IPL 2026: ആദ്യ ഓവറിൽ 5 തുടർ ബൗണ്ടറി, രണ്ടാം വരവിൽ കോഹ്ലിയെ വീഴ്ത്തി; സൂപ്പർ പോരിൽ 'കിങ്ങിനെ' പൂട്ടി ക​ഗിസോ റബാഡ

ഇന്ത്യൻ പ്രീമിയർ ലീഗിന്റെ 2026 സീസണിലെ ഗുജറാത്ത് ടെെറ്റൻസ്-ആർസിബി പോരാട്ടം അഹമ്മാദാബാദിലെ നരേന്ദ്ര മോദി സ്റ്റേഡിയത്തിൽ നടക്കുകയാണ്. ആദ്യം ബാറ്റ് ചെയ്യാനിറങ്ങിയ ആർസിബിയുടെ വിരാട് കോഹ്ലിയുടെ ബാറ്റിങ്ങിലേക്കാണ് ആരാധകർ ഉറ്റുനോക്കിയത്. സീസണിൽ ആദ്യം നേർക്കുനേർ എത്തിയപ്പോൾ കിടിലൻ അർധ സെഞ്ചുറിയോടെ കോഹ്ലി മിന്നിക്കുകയും ഗുജറാത്തിനെ ആർസിബി തോൽപ്പിക്കുകയും ചെയ്തിരുന്നു.അതുകൊണ്ടുതന്നെ കോഹ്ലിയെ തുടക്കത്തിലേ പൂട്ടാൻ ലക്ഷ്യമിട്ടാണ് ഗുജറാത്ത് ഇറങ്ങിയത്. ആദ്യ ഓവറിൽ മുഹമ്മദ് സിറാജ് വെറും ആറ് റൺസാണ് വിട്ടുകൊടുത്തത്. രണ്ടാം ഓവറിൽ കഗിസോ റബാഡ പന്തെറിയാൻ എത്തിയപ്പോൾ കോഹ്ലിയായിരുന്നു സ്ട്രെെക്കിൽ. സൗത്താഫ്രിക്കൻ സൂപ്പർ പേസറെ കടന്നാക്രമിക്കുന്ന ബാറ്റിങ് പ്രകടനമാണ് കോഹ്ലി കാഴ്ചവെച്ചത്.

മികച്ച ഫോമിലുള്ള റബാഡയുടെ ആദ്യ ഓവറിൽ‌ അഞ്ച് തുടർ ബൗണ്ടറികളാണ് കോഹ്ലി നേടിയത്. ഓഫ് സ്റ്റംപിന് പുറത്തെത്തിയ പന്തുകളെയെല്ലാം കടന്നാക്രമിച്ച് ബൗണ്ടറി നേടിയ കോഹ്ലി മനോഹരമായ ഷോട്ടുകളോടെ റബാഡയെ വിറപ്പിച്ചു. ആറാം പന്ത് സ്ട്രെയ്റ്റ് ഡ്രെെവിലൂടെ ബൗണ്ടറി നേടാൻ കോഹ്ലി ശ്രമിച്ചെങ്കിലും കോഹ്ലിയുടെ ഷോട്ട് റബാഡയുടെ കാലിൽ തട്ടിയതോടെ ബൗണ്ടറി നേടാൻ സാധിക്കാതെ പോയി. അല്ലായിരുന്നെങ്കിൽ ഓവറിലെ ആറ് പന്തും കോഹ്ലി ബൗണ്ടറി പായിച്ചേനെ.

ഈ ഓവർ കൊണ്ട് റബാഡയെ പിൻവലിക്കാതെ നാലാം ഓവറിൽ ഗുജറാത്ത് ക്യാപ്റ്റനായ ശുഭ്മാൻ ഗിൽ വീണ്ടും റബാഡക്ക് പന്ത് നൽകി. കോഹ്ലി വീണ്ടും റബാഡയെ ആക്രമിക്കാനാണ് ശ്രമിച്ചത്. ഇത് മുന്നിൽക്കണ്ട് അൽപ്പം എക്സ്ട്രാ ബൗൺസായാണ് റബാഡ പന്തെറിഞ്ഞത്. കോഹ്ലി പുൾഷോട്ടിന് ശ്രമിച്ചപ്പോൾ ടെെമിങ് പിഴച്ചു. എഡ്ജായ പന്ത് വായുവിൽ ഉയർന്നപ്പോൾ റാഷിദ് ഖാൻ തകർപ്പനായി അത് കെെയിലൊതുക്കി.
Sanju Samson: സഞ്ജു സാംസണ് ഹാപ്പി ന്യൂസ്, ഏകദിന ടീമിലേക്ക് തിരിച്ചെത്തും? സീറ്റ് പോവുക ഋഷഭ് പന്തിന്, നിർ‌ണ്ണായക മാറ്റത്തിന് ടീം ഇന്ത്യ
ഇതോടെ 13 പന്തിൽ 28 റൺസെടുത്ത് കോഹ്ലിക്ക് പുറത്താവേണ്ടി വന്നു. അഞ്ച് ഫോറും ഒരു സിക്സും പറത്തിയ കോഹ്ലി 215.38 സ്ട്രെെക്ക് റേറ്റിലാണ് കളിച്ചത്. ആദ്യ ഓവറിൽ അഞ്ച് ബൗണ്ടറികൾ വഴങ്ങിയപ്പോഴുണ്ടായ നാണക്കേടിനെ തന്റെ തൊട്ടടുത്ത ഓവറിലൂടെ മറികടക്കാൻ റബാഡക്ക് സാധിച്ചുവെന്നതാണ് എടുത്തു പറയേണ്ടത്. ഇതോടെ സൂപ്പർ പോരാട്ടത്തിൽ രാജാവിനെ വീഴ്ത്തി കെെയടി നേടാൻ റബാഡക്ക് സാധിച്ചു.

വിരാട് കോഹ്ലി ഈ സീസണിൽ മികച്ച ഫോമിലാണുള്ളത്. ഒമ്പത് മത്സരങ്ങൾ കഴിയുമ്പോൾ 54.14 ശരാശരിയിൽ 379 റൺസാണ് കോഹ്ലി നേടിയത്. 165.50 എന്ന മികച്ച സ്ട്രെെക്ക് റേറ്റും കോഹ്ലിക്കുണ്ട്. 42 ഫോറും 15 സിക്സും പറത്തി ടി20യിലെ തന്റെ മികവ് നഷ്ടമായിട്ടില്ലെന്ന് വീണ്ടും തെളിയിക്കാൻ കോഹ്ലിക്ക് സാധിച്ചിരിക്കുകയാണ്.

IPL 2026: ഈ സീസണോടെ അഞ്ച് പേരുടെ ക്യാപ്റ്റൻസി തെറിക്കും, അടുത്ത സീസണിൽ ഇവർ നായകന്മാർ? സഞ്ജുവിനടക്കം കോളടിച്ചേക്കും

37ാം വയസിലും കോഹ്ലി കിടിലൻ ഫോമിലാണ് കളിക്കുന്നത്. 69, 28, 32, 50, 49, 19, 81, 23, 28 എന്നിങ്ങനെയാണ് കോഹ്ലിയുടെ ഈ സീസണിലെ സ്കോർ. നിലവിലെ ഐപിഎൽ ചാമ്പ്യന്മാരായ ആർസിബി ഇത്തവണയും തകർപ്പൻ ഫോമിലാണുള്ളത്. കിരീടം നിലനിർത്താൻ കോഹ്ലിക്കും സംഘത്തിനും സാധിക്കുമോയെന്നതാണ് കണ്ടറിയേണ്ടത്.