IPL 2026: 'അവര്‍ക്ക് നല്ലൊരു ഇന്റര്‍നെറ്റ് കണക്ഷന്‍ മതി'- ലേലത്തിന് പണമില്ലെങ്കിലും ഈ ടീം എല്ലാം നേടിയെന്ന് മുന്‍ ഇന്ത്യന്‍ ഓപണര്‍

Authored by: നിഷാദ് അമീന്‍|Samayam Malayalam•18 Nov 2025, 5:56 pm

ഐപിഎല്‍ 2026 മിനി താര ലേലം 2025 ഡിസംബര്‍ 16ന് അബുദാബിയില്‍ നടക്കും. അടുത്ത സീസണില്‍ 10 ഫ്രാഞ്ചൈസികളും നിലനിര്‍ത്തുന്ന കളിക്കാരുടെയും ലേലത്തിന് അയക്കുന്ന താരങ്ങളുടെയും പട്ടിക പ്രസിദ്ധപ്പെടുത്തി. നവംബര്‍ 15നാണ് റിട്ടന്‍ഷന്‍ പട്ടിക പുറത്തുവന്നത്. നിലവിലുള്ള ടീം അംഗങ്ങള്‍ക്ക് പുറമേ പുതിയ സീസണിലേക്ക് ആവശ്യമായ കളിക്കാരെ കണ്ടെത്തുന്നതിനാണ് താര ലേലം. 10 ടീമുകള്‍ക്കും ശേഷിക്കുന്ന പണത്തിന്റെ പൂര്‍ണ പട്ടികയും പുറത്തുവന്നു. 64.30 കോടി രൂപ കൈവശമുള്ള കൊല്‍ക്കത്ത നൈറ്റ് റൈഡേഴ്സിനാണ് ഏറ്റവും കൂടുതല്‍ തുക വിനിയോഗിക്കാനാവുക. ചെന്നൈ സൂപ്പര്‍ കിങ്സ് 43.40 കോടി രൂപയുമായി രണ്ടാം സ്ഥാനത്താണ്.


ലേലത്തിന് ഏറ്റവും കുറവ് പണമുള്ള ടീം മുംബൈ ഇന്ത്യന്‍സാണ്. 2.75 കോടി രൂപ മാത്രമാണ് ശേഷിക്കുന്നത്. എന്നാല്‍, എംഐക്ക് ആവശ്യമായ താരങ്ങള്‍ ഇപ്പോള്‍ തന്നെ അവരുടെ പക്കല്‍ ഉണ്ടെന്ന് മുന്‍ ഇന്ത്യന്‍ ഓപണറും കമന്റേറ്ററുമായ ആകാശ് ചോപ്ര അഭിപ്രായപ്പെട്ടു. വിശ്രമിക്കാന്‍ വേണ്ടിയാണ് എംഐ ലേലത്തില്‍ പങ്കെടുക്കുന്നതെന്ന് അദ്ദേഹം തമാശയായി തന്റെ യൂട്യൂബ് ചാനലില്‍ വിശദീകരിച്ചു.

IPL 2026: സിഎസ്‌കെ ഇനി ആ താരത്തെ കൂടി വാങ്ങണം; ലേലത്തിന് മുമ്പ് വമ്പന്‍ നിര്‍ദേശവുമായി മുന്‍ ഇന്ത്യന്‍ താരം
ലേലത്തില്‍ എംഐക്ക് നല്ലൊരു ഇന്റര്‍നെറ്റ് കണക്ഷന്‍ ആവശ്യമായി വരുമെന്ന് ചോപ്ര പറഞ്ഞു. 'മുംബൈക്ക് എന്താണ് വേണ്ടത്? ഒന്നാമതായി, അവരുടെ കൈവശം അധികം പണമില്ല. ലേല ദിവസം അവര്‍ക്ക് നല്ലൊരു ഇന്റര്‍നെറ്റ് കണക്ഷന്‍ ആവശ്യമായി വരുമെന്ന് എനിക്ക് തോന്നുന്നു. അവര്‍ക്ക് ഒരു നല്ല പ്ലേ ലിസ്റ്റ് ആവശ്യമാണ്. നിങ്ങള്‍ക്ക് സുഹൃത്തുക്കളുമായി ഒരു നല്ല ഗ്രൂപ്പ് ഉണ്ടാക്കാം, അവിടെ നിങ്ങള്‍ക്ക് ചാറ്റ് ചെയ്യാം'- അദ്ദേഹം പറഞ്ഞു.

FIFA World Cup 2026: ജര്‍മനിയും ഹോളണ്ടും ലോകകപ്പിന്... ഇനി 14 രാജ്യങ്ങള്‍; യോഗ്യത നേടിയ രാജ്യങ്ങളുടെ സമ്പൂര്‍ണ പട്ടിക
എംഐക്ക് തലപുണ്ണാക്കാതെ വിശ്രമിച്ച് മറ്റ് ഫ്രാഞ്ചൈസികള്‍ കളിക്കാരെ വാങ്ങുന്നത് നോക്കി നില്‍ക്കാം. ഇന്‍സ്റ്റാഗ്രാമില്‍ കുറച്ച് റീലുകള്‍ പരിശോധിക്കാം. നല്ല കാപ്പി, നല്ല വെള്ളം, നല്ല ഭക്ഷണം.. ഈ മൂന്നോ നാലോ കാര്യങ്ങള്‍ മാത്രമേ ആവശ്യമുള്ളൂ. ഒരു കാല്‍ മറ്റൊന്നിനു മുകളില്‍ വയ്ക്കുക, മറ്റുള്ളവരെയെല്ലാം കാണുക. കാരണം മുംബൈക്ക് ഒന്നും ആവശ്യമില്ല. മുംബൈ തയ്യാറാണ്- അദ്ദേഹം പറഞ്ഞു.

ലേലത്തിന് ടീമുകളുടെ കൈവശമുള്ള പണം

1. കൊല്‍ക്കത്ത നൈറ്റ് റൈഡേഴ്സ്: 64.30 കോടി രൂപ
2. ചെന്നൈ സൂപ്പര്‍ കിങ്സ്: 43.40 കോടി രൂപ
3. സണ്‍റൈസേഴ്സ് ഹൈദരാബാദ്: 25.50 കോടി രൂപ
4. ലഖ്നൗ സൂപ്പര്‍ ജയന്റ്സ്: 22.95 കോടി രൂപ
5. ഡല്‍ഹി ക്യാപിറ്റല്‍സ്: 21.80 കോടി രൂപ
6. റോയല്‍ ചലഞ്ചേഴ്സ് ബെംഗളൂരു: 16.40 കോടി രൂപ
7. രാജസ്ഥാന്‍ റോയല്‍സ്: 16.05 കോടി
8. ഗുജറാത്ത് ടൈറ്റന്‍സ്: 12.90 കോടി രൂപ
9. പഞ്ചാബ് കിങ്സ്: 11.50 കോടി രൂപ
10. മുംബൈ ഇന്ത്യന്‍സ് : 2.75 കോടി രൂപ.