27 കോടി വെറുതെയായോ? പന്തിന് സംഭവിച്ചത് ഇതോ; പ്രതീക്ഷകൾ തകർത്ത് സൂപ്പർ താരം

Edited byജിബിൻ ജോർജ് | Samayam Malayalam | Updated: 4 May 2025, 5:19 pm

ലഖ്നൗ: 27 കോടിയെന്ന റെക്കോഡ് തുകയ്ക്ക് ലഖ്‌നൗ സൂപ്പര്‍ ജയന്റ്‌സിൽ എത്തിയ ഋഷഭ് പന്ത് നിരാശപ്പെടുത്തുന്നത് തുടരുന്നു. പതിനെട്ടാം ഐപിഎൽ സീസണിലെ ഏറ്റവും വിലകൂടിയ താരത്തെ സഞ്ജീവ് ഗോയങ്കയുടെ ലഖ്‌നൗ സ്വന്തമാക്കിയത് ഏറെ പ്രതീക്ഷയോടെയായിരുന്നു. മികച്ച വിക്കറ്റ് കീപ്പര്‍, ഏത് പൊസിഷനിലും ഇറക്കാവുന്ന ബാറ്റർ, വലിയ സ്കോറുകൾ കുറിക്കാനുള്ള ശേഷി, ഫിനിഷിലെ ഒന്നാന്തരം ഒരു ഓപ്ഷന്‍ എന്നിങ്ങനെയുള്ള പ്രതീക്ഷകളാണ് ടീം മാനേജ്മെൻ്റിന് ഉണ്ടായിരുന്നത്. എന്നാൽ ഈ കണക്കുകൂട്ടലുകൾ തെറ്റിക്കുകയാണ് പന്ത്. ലോക ക്രിക്കറ്റ് ചരിത്രത്തിൽ ഇതാദ്യം; രോഹിത് ശർമയ്ക്കും ക്രിസ് ഗെയ്ലിനും മുകളിൽ വിരാട് കോഹ്ലി; ഐപിഎല്ലിൽ വീണ്ടും റെക്കോഡ് നേട്ടം
പത്ത് മത്സരങ്ങളിൽ നിന്ന് 98.21 സ്ട്രൈക്ക് റേറ്റിൽ 110 റൺസ് മാത്രമാണ് പന്ത് ഇതുവരെ നേടിയത്. ചെന്നൈ സൂപ്പർ കിങ്സിനെതിരെ നേടിയ 63 റൺസാണ് ഉയർന്ന സ്കോർ. 12.22 ശരാശരിയിൽ ബാറ്റ് വീശുന്ന പന്ത് ഇതുവരെ നേടിയ ബൗണ്ടറികളുടെ എണ്ണം പരിശോധിച്ചാലും രസകരമാണ്. താരം ഈ സീസണിൽ നേടിയത് വെറും അഞ്ച് സിക്സറുകളും ഒൻപത് ഫോറുകളുമാണ്. വിക്കറ്റിന് പിന്നിൽ നാല് ക്യാച്ചുകളും ഒരു സ്റ്റമ്പിങും ഉൾപ്പെടുന്നുണ്ട്.

സ്റ്റാർ പേസർ കാഗിസോ റബാദക്ക് ക്രിക്കറ്റിൽ നിന്ന് വിലക്ക്, ഐപിഎല്ലിൽ ഇത്തവണ കളിക്കില്ല; കാരണം ഇങ്ങനെ
കഴിഞ്ഞ സീസണിൽ ഡൽഹി ക്യാപിറ്റൽസിനായി 155.40 സ്ട്രൈക് റേറ്റിൽ 13 മത്സരങ്ങളിൽ നിന്ന് 443 റൺസ് അടിച്ചുകൂട്ടിയ പന്ത് 25 സിക്സറുകളും 36 ഫോറുകളുമാണ് സ്വന്തമാക്കിയത്. ഒരു വർഷത്തിനിപ്പുറം ലഖ്നൗവിൽ എത്തിയ പന്ത് മോശം ഫോമിൽ തുടരുകയാണ്. ഐപിഎൽ പോയിൻ്റ് ടേബിളിൽ ആറാം സ്ഥാനത്താണ് ലഖ്നൗവുള്ളത്.

