സെറ്റില്‍ രണ്ടുപേരെയും കൊണ്ടുപോകണം, അല്ലെങ്കില്‍ ഇരിക്കാന്‍ സീറ്റ് പോലും കിട്ടില്ല; ബോളിവുഡിലെ അനുഭവത്തെ കുറിച്ച് ദുല്‍ഖര്‍

Authored by: അശ്വിനി പി|Samayam Malayalam•3 Dec 2025, 1:14 pm

മലയാളത്തിന്റെ കുഞ്ഞിക്ക, ഇപ്പോള്‍ സൗത്ത് ഇന്ത്യന്‍ സിനിമയിലെ ഡിക്യുവാണ്. തെലുങ്ക് സിനിമാ ലോകത്ത് വിജയങ്ങള്‍ കീഴടക്കി മുന്നേറുകയാണ് താരം. സീതാരാമം, ലക്കി ഭാസ്‌കര്‍ എന്നീ ചിത്രങ്ങളുടെ ഗംഭീര വിജയത്തിന് ശേഷം കാന്ത എന്ന ചിത്രത്തിനും തെലുങ്ക് ഇന്റസ്ട്രിയില്‍ വലിയ സ്വീകരണമാണ് ലഭിച്ചത്. തെലുങ്ക് ഭാഷയും റെട്രോ ലുക്കും ദുല്‍ഖറിന് രാശിയാണെന്ന തരത്തില്‍ ചര്‍ച്ചകളും വരുന്നുണ്ട്.

തെലുങ്കിലും തമിഴിലും മാത്രമല്ല, പതിയെ ബോളിവുഡ് സിനിമയിലും ദുല്‍ഖര്‍ കാലുറപ്പിയ്ക്കുന്നു. എന്നാല്‍ ബോളിവുഡ് സിനിമാ സെറ്റില്‍ കിട്ടിയ സ്വീകരണം അത്ര സുഖകരമായിരുന്നില്ല. താനൊരു വലിയ നടനാണ് എന്ന മിഥ്യാ ധാരണ ഉണ്ടാക്കിയെടുത്താല്‍ മാത്രമാണ് അവിടെ ഇരിക്കാനുള്ള കസേര പോലും കിട്ടുന്നത് എന്ന് അടുത്തിടെ നല്‍കിയ അഭിമുഖത്തില്‍ ദുല്‍ഖര്‍ സല്‍മാന്‍ സംസാരിക്കുകയുണ്ടായി.

Also Read: ഇതത്ര എളുപ്പമല്ല, ഈ ഫോട്ടോ എടുത്തതിന് പിന്നില്‍; നമിത പ്രമോദ് പറയുന്നു, എല്ലാ ഫോട്ടോകളും എസ്‌തെറ്റിക് ആയി തോന്നുന്നുണ്ടോ?

സെറ്റിലേക്ക് പോകുന്നത് രണ്ട് അസിസ്റ്റന്റ്‌സിനൊപ്പമാണ്, അല്ലെങ്കില്‍ എനിക്ക് അവിടെ ഇരിക്കാന്‍ സീറ്റ് പോലും കിട്ടില്ല. മോണിറ്ററിന് മുന്‍പിലേക്ക് പോകാനേ സാധിക്കില്ല, അവിടെ നിറയെ ആളുകള്‍ തടിച്ചുകൂടി നിന്നിരിക്കും- എന്നാണ് ദുല്‍ഖര്‍ സല്‍മാന്‍ പറഞ്ഞത്

ഇതെല്ലാം അവിടത്തുകാരുടെ കാഴ്ചപ്പാടിന്റെ അടിസ്ഥാനത്തിലാണ്. ഒരു ഫാന്‍സി കാറില്‍ ഒരുപാട് ആളുകളുമായി ഒരാള്‍ സെറ്റിലേക്ക് എത്തിയാല്‍, ആ ആള്‍ ഒരു വലിയ താരമാണ് എന്ന രീതിയിലാണ് സ്വീകരണം നല്‍കുന്നത്. ഇത്തരത്തില്‍ ആളുകളെ ട്രീറ്റ് ചെയ്യുന്നതില്‍ എനിക്ക് ഖേദമുണ്ട്, അത്തരം കാര്യങ്ങളിലേക്ക് എന്റെ എനര്‍ജി പോകരുത് എന്ന അഭിപ്രായമാണ് എന്നും ദുല്‍ഖര്‍ സല്‍മാന്‍ പറയുന്നു.

റാണ ദുഗുപതിയും താനും ഇത്തരം കാര്യങ്ങള്‍ സംസാരിക്കുന്നതിനെ കുറിച്ച് ദുല്‍ഖര്‍ പറയുന്നു. എന്തുകൊണ്ടാണ് ഇങ്ങനെ സംഭവിക്കുന്നത് എന്ന് എനിക്ക് മനസ്സിലാവുന്നില്ല. ഒരു ഇന്റസ്ട്രിയെയും കുറ്റം പറയാനും ഞാന്‍ ആഗ്രഹിക്കുന്നില്ല. ഇതൊക്കെയും സംസ്‌കാരത്തിന്റെ ഭാഗമായിരിക്കാം- ദുല്‍ഖര്‍ പറഞ്ഞു.

2018 ല്‍ കര്‍വാന്‍ എന്ന ഹിന്ദി ചിത്രം ചെയ്തുകൊണ്ടാണ് ദുല്‍ഖര്‍ സല്‍മാന്‍ ബോളിവുഡ് സിനിമ ഇന്റസ്ട്രിയിലേക്ക് കടന്നത്. അതിന് ശേഷം ദ സോയ ഫാക്ടര്‍, ചുപ്- റിവഞ്ച് ഓഫ് ദ ആര്‍ട്ടിസ്റ്റ് എന്നീ സിനിമകളിലും അഭിനയിച്ചു.