സഞ്ജുവിന്റെ രാജസ്ഥാൻ ഹാപ്പി, വെടിക്കെട്ടുമായി ഞെട്ടിച്ച് ഇന്ത്യൻ താരം; അടുത്ത സീസണിൽ റിട്ടെയിൻ ചെയ്യുമെന്ന് ഉറപ്പ്

Curated by: ഗോകുൽ എസ്|Samayam Malayalam•30 Aug 2025, 4:31 pm

2025 സീസൺ ഇന്ത്യൻ പ്രീമിയർ ലീഗിൽ ( IPL ) നിരാശാജനകമായ പ്രകടനമായിരുന്നു രാജസ്ഥാൻ റോയൽസിന്റേത്‌ ( Rajasthan Royals ). 10 ടീമുകൾ കളിക്കുന്ന ലീഗിൽ ഒൻപതാം സ്ഥാനത്തായിരുന്നു ടീം ഫിനിഷ് ചെയ്തത്. 14 ലീഗ് മത്സരങ്ങളിൽ 4 വിജയങ്ങൾ മാത്രമാണ് അവർക്ക് നേടാനായത് എന്നതാണ് ശ്രദ്ധേയം. മെഗാ ലേലത്തിൽ സംഭവിച്ച ചില പാളിച്ചകൾ ടീമിന്റെ മോശം പ്രകടനത്തിന് പിന്നിലെ പ്രധാന കാരണമാണ്.കഴിഞ്ഞ മെഗാ താര ലേലത്തിൽ രാജസ്ഥാൻ റോയൽസ് സ്വന്തമാക്കിയ പ്രധാന ഇന്ത്യൻ താരങ്ങളിൽ ഒരാളായിരുന്നു നിതീഷ് റാണ ( Nitish Rana ). 4.2 കോടി രൂപയായിരുന്നു അദ്ദേഹത്തിനായി റോയൽസ് മുടക്കിയത്. എന്നാൽ പ്രതീക്ഷിച്ച പ്രകടനം ടീമിനായി പുറത്തെടുക്കാൻ അദ്ദേഹത്തിനായില്ല. 2025 സീസൺ ഐപിഎല്ലിൽ 11 കളികളിൽ നിന്ന് 217 റൺസ് മാത്രമായിരുന്നു നിതീഷ് റാണയുടെ സമ്പാദ്യം. ടീമിനൊപ്പമുള്ള ആദ്യ സീസണിൽ ഫ്ലോപ്പായെങ്കിലും താരത്തെ ടീമിൽ നിന്ന് ഒഴിവാക്കാൻ രാജസ്ഥാൻ റോയൽസ് തയ്യാറാകില്ല. 2026 സീസണിലും ടീമിന്റെ പ്രധാന റോളുകളിലൊന്നിൽ നിതീഷുണ്ടാകും.


നിലവിൽ നടന്നുകൊണ്ടിരിക്കുന്നഡെൽഹി പ്രീമിയർ ലീഗിൽ മാസ്മരിക പ്രകടനം കാഴ്ച വെച്ച് രാജസ്ഥാൻ റോയൽസിലെ തന്റെ റിട്ടൻഷൻ ഉറപ്പിച്ചിരിക്കുക കൂടിയാണ് ഇപ്പോൾ നിതീഷ് റാണ. ലീഗിൽ വെസ്റ്റ് ഡെൽഹി ലയൺസിന്റെ താരമായ നിതീഷ് റാണ കഴിഞ്ഞ ദിവസം സൗത്ത് ഡെൽഹി സൂപ്പർ സ്റ്റാർസിന് എതിരെ നടന്ന കളിയിൽ വെടിക്കെട്ട് സെഞ്ചുറി നേടിയാണ് തിളങ്ങിയത്.

