IPL 2026: ഇക്കുറി ടിക്കറ്റ് വില പറ പറക്കും, ബുക്കിങ് ഉടന്‍ തുടങ്ങാന്‍ സാധ്യത; ആവേശത്തോടെ കാത്തിരുന്ന് ആരാധകര്‍

2026 ഐപിഎൽ സീസൺ തുടങ്ങുന്നതിന് വേണ്ടി ആവേശത്തോടെ കാത്തിരിക്കുകയാണ് ഇന്ത്യൻ ക്രിക്കറ്റ് ആരാധകർ. ഇന്ത്യയിൽ നടന്ന ടി20 ലോകകപ്പ് വൻ ഹിറ്റായി മാറിയതോടെ ഐപിഎല്‍ ആവേശം ഇരട്ടിയാകും എന്നാണ് ബിസിസിഐയുടെ പ്രതീക്ഷ. ലോകകപ്പ് കാണാൻ കാണികൾ ഒഴുകിയെത്തിയതോടെ ഐപിഎല്ലിലും ഇക്കുറി കാണികളുടെ എണ്ണത്തിൽ വൻ വര്‍ധനവ് ഉണ്ടാകുമെന്നാണ് സംഘാടകര്‍ കരുതുന്നത്. മാർച്ച് 28ന് തുടങ്ങുന്ന ഐപിഎൽ മത്സരങ്ങൾക്കായുള്ള ടിക്കറ്റുകളുടെ വിൽപ്പന ഏത് ദിവസം തുടങ്ങും എന്നാണ് ആരാധകർ ഉറ്റു നോക്കുന്നത്. മാർച്ച് പകുതിയോടെ ടിക്കറ്റ് വില്പന തുടങ്ങും എന്നാണ് ഇപ്പോൾ പുറത്തുവരുന്ന റിപ്പോർട്ടുകൾ. ഘട്ടം ഘട്ടമായാണ് ഓരോ മത്സരങ്ങളുടെയും ടിക്കറ്റുകൾ വിൽപ്പനക്ക് വെക്കുക. ഓരോ വേദിയിലും സാഹചര്യങ്ങൾക്കനുസരിച്ച് വ്യത്യസ്തമായ നിരക്കിൽ ആയിരിക്കും ടിക്കറ്റുകളുടെ വിൽപ്പന നടക്കുക.
IPL 2026: സഞ്ജു സിഎസ്കെയുടെ ക്യാപ്റ്റനാവുമോ? സാധ്യതകൾ കൂടുതലാണ്; കാരണം പറഞ്ഞ് അംപയർ അനന്തപത്മനാഭൻ
ഐപിഎൽ മത്സരങ്ങളെ ലക്ഷ്വറി സേവനമായി ആയി പരിഗണിക്കുന്നത് കൊണ്ട് തന്നെ ജിഎസ്ടി നിരക്കിൽ വലിയ മാറ്റമാണ് കേന്ദ്രസർക്കാർ കൊണ്ടുവന്നിരിക്കുന്നത്. ഐപിഎല്‍ ടിക്കറ്റുകളുടെ വിലയില്‍ 28 ശതമാനം ജിഎസ്ടി ഉണ്ടായിരുന്നത് ഇപ്പോൾ 40% ആക്കി വർധിപ്പിച്ചിട്ടുണ്ട്. അതുകൊണ്ടുതന്നെ ടിക്കറ്റ് വിലയിൽ വര്‍ധനവ് ഉണ്ടാകുമെന്ന് ഉറപ്പാണ്.

ചില വേദികളില്‍ 500 രൂപ മുതൽ അടിസ്ഥാന വിലയില്‍ ഐപിഎല്‍ മത്സരങ്ങളുടെ ടിക്കറ്റുകള്‍ ലഭ്യമാകുമെന്നാണ് പുറത്തുവരുന്ന സൂചന. ജിഎസ്ടിയിലെ വര്‍ധനവ് എങ്ങനെയാണ് ബാധിക്കുക എന്നത് കൂടി പരിശോധിക്കാം. 500 രൂപ അടിസ്ഥാന വിലയുണ്ടായിരുന്ന ടിക്കറ്റിന് മുമ്പത്തെ 28 ശതമാനം നിരക്കില്‍ 140 രൂപയാണ് നികുതിയായി വരിക. അതായത് ആകെ വില 640 രൂപ. എന്നാല്‍ ജിഎസ്ടി 40 ശതമാനമായതോടെ 200 രൂപയാണ് നികുതി നല്‍കേണ്ടി വരിക. ടിക്കറ്റിന് 60 രൂപ അധിക തുക ഉള്‍പ്പടെ 700 രൂപ നല്‍കേണ്ടതായി വരും.

1000 രൂപയുടെ ടിക്കറ്റിന് 120 രൂപയും 5000 രൂപയുടെ ടിക്കറ്റിന് 600 രൂപയും അധികമായി നികുതി നല്‍കേണ്ടി വരും. അതായത് ടിക്കറ്റ് വിലയില്‍ വന്‍ വര്‍ധനവുണ്ടാകുമെന്ന് അര്‍ഥം. നിലവില്‍ ഒരു ടീമുകളും തങ്ങളുടെ മത്സരങ്ങള്‍ക്കുള്ള ടിക്കറ്റ് വില എത്രയാണെന്ന് പ്രഖ്യാപിച്ചിട്ടില്ല. വരും ദിവസങ്ങളില്‍ മത്സരം നടക്കുന്ന മൈതാനങ്ങള്‍ക്ക് അനുസരിച്ച് ഇക്കാര്യങ്ങളില്‍ അറിയിപ്പുണ്ടാകും.
T20 WC 2026: ഇന്ത്യക്കായി ടി20 ലോകകപ്പ് കളിച്ചു, പക്ഷെ അടുത്ത ടി20 പരമ്പരയിൽ ഇവരെ കണ്ടേക്കില്ല! തഴയപ്പെടാൻ സാധ്യതയുള്ളവരിതാ
ടിക്കറ്റുകളുടെ വില്‍പ്പന നടത്തുന്നതിനായി വിവിധ ഒഫീഷ്യല്‍ ടിക്കറ്റിങ് പാര്‍ട്ട്ണേഴ്സുമായി ഐപിഎല്‍ ടീമുകള്‍ ധാരണയിലെത്തിയിട്ടുണ്ടെന്നാണ് സൂചന. ചില ടീമുകള്‍ ഇപ്പോഴും ചര്‍ച്ചകള്‍ നടത്തുന്നുണ്ട്. ടീമുകളുടെ ഔദ്യോഗിക വെബ്സൈറ്റുകളിലും ടിക്കറ്റുകള്‍ വാങ്ങാനുള്ള വഴിയൊരുക്കും. ഓഫ്‌ലൈൻ ബോക്സ് ഓഫീസുകളും ടീമുകള്‍ ക്രമീകരിക്കും. ആരാധകര്‍ക്കായി വിവിധ ഡിസ്കൗണ്ടുകളും ഓഫറുകളും നല്‍കുന്ന വ്യത്യസ്ത തരത്തിലുള്ള മെമ്പര്‍ഷിപ്പുകളും ടീമുകള്‍ ഒരുക്കുന്നുണ്ട്.