ഹാർദിക്കും ഗില്ലും തമ്മിൽ എന്താണ് പ്രശ്നം, എലിമിനേറ്ററിൽ നടന്നത് ഇങ്ങനെ; ഈഗോ ക്ലാഷാണെന്ന് ആരാധകർ

Curated by: ഗോകുൽ എസ്|Samayam Malayalam•31 May 2025, 1:51 am

2025 സീസൺ ഇന്ത്യൻ പ്രീമിയർ ലീഗിന്റെ എലിമിനേറ്ററിൽ കിടിലൻ ജയമായിരുന്നു മുംബൈ ഇന്ത്യൻസ് നേടിയത്. ആവേശം അവസാന ഓവറിലേക്ക് നീണ്ട കളിയിൽ മുംബൈ‌ 20 റൺസിന് ടൈറ്റൻസിനെ വീഴ്ത്തുകയായിരുന്നു. മത്സരത്തിൽ ആദ്യം ബാറ്റ് ചെയ്ത മുംബൈ 228/5 എന്ന പടുകൂറ്റൻ സ്കോർ നേടിയപ്പോൾ, ഗുജറാത്തിന്റെ മറുപടി 208/6 ൽ അവസാനിച്ചു.അതേ സമയം ഗുജറാത്ത് ടൈറ്റൻസ് നായകൻ ശുഭ്മാൻ ഗില്ലും, മുംബൈ ഇന്ത്യൻസ് നായകൻ ഹാർദിക് പാണ്ഡ്യയും തമ്മിൽ ഈഗോ ക്ലാഷുണ്ടെന്നും എലിമിനേറ്ററിൽ ഇത് പലതവണ വ്യക്തമായെന്നുമാണ് ഇപ്പോൾ സമൂഹ മാധ്യമങ്ങളിൽ ക്രിക്കറ്റ് പ്രേമികൾ ചൂണ്ടിക്കാട്ടുന്നത്. നേരത്തെ മത്സരത്തിന്റെ ടോസ് സമയത്ത് ഇരു താരങ്ങളും തമ്മിൽ ഹസ്തദാനം നടത്തിയിരുന്നില്ലെന്നും ഇത് മനപൂർവമാണെന്നുമാണ് ക്രിക്കറ്റ് ലോകത്തിന്റെ കണ്ടെത്തൽ.


മത്സരത്തിൽ ടോസ് നേടിയ ഹാർദിക് പാണ്ഡ്യ ആദ്യം ബാറ്റ് ചെയ്യാൻ തീരുമാനിക്കുകയായിരുന്നു‌‌. എന്നാൽ ടോസ് നേടിയ ശേഷം സംസാരിക്കാൻ ഒരുങ്ങവെ ഹാർദിക്, ഗില്ലിന്‌ ഷേക്ക് ഹാൻഡ് നൽകാൻ ശ്രമിച്ചെങ്കിലും അത് ശ്രദ്ധിക്കാതെ ഗിൽ മാറുകയായിരുന്നു. പിന്നീട് കളിക്കിടെ ഗില്ലിനെ സ്ലെഡ്ജ് ചെയ്യുന്ന ഹാർദിക് പാണ്ഡ്യയെയും ക്രിക്കറ്റ് ലോകം കണ്ടു. ഗുജറാത്ത് ബാറ്റിങ്ങിന്റെ ആദ്യ ഓവറിലായിരുന്നു സംഭവം. സായ് സുദർശനും ഗില്ലും സംസാരിച്ചുനിൽക്കവെയായിരുന്നു ഹാർദിക്കിന്റെ കലിപ്പ്. ഇതെല്ലാം ഇരുവരും തമ്മിൽ ഈഗോ പ്രശ്നങ്ങളുണ്ടെന്ന് വ്യക്തമാക്കുന്നതായി ആരാധകർ ചൂണ്ടിക്കാട്ടുന്നു.

Also Read: തകർപ്പൻ പോരാട്ടത്തിൽ രണ്ടാം ക്വാളിഫയർ മത്സരത്തിലേക്ക് എൻട്രി ലഭിച്ച് മുംബൈ ഇന്ത്യൻസ്

അതേ സമയം ക്രിക്കറ്റ് പ്രേമികളെ ശരിക്കും ത്രസിപ്പിച്ച പോരാട്ടമായിരുന്നു ഇന്നലെ എലിമിനേറ്ററിൽ കണ്ടത്. മത്സരത്തിൽ ആദ്യം ബാറ്റ് ചെയ്ത മുംബൈ ഇന്ത്യൻസ് കിടിലൻ ബാറ്റിങ് വിരുന്നാണ് കാഴ്ചവെച്ചത്. രോഹിത് ശർമ ( 81 ), ജോണി ബെയർസ്റ്റോ ( 47 ), സൂര്യകുമാർ യാദവ് ( 33 ), തിലക് വർമ ( 25 ), ഹാർദിക് പാണ്ഡ്യ ( 22 ) എന്നിവർ തിളങ്ങിയതോടെ മുംബൈ 20 ഓവറിൽ 228/5 എന്ന കൂറ്റൻ സ്കോറിലെത്തി.

Also Read: ഐപിഎൽ 2025 എലിമിനേറ്റർ മത്സരത്തിൽ ചരിത്രം കുറിച്ച് രോഹിത് ശർമ

പടുകൂറ്റൻ വിജയലക്ഷ്യം പിന്തുടർന്ന ഗുജറാത്ത് ടൈറ്റൻസ് ശക്തമായ പോരാട്ടം കാഴ്ച വെച്ചെങ്കിലും അവരുടെ സ്കോർ 208/6 ൽ അവസാനിക്കുകയായിരുന്നു. 49 പന്തിൽ 80 റൺസെടുത്ത സായ് സുദർശനായിരുന്നു ടൈറ്റൻസിന്റെ ടോപ് സ്കോറർ. 24 പന്തിൽ 48 റൺസെടുത്ത വാഷിങ്ടൺ സുന്ദറും ഗുജറാത്ത് ബാറ്റിങ്ങിൽ തിളങ്ങി.