CSK vs GT IPL 2026: ക്ഷമ കാട്ടിയില്ല, നിർണ്ണായക മത്സരത്തിൽ സഞ്ജു ​ഗോൾ‍‍ഡൻ ഡക്ക്; സിറാജിന്റെ ആദ്യ പന്തിൽ മടക്കം, ആഘോഷിച്ച് ​ഗിൽ

ഇന്ത്യൻ പ്രീമിയർ ലീഗിന്റെ 2026 സീസണിൽ പ്ലേ ഓഫ് പ്രതീക്ഷ നിലനിർത്താൻ സിഎസ്കെയ്ക്ക് ജയം നിർണ്ണായകമായ മത്സരത്തിൽ സഞ്ജു സാംസൺ ഗോൾഡൻ ഡക്ക്. ഗുജറാത്ത് ടെെറ്റൻസ് മുന്നോട്ടുവെച്ച 230 റൺസ് വിജയലക്ഷ്യം പിന്തുടർന്നിറങ്ങിയ സിഎസ്കെ വലിയ പ്രതീക്ഷയായിരുന്നു സഞ്ജു സാംസണിൽവെച്ചത്. എന്നാൽ ആദ്യ പന്തിൽത്തന്നെ ഷോട്ടിന് ശ്രമിച്ച സഞ്ജുവിന് പിഴച്ചു. എഡ്ജായ പന്ത് വിക്കറ്റ് കീപ്പർ ജോസ് ബട്ലറിന്റെ കെെയിലെത്തിയതോടെ ആദ്യ പന്തിൽത്തന്നെ സഞ്ജുവിന് മടങ്ങേണ്ടി വന്നു.ഗുജറാത്ത് ബാറ്റിങ്ങിനിടെ വിക്കറ്റ് കീപ്പറായ സഞ്ജു സാംസണിന്റെ കെെവിരലിന് പരിക്കേറ്റിരുന്നു. ഇതിന് പിന്നാലെ സഞ്ജു സാംസൺ മെെതാനത്ത് നിന്ന് കയറിയിരുന്നു. പിന്നീട് ബാറ്റിങ്ങിനിറങ്ങിയപ്പോൾ ആദ്യ പന്തിൽത്തന്നെ പുറത്താകാനായിരുന്നു വിധി. നിർണ്ണായക മത്സരത്തിൽ സഞ്ജു വലിയ സ്കോർ നേടി മുന്നിൽ നിന്ന് നയിക്കുമെന്നാണ് എല്ലാവരും പ്രതീക്ഷിച്ചിരുന്നത്. എന്നാൽ അതുണ്ടായില്ല. സഞ്ജുവിന്റെ വിക്കറ്റ് നേട്ടം ശുഭ്മാൻ ഗില്ലും സംഘവും വലിയ ആഘോഷമാക്കുകയും ചെയ്തു.

ഫോമിലല്ലാതിരുന്ന ക്യാപ്റ്റൻ റുതുരാജിനെ ഓപ്പണിങ്ങിൽ നിന്ന് മാറ്റി പകരം മാത്യു ഷോർട്ടുമായാണ് സിഎസ്കെ ഇറങ്ങിയത്. എന്നാൽ സഞ്ജു ആദ്യ പന്തിൽ മടങ്ങിയതോടെ രണ്ടാം പന്തിൽത്തന്നെ റുതുരാജിന് ക്രീസിലേക്കെത്തേണ്ടി വന്നു. ആദ്യ പന്തിൽ പുറത്തായതോടെ ആഗ്രഹിക്കാത്ത റെക്കോഡിലേക്ക് സഞ്ജുവിന് പേര് ചേർക്കേണ്ടി വന്നു. റൺ ചേസിൽ ആദ്യ പന്തിൽ പുറത്താകുന്ന മൂന്നാമത്തെ താരമായാണ് സഞ്ജു മാറിയിരിക്കുന്നത്.

