സഞ്ജുവിന്റെ പേരില്‍ മറ്റൊരു ഐപിഎല്‍ റെക്കോഡ് കൂടി; ഇത്തവണ സൃഷ്ടിച്ചത് നിര്‍ഭാഗ്യകരമായ ചരിത്രം

Authored byനിഷാദ് അമീന്‍ | Samayam Malayalam | Updated: 17 Apr 2025, 7:05 pm

ഐപിഎല്ലില്‍ നിരവധി നേട്ടങ്ങള്‍ സ്വന്തമാക്കിയ രാജസ്ഥാന്‍ റോയല്‍സ് ക്യാപ്റ്റന്‍ സഞ്ജു സാംസണിന് (Sanju Samson) നിര്‍ഭാഗ്യകരമായ ഒരു റെക്കോഡ്. ഡല്‍ഹി അരുണ്‍ ജെയ്റ്റ്ലി സ്റ്റേഡിയത്തില്‍ ഡല്‍ഹി ക്യാപിറ്റല്‍സിനെതിരെ (IPL 205 DC vs RR) ഇഞ്ചോടിഞ്ച് പോരാട്ടം കണ്ട സൂപ്പര്‍ ത്രില്ലറിലാണ് സഞ്ജു ചരിത്രം സൃഷ്ടിച്ചത്. മല്‍സരത്തില്‍ ഡിസി സൂപ്പര്‍ ഓവറില്‍ റോയല്‍സിനെ തോല്‍പ്പിക്കുകയും ചെയ്തു.

20 ഓവറില്‍ ഡിസി ഉയര്‍ത്തിയ 189 റണ്‍സ് വിജയലക്ഷ്യം പിന്തുടരാന്‍ സഞ്ജു സാംസണും യശസ്വി ജയ്‌സ്വാളുമാണ് ആദ്യം ക്രീസിലെത്തിയത്. ഇരുവരും ചേര്‍ന്ന് ഇന്നിങ്‌സിന് മികച്ച അസ്ഥിവാരമിട്ടു. മികച്ച ഫോമില്‍ നില്‍ക്കെ സഞ്ജുവിന് പരിക്കിന്റെ രൂപത്തില്‍ നിര്‍ഭാഗ്യമെത്തി. 19 പന്തില്‍ 31 റണ്‍സുമായി ബാറ്റ് ചെയ്യുകയായിരുന്നു സഞ്ജു.

പന്ത് ദേഹത്ത് തട്ടിയില്ലെങ്കിലും ബാറ്റ് വീശുന്നതിനിടെ വാരിയില്ലിന്റെ ഭാഗത്ത് പേശികളില്‍ ശക്തമായ വേദന അനുഭവപ്പെട്ടതോടെ സഞ്ജുവിന് ക്രീസില്‍ തുടരാനായില്ല. ഇതോടെ ഐപിഎല്‍ ചരിത്രത്തില്‍ റിട്ടയേര്‍ഡ് ഹര്‍ട്ട് ആവുന്ന ആദ്യത്തെ രാജസ്ഥാന്‍ റോയല്‍സ് താരമെന്ന റെക്കോഡ് സഞ്ജുവിന്റെ പേരിലായി.

18 വര്‍ഷത്തെ ഐപിഎല്‍ ചരിത്രത്തില്‍ മല്‍സരത്തിനിടെ പരിക്കേറ്റ് പുറത്ത്‌പോവുന്നുന്ന രണ്ടാമത്തെ ക്യാപ്റ്റനാണ് സഞ്ജു. ക്രുണാല്‍ പാണ്ഡ്യ ആണ് റിട്ടയേര്‍ഡ് ഹര്‍ട്ട് ആവുന്ന ആദ്യ ക്യാപ്റ്റന്‍.

സഞ്ജുവിന് ഒളിമ്പിക്‌സ് മെഡല്‍ നേടാന്‍ സുവര്‍ണാവസരം...! 2028 ഒളിമ്പിക്‌സില്‍ ടി20 ക്രിക്കറ്റും; ഉള്‍പ്പെടുത്തിയത് 128 വര്‍ഷങ്ങള്‍ക്ക് ശേഷം
വിപ്രജ് നിഗം എറിഞ്ഞ കളിയുടെ ആറാം ഓവറിലാണ് സംഭവം. ആദ്യ രണ്ട് പന്തുകളില്‍ ഒരു സിക്‌സറും ഒരു ബൗണ്ടറിയും നേടി നില്‍ക്കെ മൂന്നാം പന്തിലാണ് പരിക്കേറ്റത്. വിപ്രജ് നിഗത്തിന്റെ ഗൂഗ്ലിയില്‍ സഞ്ജു കട്ട് ഷോട്ടിന് ശ്രമിച്ചെങ്കിലും കണക്റ്റായില്ല.

