ഹാര്‍ദിക് പാണ്ഡ്യ എത്തിയിട്ടും രക്ഷയില്ല; മുംബൈ ഇന്ത്യന്‍സ് ഗുജറാത്ത് ടൈറ്റന്‍സിനോടും നാണംകെട്ടു

Authored byനിഷാദ് അമീന്‍ | Samayam Malayalam | Updated: 29 Mar 2025, 11:48 pm

Samayam Malayalamരോഹിത് ശര്‍മ, റയാന്‍ റിക്കില്‍റ്റണ്‍ എന്നിവരെ മുഹമ്മദ് സിറാജ് ക്ലീന്‍ ബൗള്‍ഡാക്കുന്നു

വിലക്ക് നീങ്ങി ക്യാപ്റ്റന്‍ ഹാര്‍ദിക് പാണ്ഡ്യ എത്തിയിട്ടും ഐപിഎല്ലില്‍ മുംബൈ ഇന്ത്യന്‍സിന് തോല്‍വി തന്നെ. 2025 സീസണിലെ രണ്ടാം മല്‍സരത്തില്‍ ഗുജറാത്ത് ടൈറ്റന്‍സിനോട് 36 റണ്‍സിനാണ് പരാജയപ്പെട്ടത്. ആദ്യ മാച്ചില്‍ ചെന്നൈ സൂപ്പര്‍ കിങ്‌സിനോട് എംഐ നാല് വിക്കറ്റിന് കീഴടങ്ങിയിരുന്നു.

ഐപിഎല്‍ 2024ല്‍ ഏറ്റവും അവസാനത്ത് ഫിനിഷ് ചെയ്ത എംഐ ഇത്തവണ ഹാര്‍ദികിന് കീഴില്‍ വലിയ പ്രതീക്ഷകളോടെയാണ് എത്തിയത്. രണ്ട് മല്‍സരങ്ങള്‍ പിന്നിട്ടപ്പോള്‍ പോയിന്റ് നിലയില്‍ ഏറ്റവും പിന്നിലാണ്. ജിടി എട്ട് വിക്കറ്റിന് 196 റണ്‍സെടുത്തപ്പോള്‍ എംഐക്ക് ആറ് വിക്കറ്റിന് 160 റണ്‍സെടുക്കാനേ കഴിഞ്ഞുള്ളൂ.

ശുഭ്മാന്‍ ഗില്‍ നയിക്കുന്ന ജിടി ആദ്യ മാച്ചില്‍ പഞ്ചാബ് കിങ്‌സിനോട് നന്നായി കളിച്ചെങ്കിലും 11 റണ്‍സിന്റെ നേരിയ തോല്‍വി വഴങ്ങുകയായിരുന്നു. ഇതിന്റെ ക്ഷീണം എംഐക്കെതിരായ ഇന്നത്തെ മല്‍സരത്തോടെ അവര്‍ തീര്‍ത്തു.

കഴിഞ്ഞ മാച്ചില്‍ എംഐക്ക് വേണ്ടി ഇംപാക്റ്റ് സബ് ആയി ഐപിഎല്‍ അരങ്ങേറ്റം ഉജ്വലമാക്കിയ മലയാളി താരം വിഘ്‌നേഷ് പുത്തൂരിന് ഇന്ന് അവസരം നല്‍കിയില്ല.

120 പന്തില്‍ 197 റണ്‍സ് വിജയലക്ഷ്യവുമായി ചേസിങ് ആരംഭിച്ച എംഐക്ക് രോഹിത് ശര്‍മ, റയാന്‍ റിക്കില്‍റ്റണ്‍ എന്നിവരെ തുടക്കത്തില്‍ തന്നെ നഷ്ടമായി. ഇരുവരേയും
മുഹമ്മദ് സിറാജ് ക്ലീന്‍ ബൗള്‍ഡാക്കുകയായിരുന്നു. പിന്നീട് സൂര്യകുമാര്‍ യാദവ് (28 പന്തില്‍ 48), തിലക് വര്‍മ (36 പന്തില്‍ 39), നമന്‍ ധിര്‍ (11 പന്തില്‍ 18*), മിച്ചല്‍ സാന്റ്‌നര്‍ (9 പന്തില്‍ 18*) എന്നിവര്‍ പൊരുതിയെങ്കിലും മല്‍സരം കൈവിട്ടുപോയി.

ടോസ് നഷ്ടപ്പെട്ട് ബാറ്റിങ് ആരംഭിച്ച ജിടിക്ക് വേണ്ടി ഓപണര്‍മാരായ സായ് സുദര്‍ശനും ക്യാപ്റ്റന്‍ ശുഭ്മാന്‍ ഗില്ലും നല്ല തുടക്കമിട്ടു. ടീം സ്‌കോര്‍ 8.3 ഓവറില്‍ 78 റണ്‍സിലെത്തിയപ്പോഴാണ് ആദ്യ വിക്കറ്റ് വീണത്. ഗില്‍ 27 പന്തില്‍ 38 റണ്‍സുമായി ഹാര്‍ദിക് പാണ്ഡ്യയുടെ പന്തില്‍ നമന്‍ ധിറിന് ക്യാച്ച് നല്‍കി. നാല് ബൗണ്ടറികളും ഒരു സിക്‌സറും സഹിതം ഗില്‍ നന്നായി ബാറ്റ് ചെയ്യവെയാണ് പുറത്തായത്.

മൂന്നാമനായി എത്തിയത് വെടിക്കെട്ട് വീരന്‍ ദോസ് ബട്‌ലറാണ്. 24 പന്തില്‍ 39 റണ്‍സെടുത്ത ബട്‌ലറെ മുജീബ് റഹ്‌മാന്റെ പന്തില്‍ റിക്കെല്‍റ്റണ്‍ പിടികൂടി. ഒമ്പത് റണ്‍സെടുത്ത ഷാരൂഖ് ഖാനെ ഹാര്‍ദിക് പാണ്ഡ്യ തിലക് വര്‍മയുടെ കൈകളില്‍ എത്തിച്ചു.

നന്നായി ബാറ്റ് വീശിയ സായ് സുദര്‍ശന്‍ പിന്നാലെ വിക്കറ്റിന് മുന്നില്‍ കുരുങ്ങി. 41 പന്തില്‍ രണ്ട് സിക്‌സറുകളും നാല് ബൗണ്ടറികളും സഹിതം 63 റണ്‍സെടുത്ത് ടോപ് സ്‌കോററായി. റൂഥര്‍ഫോര്‍ഡ് 11 പന്തില്‍ 18 റണ്‍സെടുത്തു.

മുംബൈക്ക് വേണ്ടി ഹാര്‍ദിക് രണ്ട് വിക്കറ്റും ട്രെന്റ് ബോള്‍ട്ട്, ചഹര്‍, മുജീബ്, സത്യനാരായണ രാജു എന്നിവര്‍ ഓരോ വിക്കറ്റ് വീതവും വീഴ്ത്തി.