സഞ്ജുവിന്റെ രാജസ്ഥാൻ ഒറ്റയ്ക്കല്ല; ചേർത്തുപിടിച്ച് ബിസിസിഐ; കോഴ ആരോപണത്തിൽ ബിസിസിഐ മറുപടി

Edited byഅനുഷ ഗംഗാധരൻ | Samayam Malayalam | Updated: 23 Apr 2025, 11:29 am

ജയ്പൂർ / മുംബൈ: ഇന്ത്യൻ പ്രീമിയർ ലീഗ് (ഐപിഎൽ) 2025 സീസണിൽ രാജസ്ഥാൻ റോയൽസ് ടീമിനെതിരെ ഉയർന്ന മാച്ച് ഫിക്സിങ് ആരോപണങ്ങൾക്കെതിരെ ബിസിസിഐ ശക്തമായ പ്രതികരണം രേഖപ്പെടുത്തി. ഏപ്രിൽ 19-ന് ലക്നൗ സൂപ്പർ ജയന്റ്സിനെതിരായ മത്സരത്തിൽ രാജസ്ഥാൻ റോയൽസ് 2 റൺസിന് തോറ്റതിനെ തുടർന്ന് രാജസ്ഥാൻ ക്രിക്കറ്റ് അസോസിയേഷൻ (ആർസിഎ) അഡ്ഹോക്ക് കമ്മിറ്റി കൺവീനർ ജയദീപ് ബിഹാനി മാച്ച് ഫിക്സിങ് ആരോപണം ഉന്നയിച്ചിരുന്നു. ഈ ആരോപണങ്ങൾ അടിസ്ഥാനരഹിതമായതും ക്രിക്കറ്റ് ഗെയിമിന്റെ വിശ്വാസ്യതയെ ബാധിക്കുന്നതുമാണെന്ന് ബിസിസിഐ ഉദ്യോഗസ്ഥൻ പ്രതികരിച്ചു.
വീണ്ടും റെക്കോഡ് തിളക്കം; ഇത് ചിലരോടുള്ള പ്രതികാര താണ്ഡവം തന്നെ; ഐപിഎല്ലിൽ ഡേവിഡ് വാർണറെ മറികടന്ന് ചരിത്രം സൃഷ്ടിച്ച് കെ എൽ രാഹുൽബിസിസിഐയുടെ ആന്റി-കറപ്ഷൻ യൂണിറ്റ് 24x7 പ്രവർത്തിക്കുന്നതായും, ഇത്തരം ആരോപണങ്ങൾക്ക് യാതൊരു അടിസ്ഥാനവും ഇല്ലെന്നും അദ്ദേഹം വ്യക്തമാക്കി. രാജസ്ഥാൻ റോയൽസ് ടീമിന്റെ മാനേജ്മെന്റും ഈ ആരോപണങ്ങളെ ശക്തമായി നിഷേധിച്ച്‌, ഇത് പൊതുജനങ്ങളെ തെറ്റിദ്ധരിപ്പിക്കുന്ന ശ്രമമാണെന്ന് പറഞ്ഞു.
അതേസമയം ഈ സീസണിലെ കോംപ്ലിമെൻ്ററി ടിക്കറ്റുകളുടെ എണ്ണം കുറച്ചത് രാജസ്ഥാൻ റോയൽസും ആർസിഎയും തമ്മിലുള്ള തർക്കത്തിന് കാരണമായേക്കാമെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്‌തിരുന്നു. ജയ്പൂരിലെ ഹോം മത്സരങ്ങൾക്കായി ആർആർ മുമ്പ് ആർസിഎയ്ക്ക് 1800 കോംപ്ലിമെൻ്ററി ടിക്കറ്റുകൾ നൽകിയിരുന്നു, എന്നാൽ ഈ വർഷം അസോസിയേഷൻ പിരിച്ചുവിട്ടതിനാൽ, ഫ്രാഞ്ചൈസി 1000-1200 ടിക്കറ്റുകൾ മാത്രമാണ് നൽകിയത്.അതേസമയം ഫ്രാഞ്ചൈസിയുമായി ബന്ധപ്പെട്ട വിഷയത്തിലും ഐപിഎൽ നടന്നുകൊണ്ടിരിക്കുന്ന സീസണിലും ആർസിഎയെ ഇടപെടാൻ അനുവദിക്കില്ലെന്ന ബിഹാനിയുടെ അവകാശവാദങ്ങളെയും രാജസ്ഥാൻ റോയൽസ് എതിർത്തു.

