സ്‌കൂളില്‍ നിന്ന് എന്നെ പുറത്താക്കി, പിന്നെ പഠിക്കാന്‍ പോയില്ല; പഠനം നിര്‍ത്തിയ കാരണം വെളിപ്പെടുത്തി ഉര്‍വശി

ഇന്ത്യ കണ്ട ഏറ്റവും മികച്ച നടിമാരില്‍ ഒരാളാണ് ഉര്‍വശി . സാക്ഷാല്‍ കമല്‍ ഹാസന്‍ പോലും ഉര്‍വശി എന്ന അഭിനേത്രിയെ പ്രശംസിച്ചത് മലയാളത്തിന് അഭിമാനമാണ്. ബാലതാരമായി അഭിനയ ലോകത്തേക്ക് വന്ന ഉര്‍വശി ഇതുവരെ എഴുന്നൂറിലധികം സിനിമകള്‍ ചെയ്തു എന്ന് പറഞ്ഞാല്‍ അത് അത്ഭുതം തന്നെയാണ്. എന്നാല്‍ അത്രയധികം സിനിമകള്‍ ചെയ്തു എന്ന തോന്നല്‍ ഒരിക്കലും തനിക്കില്ല എന്ന് ഉര്‍വശി പറയുന്നു.

തമിഴിലും മലയാളത്തിലും തെലുങ്കിലുമൊക്കെയായി ഓടി നടന്ന് സിനിമകള്‍ ചെയ്യുകയായിരുന്നു ഉര്‍വശി. അതിനിടയില്‍ പഠനവും നഷ്ടപ്പെട്ടു. യഥാര്‍ത്ഥത്തില്‍ പഠനം പാതി വഴിയില്‍ വച്ച് മുടങ്ങിപ്പോകാനുള്ള കാരണം ഉര്‍വശിയ്ക്ക് സിനിമകളുടെ തിരക്ക് ആയത് കൊണ്ടു മാത്രമല്ല, ഒരു ഘട്ടം കഴിഞ്ഞപ്പോള്‍ ഇനി സ്‌കൂളിലേക്ക് വരേണ്ട എന്ന് പറഞ്ഞ് അവിടെ നിന്ന് പറഞ്ഞുവിട്ടതാണത്രെ.

12 ആം വയസ്സിലാണ് ആദ്യമായി നായികയായി അഭിനയിച്ചത്. പതിമൂന്നാം വയസ്സില്‍ ചെയ്ത മുന്താനയ് മുടിച്ചി എന്ന സിനിമയും, അതിലെ പാട്ടുകളും എല്ലാം വന്‍ ഹിറ്റാകുകയും ചെയ്തു. ഒന്‍പതാം ക്ലാസില്‍ പഠിക്കുമ്പോഴായിരുന്നു മുന്താനയ് മുടിച്ചിയുടെ ഷൂട്ടിങ്. ഒന്‍പതാം ക്ലാസിലെ പരീക്ഷ റീ എക്‌സാം എഴുതി ജയിച്ചാണ് പത്താം ക്ലാസിലേക്ക് എത്തിയത്. സ്‌കൂളിലേക്ക് ചെന്നതും കണ്ണ തുറക്കടാ സാമി, കൈയ്യ പുടിക്കടാ സാമി (മുന്താനയ് മുടിച്ചിയിലെ പാട്ട്) എന്ന പാട്ടും പാടി ചെറുക്കന്മാരെല്ലാം എന്റെ പിന്നാലെയായിരുന്നു

അപ്പോഴത്തെ ഒരു മാനസികാവസ്ഥയില്‍ എനിക്കത് വലിയ പ്രയാസമായിരുന്നു. എന്നാലും സ്‌കൂളില്‍ പോയി. പിള്ളേരെല്ലാം എന്റെ പുറകയെയായപ്പോള്‍ ഇനി സ്‌കൂളിലേക്ക് വരേണ്ട എന്ന് സ്‌കൂളില്‍ നിന്ന് തന്നെ വിളിച്ച് പറയുകയായിരുന്നു. ഒന്നാമത് അറ്റന്റന്‍സ് ഇല്ല, പിന്നെ വരുമ്പോള്‍ ഉള്ള കുട്ടികളുടെ പാട്ടും കളിയും. അതോടെ വരേണ്ട എന്ന് സ്‌കൂളില്‍ നിന്ന് പറഞ്ഞു.

പക്ഷേ പിന്നീട് പ്ലസ് വണ്‍ പ്ലസ് ടു എഴുതി എടുത്തു. എനിക്കും ശോഭനയ്ക്കും വലിയ ആഗ്രഹമായിരുന്നു തുടര്‍ന്ന് പഠിക്കണം എന്ന്. ഒന്നിച്ച് എന്‍ട്രന്‍സ് എഴുതാം എന്നെല്ലാം തീരുമാനിച്ചിരുന്നു. പിന്നീട് പുള്ളിക്കാരി പതിയെ പിന്മാറി. പഠനം നിന്നു പോയതില്‍ വിഷമമൊന്നും തോന്നിയിട്ടില്ല. ഞാന്‍ സിനിമ ഒരുപാട് ആസ്വദിച്ചു എന്ന് ഉര്‍വശി പറയുന്നു