സഞ്ജുവിന് പകരം സാം കറനും വിജയ് ശങ്കറും രാജസ്ഥാൻ റോയൽസിലേക്ക്? സർപ്രൈസ് നിർദേശവുമായി റോബിൻ ഉത്തപ്പ

Curated by: ഗോകുൽ എസ്|Samayam Malayalam•13 Aug 2025, 12:51 pm

മലയാളി സൂപ്പർ താരം സഞ്ജു സാംസൺ രാജസ്ഥാൻ റോയൽസ് വിടാൻ ഒരുങ്ങുകയാണെന്നാണ് റിപ്പോർട്ടുകൾ. ടീമിൽ നിന്ന് റിലീസ് ചെയ്യാൻ സഞ്ജു റോയൽസിനോട് അഭ്യർഥിച്ചെന്നും അടുത്ത സീസണിൽ പുതിയ ടീമിലാകും അദ്ദേഹം കളിക്കുക എന്നുമുള്ള‌ വാർത്തകളാണ് കഴിഞ്ഞ കുറച്ച് ദിവസങ്ങളായി പുറത്തുവരുന്നത്. രാജസ്ഥാൻ വിട്ട് ചെന്നൈ‌ സൂപ്പർ കിങ്സിലേക്ക് സഞ്ജു ചേക്കേറിയേക്കുമെന്നാണ് റിപ്പോർട്ടുകൾ ‌സൂചിപ്പിക്കുന്നത്. ട്രേഡ് ഡീലിലാകും സഞ്ജു ചെന്നൈയിൽ എത്തുകയെന്നും ആർ അശ്വിൻ ഈ ഡീലിൽ തിരിച്ച് രാജസ്ഥാൻ റോയൽസിലേക്ക് എത്തുമെന്നും വാർത്തകളുണ്ട്. ഇപ്പോളിതാ സഞ്ജു സാംസണെ ചെന്നൈക്ക് നൽകുമ്പോൾ, പകരം രാജസ്ഥാൻ ആവശ്യപ്പെടാൻ സാധ്യതയുള്ള 2 കളിക്കാരെ ചൂണ്ടിക്കാട്ടി രംഗത്ത് എത്തിയിരിക്കുകയാണ് റോബിൻ ഉത്തപ്പ . നിലവിൽ രാജസ്ഥാൻ റോയൽസിൽ ഫിനിഷർമാരുടെ അഭാവമുണ്ടെന്നും ഹെറ്റ്മെയർ മാത്രമേ ഫിനിഷറായി അവിടെയുള്ളൂവെന്നും പറയുന്ന ഉത്തപ്പ, അതുകൊണ്ടു തന്നെ സാം കറനെയോ അല്ലെങ്കിൽ വിജയ് ശങ്കറെയോ രാജസ്ഥാൻ റോയൽസ്, ചെന്നൈയിൽ നിന്ന് സ്വന്തമാക്കണമെന്ന് നിർദ്ദേശിക്കുന്നു.


"അവർക്ക് ( രാജസ്ഥാൻ റോയൽസിന് ) എന്താണ് ഇല്ലാത്തത്? ആറാം നമ്പരിൽ അവർക്ക് ഷിംറോൺ ഹെറ്റ്മെയർ മാത്രമേയുള്ളൂ. ഒരുപക്ഷേ സാം കറൻ, വിജയ് ശങ്കർ എന്നിവരാകാം അശ്വിനൊപ്പം പോവുക ( രാജസ്ഥാനിലേക്ക് ). അത് സംഭവിച്ചേക്കാം. " റോബിൻ ഉത്തപ്പ പറഞ്ഞു.

Also Read: ഇന്ത്യൻ ടീമിൽ സഞ്ജുവിന് ഇനി പുതിയ റോൾ? ശുഭ്മാൻ ഗിൽ വരുമ്പോൾ ബാറ്റിങ് ഓർഡറിൽ മാറ്റം വരാൻ സാധ്യത

സഞ്ജു സാംസണെ സ്വന്തമാക്കാനായാൽ ചെന്നൈ സൂപ്പർ കിങ്സിന് അത് വലിയൊരു മുതൽക്കൂട്ടായിരിക്കുമെന്നും ഇതിനൊപ്പം റോബിൻ ഉത്തപ്പ ചൂണ്ടിക്കാട്ടി‌. സഞ്ജുവിനെ സ്വന്തമാക്കാനായാൽ ചെന്നൈ‌ സൂപ്പർ കിങ്സിൽ ഒട്ടേറെ നല്ല കാര്യങ്ങൾ സംഭവിക്കുമെന്നും തന്റെ‌ യൂടൂബ് ചാനലിൽ സംസാരിക്കവെ ഉത്തപ്പ ചൂണ്ടിക്കാട്ടി.

അതേ സമയം നിലവിൽ ഇന്ത്യൻ ക്രിക്കറ്റിലെ ഏറ്റവും മികച്ച താരങ്ങളിൽ ഒരാളാണ് സഞ്ജു. ഐപിഎല്ലിൽ 18 കോടി രൂപയാണ് താരത്തിന്റെ പ്രതിഫലം. സാം കറൻ, വിജയ് ശങ്കർ എന്നിവരെ വാങ്ങി സഞ്ജുവിനെപ്പോലൊരു സൂപ്പർ താരത്തെ വിട്ടുനൽകാൻ രാജസ്ഥാൻ റോയൽസ് തയ്യാറാകുമോയെന്ന് കണ്ടറിയണം.

Also Read: ഒരോവറിൽ 6 സിക്സറുകൾ നേടണം, ക്രിക്കറ്റ് സ്വപ്നം വെളിപ്പെടുത്തി സഞ്ജു സാംസൺ

കഴിഞ്ഞ ഐപിഎൽ ലേലത്തിൽ 2.4 കോടി രൂപക്ക് ചെന്നൈ സ്വന്തമാക്കിയ താരമാണ് ഇംഗ്ലണ്ട് ഓൾ റൗണ്ടറായ സാം കറൻ. ഐപിഎല്ലിൽ 64 മത്സരങ്ങൾ കളിച്ചിട്ടുള്ള അദ്ദേഹം 997 റൺസും 59 വിക്കറ്റുകളും നേടിയിട്ടുണ്ട്. കഴിഞ്ഞ ലേലത്തിൽ 1.2 കോടി രൂപക്കാണ് വിജയ് ശങ്കറെ ചെന്നൈ സ്വന്തമാക്കിയത്. ഇന്ത്യൻ പ്രീമിയർ ലീഗിൽ 78 മത്സരങ്ങൾ കളിച്ചിട്ടുള്ള അദ്ദേഹം, 1233 റൺസും, 9 വിക്കറ്റുകളും നേടിയിട്ടുണ്ട്.