"കരാർ വ്യവസ്ഥകളും ബിസിസിഐ നിർദ്ദേശങ്ങളും അനുസരിച്ച്, ഞങ്ങൾ സംസ്ഥാന അസോസിയേഷനുമായും സംസ്ഥാന സർക്കാരുമായും ചേർന്ന് പ്രവർത്തിക്കണം. ആർഎംപിഎൽ കഴിഞ്ഞ 18 വർഷമായി ഇത് ഫലപ്രദമായും വിജയകരമായി ചെയ്തു. ജയ്പൂരിൽ നടക്കുന്ന ഐപിഎൽ മത്സരങ്ങളുടെ ഹോസ്റ്റിംഗ് അവകാശം ആർ എസ് എസ് സി -യ്ക്ക് ഉണ്ടെന്ന് ബിസിസിഐ സ്ഥിരീകരിക്കുകയും അംഗീകരിക്കുകയും ചെയ്തു" എന്നും രാജസ്ഥാൻ റോയൽസ് പ്രതിനിധി പറഞ്ഞു.

അതേസമയം സമൂഹ മാധ്യമങ്ങളിൽ അടക്കം ഏറെ ചർച്ചയായ വിഷയമാണ് രാജസ്ഥാൻ റോയല്സിനെതിരെ ഉയർന്ന കോഴ ആരോപണം. എന്നാൽ ഇപ്പോൾ ബിസിസിഐ തന്നെ രംഗത്തെത്തിയതോടെ അത്തരം ഊഹാപോഹങ്ങൾക്ക് അവസാനം കുറിച്ചിരിക്കുകയാണ്. നിലവിൽ സ്ഥിരതയില്ലാത്ത പ്രകടനമാണ് സഞ്ജുവിന്റെ രാജസ്ഥാൻ റോയൽസിന്റെ പ്രധാനവെല്ലുവിളി. എന്നാൽ ഇത് തരണം ചെയ്യും എന്ന സൂചന നൽകുന്ന പ്രകടനമാണ് ലക്‌നൗവിനെതിരെ നടന്ന മത്സരത്തിൽ രാജസ്ഥാൻ റോയൽസ് ബാറ്റിങ് തുടങ്ങിയ ആദ്യ ഓവറിൽ കാണാൻ സാധിച്ചത്.

രാജസ്ഥാൻ റോയൽസിന്റെ വജ്രായുധമായ വൈഭവ് സൂര്യവംശിയെ ആദ്യമായി മൈതാനത്ത് ഇറക്കിയ മത്സരത്തിൽ ജയം ഉറപ്പിച്ച രാജസ്ഥാൻ റോയൽസ് മധ്യനിരയുടെ നിരാശാജനകമായ ബാറ്റിങ് പ്രകടനത്തിലാണ് പരാജയപ്പെടുന്നത്. ഈ മത്സരത്തിൽ സഞ്ജുവിന് ഇറങ്ങാൻ സാധിച്ചിരുന്നില്ല. ഡൽഹിയുമായി നടന്ന മത്സരത്തിൽ വാരിയെല്ലിന് പരിക്കേറ്റ സഞ്ജു ഇതുവരെ പരിക്കിൽ നിന്ന് മുക്തനായിട്ടില്ല.

രാജസ്ഥാൻ റോയൽസിന്റെ അടുത്ത മത്സരത്തിലും അതുകൊണ്ടുതന്നെ സഞ്ജുവിന് മൈതാനത്ത് ഇറങ്ങാൻ സാധിക്കില്ല. ചിന്നസ്വാമി സ്റ്റേഡിയത്തിൽ നടക്കുന്ന ഈ മത്സരത്തിൽ സഞ്ജുവിന് പകരം വൈഭവിനെ ടീം ഇമ്പാക്ട് പ്ലേയർ ആയി ഇറക്കാനും സാധ്യത ഉണ്ട്.