IPL 2026: 20 ഓവർ ബാറ്റ് ചെയ്ത ജിടി നേടിയത് 3 സിക്സ്, 4 ഓവറിൽ 4 സിക്സുമായി പഞ്ചാബ്; ​ഗില്ലിന്റെ ടീമിനെ ടെസ്റ്റ് കളിപ്പിക്കൂവെന്ന് ആരാധകർ

ഇന്ത്യൻ പ്രീമിയർ ലീഗിന്റെ 2026 സീസണിലെ നാലാം മത്സരത്തിൽ പഞ്ചാബ് കിങ്സിന് മുന്നിൽ‌ 163 റൺസ് വിജയലക്ഷ്യം നൽകിയിരിക്കുകയാണ് ഗുജറാത്ത് ടെെറ്റൻസ്. ടോസ് നഷ്ടപ്പെട്ട് ആദ്യം ബാറ്റ് ചെയ്യേണ്ടി വന്ന ഗുജറാത്തിന് പ്രതീക്ഷക്കൊത്ത പ്രകടനം നടത്താനായില്ല. 20 ഓവർ ബാറ്റ് ചെയ്ത് 6 വിക്കറ്റിന് 162 റൺസെടുത്ത ഗുജറാത്ത് നിരയിൽ ആർക്കും വലിയൊരു വെടിക്കെട്ട് നടത്താൻ സാധിച്ചില്ല. 20 ഓവർ ബാറ്റ് ചെയ്ത ടീം ആകെ നേടിയത് വെറും മൂന്ന് സിക്സുകളാണ്. ജോസ് ബട്ലർ രണ്ട് സിക്സർ നേടിയപ്പോൾ ഗ്ലെൻ ഫിലിപ്സ് ഒരു സിക്സും നേടി. എന്നാൽ ആദ്യത്തെ നാല് ഓവറിലൂടെത്തന്നെ പഞ്ചാബ് സൂപ്പർ കിങ്സ് നാല് സിക്സുകൾ നേടി. ഗുജറാത്ത് ടെെറ്റൻസ് 20 ഓവറുകളിൽ മൂന്ന് സിക്സർ ആകെ നേടിയപ്പോൾ പഞ്ചാബ് നാല് ഓവറിൽ നാല് സിക്സർ നേടിയതിന് പിന്നാലെ ശുഭ്മാൻ ഗിൽ ക്യാപ്റ്റനായുള്ള ഗുജറാത്ത് ടെെറ്റൻസിനെ ട്രോളുകയാണ് ആരാധകർ.

ഗുജറാത്ത് ടെെറ്റൻസിനെ ടെസ്റ്റ് കളിപ്പിക്കാൻ വിടണമെന്നാണ് ആരാധകർ പറയുന്നത്. ശുഭ്മാൻ ഗില്ലിനെ ഇന്ത്യ ടി20 ലോകകപ്പ് ടീമിൽ നിന്ന് തഴഞ്ഞക് ശരിയായ തീരുമാനം ആണെന്നാണ് ആരാധകർ പ്രതികരിക്കുന്നത്. 27 പന്തിൽ 39 റൺസെടുത്ത ശുഭ്മാൻ ഗില്ലാണ് ഗുജറാത്തിന്റെ ടോപ് സ്കോറർ. ആറ് ഫോർ നേടിയ ഗില്ലിന്റെ സ്ട്രെെക്ക് റേറ്റ് 144.44 ആയിരുന്നു. ജോസ് ബട്ലർ 33 പന്തിൽ 38 റൺസെടുത്തു.

