IPL 2026: 115*, 87*, ഡൽഹിയെ 'വേട്ടയാടി' സഞ്ജു സാംസൺ, ചരിത്രത്തിൽ മറ്റാർക്കുമില്ലാത്ത റെക്കോഡ്; വിക്കറ്റ് കീപ്പർമാരിൽ അപൂർവ്വ നേട്ടം‌

ഇന്ത്യൻ പ്രീമിയർ ലീഗിന്റെ 2026 സീസണിൽ പ്ലേ ഓഫ് പ്രതീക്ഷ സജീവമാക്കി ചെന്നെെ സൂപ്പർ കിങ്സ് മുന്നോട്ട് പോവുകയാണ്. അവസാന മത്സരത്തിൽ ഡൽഹി ക്യാപിറ്റൽസിനെ എട്ട് വിക്കറ്റിനാണ് സിഎസ്കെ തോൽപ്പിച്ചത്. സ്വന്തം തട്ടകത്തിൽ ആദ്യം ബാറ്റ് ചെയ്ത ഡൽഹി ക്യാപിറ്റൽസ് എഴ് വിക്കറ്റിന് 155 റൺസാണ് നേടിയത്. റൺസ് കണ്ടെത്താൻ പ്രയാസമുള്ള പിച്ചിൽ സിഎസ്കെ പതറുമെന്നാണ് എല്ലാവരും കരുതിയതെങ്കിലും സഞ്ജു സാംസൺ ഒറ്റയാനെപ്പോലെ പടപൊരുതി. പുറത്താവാതെ 87 റൺസുമായി സഞ്ജു നടത്തിയ ചെറുത്തുനിൽപ്പ് ഇപ്പോൾ നിരവധി റെക്കോഡിലേക്കാണ് അദ്ദേഹത്തെ എത്തിച്ചിരിക്കുന്നത്. സീസണിൽ ആദ്യം ഏറ്റമുട്ടിയപ്പോൾ ഡൽഹിക്കെതിരേ പുറത്താവാതെ 115 റൺസ് നേടാനും സഞ്ജുവിന് സാധിച്ചിരുന്നു. ഇതോടെ 19 വർഷത്തെ ഐപിഎൽ ചരിത്രത്തിൽ ഡൽഹിക്കെതിരേ രണ്ട് മത്സരത്തിൽ നിന്ന് 200ലധികം റൺസ് നേടുന്ന ആദ്യത്തെ താരമായി സഞ്ജു സാംസൺ മാറിയിരിക്കുകയാണ്.

202 റൺസാണ് രണ്ട് മത്സരത്തിൽ നിന്ന് സഞ്ജു നേടിയത്. 2020ൽ മുംബെെ ഇന്ത്യൻസിനൊപ്പം ഇഷാൻ കിഷൻ നേടിയ റെക്കോഡിനെയാണ് സഞ്ജു മറികടന്നിരിക്കുന്നത്. വിക്കറ്റ് കീപ്പർ എന്ന നിലയിലും ചരിത്ര നേട്ടത്തിലേക്കെത്താൻ സഞ്ജുവിന് സാധിച്ചു.

ഒരു സീസണിൽ ഒരു എതിരാളിക്കെതിരേ കൂടുതൽ റൺസ് നേടുന്ന വിക്കറ്റ് കീപ്പർ എന്ന റെക്കോഡ് ഇനി സഞ്ജുവിനൊപ്പമാണ്. ഡൽഹിക്കെതിരായ പ്രകടനത്തോടെയാണ് സഞ്ജു ഈ റെക്കോഡിലേക്കെത്തിയത്. 2019ൽ ആർസിബിക്കെതിരേ കെ എൽ രാഹുൽ നേടിയ 193 റൺസിന്റെ റെക്കോഡാണ് ഇപ്പോൾ തകർക്കപ്പെട്ടിരിക്കുന്നത്. നമാൻ ഓജ സിഎസ്കെയ്ക്കെതിരേ 174 റൺസും നേടിയിട്ടുണ്ട്.
IPL 2026: ടി20യിൽ കിടിലൻ കളി, പക്ഷെ വെെഭവിന് ബഹുമാനം കിട്ടില്ല, അതിന് ഒരു കാര്യം തെളിയിക്കണം; സഞ്ജയ് മഞ്ജരേക്കർ പറയുന്നു
സഞ്ജു സാംസൺ വീണ്ടും ഉത്തരവാദിത്തം ഏറ്റെടുത്ത് കളിക്കുന്നതാണ് കാണാനായത്. ഈ സീസണിൽ ഇത് മൂന്നാം തവണയാണ് സഞ്ജു കളിയിലെ താരമാകുന്നത്. സിഎസ്കെ ഈ സീസണിൽ അഞ്ച് മത്സരങ്ങൾ ജയിച്ചപ്പോൾ നാലിലും ബാറ്റിങ് മികവ് കാട്ടി സഞ്ജു കെെയടി നേടിയിരുന്നു. സിഎസ്കെയിലെ എംഎസ് ധോണിയുടെ വിടവ് നികത്തുന്ന പ്രകടനമാണ് ഇപ്പോൾ സഞ്ജു കാഴ്ചവെക്കുന്നതെന്ന് പറയാം. ക്ഷമയോടെ നിന്ന് ടീമിനെ ജയിപ്പിക്കാൻ സഞ്ജുവിന് സാധിക്കുന്നു.

ഡൽഹിക്കെതിരേ പ്രയാസമുള്ള സാഹചര്യത്തിലും സഞ്ജുവിന്റെ മികവ് സിഎസ്കെയെ രക്ഷിക്കുകയായിരുന്നു. ക്യാപ്റ്റൻ റുതുരാജ് ഗെയ്ക് വാദും (13 പന്തിൽ 6), ഉർവിൽ പട്ടേലും (9 പന്തിൽ 17) കാര്യമായൊന്നും ചെയ്യാതെ മടങ്ങിയപ്പോഴും സഞ്ജു കാർത്തിക് ശർമയെ കൂട്ടുപിടിച്ച് പൊരുതി. 52 പന്തിൽ 7 ഫോറും ആറ് സിക്സും ഉൾപ്പെടെ 87 റൺസോടെയാണ് സഞ്ജു പുറത്താവാതെ നിന്നത്.

IPL 2026: 13 പന്തിൽ 13, അവസരം മുതലാക്കാതെ കരുൺ നായർ; സിഎസ്കെയ്ക്കെതിരേ ഫ്ളോപ്പ്, സ്പിൻ കെണിയിൽ വീണു

167.31 സ്ട്രെെക്ക് റേറ്റിലുള്ള പക്വതയോടെയുള്ള പ്രകടനമായിരുന്നു ഇത്. കാർത്തിക് ശർമ 31 പന്തിൽ നാല് ഫോറും രണ്ട് സിക്സും ഉൾപ്പെടെ 41 റൺസോടെയും പുറത്താവാതെ നിന്നു. ഇതോടെ 17.3 ഓവറിൽ രണ്ട് വിക്കറ്റ് മാത്രം നഷ്ടത്തിൽ സിഎസ്കെ വിജയം നേടി. 10 മത്സരങ്ങളിൽ നിന്ന് 10 പോയിന്റുകളോടെ നിലവിൽ ആറാം സ്ഥാനത്താണ് സിഎസ്കെ.