ഇത്തവണ പന്തിന് തൊട്ടതെല്ലാം പിഴയ്ക്കുകയാണ്. മിച്ചൽ മാർഷ്, ഐഡൻ മാർക്രം, നിക്കോളാസ് പൂരൻ, ഡേവിഡ് മില്ലർ തുടങ്ങിയ പവർ ഹിറ്റർമാരുടെ ഇടയിൽ ഒന്നുമല്ലാതായിപ്പോകുന്ന കാഴ്ചയാണ് കാണാനാകുന്നത്. ബാറ്റിങ്ങിൽ പരാജയമായതോടെ കൃത്യമായ ഒരു ബാറ്റിങ് ഓർഡറിൽ പോലും ഇറങ്ങാൻ താരത്തിനാകുന്നുമില്ല. സാധാരണ നാലാമത് ഇറങ്ങാറുള്ള പന്ത് ഡല്‍ഹിക്കെതിരായ ഒരു മത്സരത്തില്‍ ഏഴാമതാണ് ബാറ്റിങ്ങിനെത്തിയത്. ഗുജറാത്ത് ടൈറ്റൻസിനെതിരെയുള്ള മത്സരത്തിൽ ഓപ്പണറായി ക്രീസിൽ എത്തുകയും ചെയ്തു. നേരത്തെ ഇറങ്ങുന്ന മത്സരങ്ങളിലാകട്ടെ അനാവശ്യ ഷോട്ടിന് മുതിർന്ന് കൂടാരം കയറുകയും ചെയ്യും. ഷോട്ട് സെലക്ഷനിലും വൻ പഴികൾ പന്ത് ഏറ്റുവാങ്ങുന്നുണ്ട്. ഡല്‍ഹിക്കെതിരായ മത്സരത്തിൽ റിവേഴ്സ് സ്‌കൂപ്പിന് ശ്രമിച്ച് ദയനീയമായി പുറത്താകുകയായിരുന്നു.

ആദ്യം സെഞ്ചുറി നേടി ഞെട്ടിച്ചു, ഇന്ന് പന്തെറിഞ്ഞ് സ്റ്റമ്പ് തകർത്തും; രാജസ്ഥാൻ താരം വൈഭവ് സൂര്യവംശിയുടെ ബൗളിങ് വീഡിയോ വൈറൽ
പന്തിൻ്റെ ദയനീയ പ്രകടനത്തിന് പ്രധാന കാരണം സ്ഥിരം ബാറ്റിങ് പൊസിഷൻ കണ്ടെത്താനാകാതെ പോകുന്നതും മോശം ഷോട്ട് സെലക്ഷനുമാണ്. മധ്യനിരയിൽ പല ബാറ്റിങ് ഓർഡറിലും താരം ഇറങ്ങി. മിച്ചൽ മാർഷ്, നിക്കോളാസ് പൂരൻ, ഐഡൻ മാർക്രം എന്നിവരെ മാറ്റേണ്ട ആവശ്യമില്ലാത്തതിനാൽ നാലാം നമ്പർ പന്തിന് അനുയോജ്യമാണെന്ന് വീരേന്ദർ സെവാഗ് അഭിപ്രായപ്പെടുന്നുണ്ട്. ഫോമിലുള്ള ബാറ്റർമാരെ അദ്ദേഹം വിശ്വസിക്കുന്നുണ്ട്, അതിനാലാണ് പലപ്പോഴും ബാറ്റിങ് ഓർഡറിൽ പന്ത് താഴേക്ക് ഇറങ്ങുന്നതെന്ന് സെവാഗ് വ്യക്തമാക്കിയിരുന്നു.