3 ഫോറും 2 സിക്സും ഉൾപ്പെടെ 115.15 സ്ട്രെെക്ക് റേറ്റിലാണ് ബട്ലർ കളിച്ചത്. ഗ്ലെൻ ഫിലിപ്സ് വെടിക്കെട്ട് ബാറ്റ്സ്മാനാണെങ്കിലും 17 പന്തിൽ‌ 25 റൺസാണ് നേടാനായത്. വാഷിങ്ടൺ സുന്ദർ 16 പന്തിൽ 18 റൺസും നേടി. സായ് സുദർശൻ 11 പന്തിൽ 13 റൺസാണ് നേടിയത്. 150 സ്ട്രെെക്ക് റേറ്റിൽ കളിക്കാൻ ഗുജറാത്തിന്റെ ഒരു താരത്തിനും സാധിച്ചില്ലെന്നതാണ് എടുത്തു പറയേണ്ടത്.
IPL 2026: വെെഭവ് ഷോ, 15 പന്തിൽ ഫിഫ്റ്റി; സിഎസ്കെയെ അടിച്ചൊതുക്കി 15കാരൻ, ഇന്ത്യൻ‌ സെലക്ടർമാർ കാണുന്നുണ്ടോ?
യുവതാരങ്ങളെല്ലാം വെടിക്കെട്ട് ബാറ്റിങ് പ്രകടനത്തോടെ മറ്റ് ടീമുകൾക്കൊപ്പം കെെയടി നേടവെയാണ് ഗുജറാത്ത് താരങ്ങൾ ഇത്തരമൊരു നിരാശപ്പെടുത്തുന്ന പ്രകടനം നടത്തിയത്. ആദ്യത്തെ മൂന്ന് മത്സരത്തിലും മികച്ച ബാറ്റിങ് പ്രകടനങ്ങൾ കാണാൻ ആരാധകർക്ക് സാധിച്ചു. എന്നാൽ ഗുജറാത്തിന്റെ ബാറ്റിങ് ടെസ്റ്റിനെ അനുസ്മരിപ്പിക്കുന്നതാണെന്നാണ് ആരാധകർ പറയുന്നത്.

ഇന്ത്യയുടെ ടി20 ടീമിലേക്ക് മടങ്ങിയെത്താമെന്നത് ഇനി ശുഭ്മാൻ ഗില്ലിന്റെ സ്വപ്നം മാത്രമായിരിക്കുമെന്നും ആരാധകർ ട്രോളുന്നു. ഗുജറാത്തിന്റെ ജോസ് ബട്ലറിന്റെ ടി20 കരിയർ ഏറെക്കുറെ അവസാനിച്ചുവെന്ന് തന്നെ പറയാം. അവസാന 15 ടി20 ഇന്നിങ്സിൽ നിന്ന് 232 റൺസാണ് ബട്ലർ ആകെ നേടിയത്. 115.42 മാത്രമാണ് ബട്ലറുടെ പ്രഹര ശേഷി. ഈ താരങ്ങളെയെല്ലാം ഉപയോഗിച്ച് എങ്ങനെയാണ് ഗുജറാത്ത് മുന്നോട്ട് പോവുകയെന്നാണ് ആരാധകർ ചോദിക്കുന്നത്.

IPL 2026: സിഎസ്കെയിലെത്തി, സഞ്ജുവിനെ ആ ഭാഗ്യം കെെവിട്ടു; ആറ് വർഷത്തിന് ശേഷം എലെെറ്റ് ക്ലബ്ബിൽ നിന്ന് പുറത്ത്, ടീമും തകർന്നടിഞ്ഞു

എന്തായാലും ഇത്തവണത്തെ സീസണിൽ ഗുജറാത്തിന് പ്ലേ ഓഫിലെങ്കിലും എത്താൻ സാധിക്കാതെ പോയാൽ വലിയ വിമർശനം താരത്തിന് നേരിടേണ്ടി വരും. ക്യാപ്റ്റൻ സ്ഥാനം പോകാനും സാധ്യത കൂടുതലാണെന്ന് പറയാം. അതുകൊണ്ടുതന്നെ ഇനിയുള്ള മത്സരങ്ങൾ ഗില്ലിനെ സംബന്ധിച്ച് വളരെ പ്രധാനപ്പെട്ടതാണെന്ന് നിസംശയം വിലയിരുത്താം.