ടുതന്നെ വിദേശ താരങ്ങളെയാകും ഏറ്റവും ഉയർന്ന തുകയ്ക്ക് ഫ്രാഞ്ചൈസികൾ സ്വന്തമാക്കുക. ഒരു ഫ്രാഞ്ചൈസി ഒരു വലിയ ഇന്ത്യൻ താരത്തെ പുറത്തിറക്കുന്നത് വളരെ അപകടകരമായ ഒരു ഫോർമുലയാണ്. ലേലത്തിൽ നിരവധി ഓസ്‌ട്രേലിയൻ കളിക്കാർ എത്തും'എന്ന് അശ്വിൻ പറഞ്ഞു.

ഐ‌പി‌എൽ 2026 മിനി ലേലത്തിൽ ടീമുകൾ ഏറ്റവും കൂടുതൽ വാങ്ങാൻ സാധ്യതയുള്ള രണ്ട് താരങ്ങളായി ഓസ്‌ട്രേലിയൻ ഓൾ‌റൗണ്ടർമാരായ മിച്ചൽ ഓവനെയും കാമറൂൺ ഗ്രീനിനെയും ആണ് ആർ അശ്വിൻ തിരഞ്ഞെടുത്തു. 'ഓസ്‌ട്രേലിയൻ താരങ്ങളായ മിച്ചൽ ഓവനും കാമറൂൺ ഗ്രീനിനും ആയിരിക്കും താരലേലത്തിൽ ടീമുകൾ സ്വന്തമാക്കാൻ ശ്രമിക്കുക. ഓൾ റൗണ്ടർമാരായ ഇരുവർക്കുമായിരിക്കും ലേലത്തിൽ ഏറ്റവും കൂടുതൽ തുക സ്വന്തമാക്കാൻ സാധിക്കുക' എന്നും അശ്വിൻ പറഞ്ഞു.