തുടര്‍ന്ന് ശക്തമായ വേദന അനുഭവപ്പെട്ടതോടെ വൈദ്യസംഘമെത്തി പരിശോധിച്ചു. മൂന്നാം പന്ത് നോ ബോള്‍ ആയിരുന്നതിനാല്‍ അടുത്ത ഫ്രീ ഹിറ്റ് ബോള്‍ നേരിടാന്‍ സഞ്ജു ഒരുങ്ങി. ലോങ് ഓഫിലേക്ക് ഷോട്ട് പായിച്ചെങ്കിലും കടുത്ത വേദന കാരണം സഞ്ജു ക്രീസില്‍ തന്നെ നിന്നു. തുടര്‍ന്നാണ് പിന്മാറാന്‍ തീരുമാനിച്ചത്.

ഹാര്‍ദിക് പാണ്ഡ്യയുടെ ബാറ്റിന്റെ പ്രശ്‌നമെന്ത്? അമ്പയര്‍ തടഞ്ഞുനിര്‍ത്തി പരിശോധിക്കാനുള്ള കാരണമിതാണ്
ഐപിഎല്ലില്‍ റിട്ടയേര്‍ഡ് ഹര്‍ട്ട് ആയ കളിക്കാര്‍

• 0* ഡൊമിനിക് തോണ്‍ലി (2008)
• 8* ഹര്‍ഭജന്‍ സിങ് (2010)
• 10* വിവിഎസ് ലക്ഷ്മണ്‍ (2010)
• 16* സച്ചിന്‍ ടെണ്ടുല്‍ക്കര്‍ (2012)
• 38* സച്ചിന്‍ ടെണ്ടുല്‍ക്കര്‍ (2013)
• 10* ഹര്‍ഭജന്‍ സിങ് (2014)
• 10* ആരോണ്‍ ഫിഞ്ച് (2015)
• 0* കെവിന്‍ പീറ്റേഴ്സണ്‍ (2016)
• 2* ക്രുണാല്‍ പാണ്ഡ്യ (2017)
• 0* ശിഖര്‍ ധവാന്‍ (2018)
• 15* നിതീഷ് റാണ (2018)
• 0* അമ്പാട്ടി റായിഡു (2021)
• 17* രാഹുല്‍ ത്രിപാഠി (2023)
• 1* ഭാനുക രാജപക്സെ (2023)
• 49* ക്രുണാല്‍ പാണ്ഡ്യ (2023)
• 31* സഞ്ജു സാംസണ്‍ (2025)*

20 ഓവറില്‍ ഇരു ടീമുകളും 188 റണ്‍സ് നേടിയതോടെയാണ് സൂപ്പര്‍ ഓവര്‍ വേണ്ടി വന്നത്. ആദ്യം ബാറ്റ് ചെയ്ത ഡിസി അഞ്ച് വിക്കറ്റ് നഷ്ടത്തിലും ആര്‍ആര്‍ നാല് വിക്കറ്റ് നഷ്ടത്തിലുമാണ് ഇത്രയും റണ്‍സ് നേടിയത്. സൂപ്പര്‍ ഓവറില്‍ ആര്‍ആര്‍ 11 റണ്‍സ് മാത്രമാണ് നേടിയത്. ട്രിസ്റ്റന്‍ സ്റ്റബ്സും കെഎല്‍ രാഹുലും ചേര്‍ന്ന് നാല് പന്തില്‍ ഈ സ്‌കോര്‍ മറികടന്നു.

വിജയത്തോടെ ഡിസി പോയിന്റ് നിലയില്‍ ഒന്നാമതെത്തി. ആറ് മാച്ചുകളില്‍ അഞ്ച് വിജയങ്ങളിലൂടെ 10 പോയിന്റാണുള്ളത്. രാജസ്ഥാന്‍ റോയല്‍സ് അഞ്ചാം തോല്‍വിയോടെ എട്ടാം സ്ഥാനത്താണ്.