2009ൽ പാർഥിവ് പട്ടേലും 2022ലും 2024ലും റുതുരാജ് ഗെയ്ക് വാദും ആദ്യ പന്തിൽ മടങ്ങിയിരുന്നു. ഇപ്പോഴിതാ ഈ നാണക്കേടിലേക്ക് സഞ്ജുവിനും പേര് ചേർക്കേണ്ടി വന്നിരിക്കുകയാണ്. സഞ്ജു സാംസണെ ഇന്ത്യ ടി20യിൽ നായകനാക്കാനൊരുങ്ങുകയാണ്. സിഎസ്കെയുടെ നായകസ്ഥാനത്തേക്കും സഞ്ജുവിനെ പരിഗണിക്കുന്നുണ്ടെന്ന റിപ്പോർട്ടുകളുമുണ്ടായിരുന്നു.
Rohit Sharma: രോഹിത് ഏകദിന ലോകകപ്പ് കളിക്കില്ലേ? ബിസിസിഐക്ക് അതൃപ്തി; പകരം ഓപ്പണറെ തേടിയേക്കും, സഞ്ജുവിനെ പരി​ഗണിക്കുമോ?
ഇതിനിടെയാണ് ഇപ്പോൾ ഇത്തരമൊരു തിരിച്ചടി സഞ്ജുവിന് നേരിടേണ്ടി വന്നിരിക്കുന്നത്. കെെവിരലിനേറ്റ പരിക്ക് സഞ്ജുവിനെ ബാധിച്ചിട്ടുണ്ടെന്ന് നിസംശയം പറയാം. എന്തായാലും സിഎസ്കെയുടെ വിജയപ്രതീക്ഷകളെ തകർക്കുന്ന പ്രകടനമാണ് സഞ്ജു കാഴ്ചവെച്ചതെന്ന് പറയാം. സഞ്ജുവിന്റെ നിരാശപ്പെടുത്തുന്ന പുറത്താകൽ സിഎസ്കെയുടെ ടോപ് ഓഡറിനേയും കാര്യമായി ബാധിച്ചു.

സഞ്ജു ഈ സീസണിൽ രണ്ട് സെഞ്ചുറി പ്രകടനങ്ങളടക്കം നടത്തിയെങ്കിലും സ്ഥിരത കാട്ടാൻ മലയാളി താരത്തിന് സാധിക്കുന്നില്ലെന്നതാണ് നിരാശപ്പെടുത്തുന്ന കാര്യം. 14 മത്സരത്തിൽ നിന്ന് 477 റൺസോടെയാണ് സഞ്ജു ഈ സീസൺ അവസാനിപ്പിക്കുന്നത്. 47.70 ശരാശരിയിലും 166.20 സ്ട്രെെക്ക് റേറ്റിലും കളിക്കുന്ന സഞ്ജു രണ്ട് സെഞ്ചുറിയും ഒരു അർധ സെഞ്ചുറിയുമാണ് നേടിയത്.
IPL 2026: 5 മത്സരം ബാക്കി, നാലാം സ്ഥാനത്ത് ആരെത്തും? മുൻതൂക്കം രാജസ്ഥാന്; പ്രതീക്ഷയോടെ പഞ്ചാബും കെകെആറും സിഎസ്കെയും
ഈ സീസണിൽ 500 റൺസ് ക്ലബ്ബിലേക്കെത്താൻ സഞ്ജുവിന് സാധിക്കാതെ പോയി എന്നതാണ് എടുത്തു പറയേണ്ടത്. ഇതോടെ കരിയറിൽ ഒരു ഐപിഎൽ സീസണിൽ മാത്രമാണ് സഞ്ജുവിന് 500 റൺസ് ക്ലബ്ബിലേക്കെത്താൻ സാധിച്ചിട്ടുള്ളത്. സഞ്ജുവിന് പിന്നാലെ റുതുരാജ് ഗെയ്ക് വാദ് ചെറിയ കാമിയോ കാഴ്ചവെച്ച് മടങ്ങി. ഏഴ് പന്തിൽ 16 റൺസാണ് റുതുരാജിന് നേടാനായത്. ഉർവിൽ പട്ടേൽ രണ്ട് പന്ത് നേരിട്ട് ഡക്കിനും പുറത്തായി. മുഹമ്മദ് സിറാജാണ് മൂന്ന് പേരേയും പുറത്താക്കിയത്.