മത്സരത്തിൽ 202 റൺസ് വിജയലക്ഷ്യം പിന്തുടർന്ന വെസ്റ്റ് ഡെൽഹി ലയൺസിനായി നാലാം നമ്പരിൽ ക്രീസിലെത്തിയ റാണ, 55 പന്തിൽ 134 റൺസെടുത്ത് പുറത്താകാതെ നിന്നു. എട്ട് ഫോറുകളും 15 സിക്സറുകളുമാണ് ഈ ഇന്നിങ്സിൽ അദ്ദേഹം നേടിയത്. 202 റൺസ് വിജയലക്ഷ്യം വെറും 17.1 ഓവറിൽ നിതീഷ് റാണയുടെ ടീം മറികടന്നു.

Also Read: ബട്ലറെ റിലീസ് ചെയ്തത് സഞ്ജുവിനെ കലിപ്പിലാക്കി, രാജസ്ഥാൻ റോയൽസ് വിടാനുള്ള കാരണങ്ങളിലൊന്ന് ഇതാണെന്ന് റിപ്പോർട്ട്

ഡെൽഹി ലീഗിൽ ഇക്കുറി കളിച്ച 9 മത്സരങ്ങളിൽ നിന്ന് മൊത്തം 269 റൺസാണ് നിതീഷ് റാണ നേടിയത്. 44.83 ബാറ്റിങ് ശരാശരിയിലും, 190.78 സ്ട്രൈക്ക് റേറ്റിലുമാണ് ഇത്. 19 ഫോറുകളും 25 സിക്സറുകളും താരത്തിന്റെ ബാറ്റിൽ നിന്ന് പിറന്നുകഴിഞ്ഞു.

അതേ സമയം നിലവിൽ ഇന്ത്യൻ ക്രിക്കറ്റിലെ ഏറ്റവും മികച്ച യുവ താരങ്ങളിൽ ഒരാളാണ് നിതീഷ് റാണ. ഐപിഎല്ലിൽ രാജസ്ഥാൻ റോയൽസിൽ എത്തുന്നതിന് മു‌ൻപ് കൊൽക്കത്ത നൈറ്റ് റൈഡേഴ്സ്, മുംബൈ ഇന്ത്യൻസ് ടീമുകളുടെയും ഭാഗമായിരുന്നു അദ്ദേഹം. ആകെ 118 മത്സരങ്ങളാണ് ഐപിഎല്ലിൽ നിതീഷ് റാണ കളിച്ചിട്ടുള്ളത്. ഈ മത്സരങ്ങളിൽ നിന്ന് 2853 റൺസും, 10 വിക്കറ്റുകളുമാണ് അദ്ദേഹം നേടിയത്. 2023 സീസണിൽ കൊൽക്കത്ത നൈറ്റ് റൈഡേഴ്സിന്റെ നായകനായി പ്രവർത്തിച്ച പരിചയവും നിതീഷ് റാണക്കുണ്ട്. 14 കളികളിലായിരുന്നു റാണ കെകെആറിന്റെ ക്യാപ്റ്റനായത്.

Also Read: സഞ്ജുവിന് പകരം സാം കറനും വിജയ് ശങ്കറും രാജസ്ഥാൻ റോയൽസിലേക്ക്? സർപ്രൈസ് നിർദേശവുമായി റോബിൻ ഉത്തപ്പ

അതേ സമയം 2026 സീസൺ ഇന്ത്യൻ പ്രീമിയർ ലീഗിൽ അതിശക്തമായ ഒരു തിരിച്ചുവരവാണ് രാജസ്ഥാൻ റോയൽസ് ലക്ഷ്യം വെക്കുന്നത്. പോയ സീസണിൽ ടീം ഒൻപതാം സ്ഥാനത്തേക്ക് പിന്തള്ളപ്പെട്ടതിന് പിന്നിൽ പല കാരണങ്ങളുമുണ്ടായിരുന്നു. സംഭവിച്ച പിഴവുകളിൽ നിന്ന് പാഠമുൾക്കൊണ്ട് ഇറങ്ങാൻ ഒരുങ്ങുന്ന റോയൽസിൽ നിതീഷ് റാണയെപ്പോലൊരു താരത്തിന് പ്രധാന റോൾ തന്നെ ലഭിക്കുമെന്നാണ് കരുതപ്പെടുന്നത്. അതിനായുള്ള കാത്തിരിപ്പിലാണ് താരത്തിന്റെ ആരാധകരും.