IPL 2026: ഇന്ത്യൻ കീപ്പർമാർക്ക് നിർണ്ണായകം, കൂടുതൽ മിന്നിക്കുന്നവർക്ക് ഏകദിന ലോകകപ്പ് സീറ്റോ? ​ഗംഭീറിന്റെ നീക്കം ഇങ്ങനെയാവും

ഇന്ത്യൻ പ്രീമിയർ ലീഗിന്റെ 2026 സീസൺ ആരംഭിക്കാൻ പോവുകയാണ്. ഇത്തവണ 10 ടീമുകളും കിരീടത്തിനായി പോരടിക്കുമ്പോൾ തീപാറും പോരാട്ടം തന്നെ പ്രതീക്ഷിക്കാം. ഇത്തവണത്തെ ഐപിഎൽ പല കാരണങ്ങളാൽ വളരെ പ്രധാനപ്പെട്ടതാണ്. ഇതിൽ ഇന്ത്യൻ താരങ്ങൾക്ക് ഇത്തവണത്തെ ഐപിഎൽ സുപ്രധാനമാണെന്ന് പറയാം. ഏകദിന ലോകകപ്പ് വരാനിരിക്കവെ ഇന്ത്യൻ ടീം തിരഞ്ഞെടുപ്പിനെ ഐപിഎല്ലിലെ പ്രകടനം സ്വാധീനിക്കുമെന്ന സൂചന പരിശീലകൻ ഗൗതം ഗംഭീർ നൽകിക്കഴിഞ്ഞു.അതുകൊണ്ടുതന്നെ ഇന്ത്യയുടെ താരങ്ങൾക്കെല്ലാം ഐപിഎല്ലിലെ പ്രകടനം സുപ്രധാനമാണ്. ഇത്തവണ ഇന്ത്യൻ താരങ്ങളിൽ ഏറ്റവും കടുത്ത മത്സരം നടത്തുന്നത് വിക്കറ്റ് കീപ്പർമാരാണെന്ന് പറയാം. ഏകദിന ലോകകപ്പിൽ വിക്കറ്റ് കീപ്പറായി ആര് എന്ന കാര്യത്തിൽ ഇതുവരെ തീരുമാനമായിട്ടില്ല. നിലവിൽ കെ എൽ രാഹുലും ഋഷഭ് പന്തുമാണ് ഏകദിനത്തിലെ വിക്കറ്റ് കീപ്പർമാർ.

എന്നാൽ വരുന്ന ഏകദിന ലോകകപ്പിൽ ഇവർക്ക് സീറ്റുറപ്പിക്കാനാവില്ല. രാഹുൽ, ഋഷഭ് എന്നിവരെക്കൂടാതെ സഞ്ജു സാംസൺ , ഇഷാൻ കിഷൻ, ദ്രുവ് ജുറേൽ എന്നിവർ ഈ സീറ്റിനായി പോരടിക്കുകയാണ്. ഇതിൽ ആരെയൊക്കെയാവും ഇന്ത്യ ഏകദിന ലോകകപ്പിലേക്ക് പരിഗണിക്കുകയെന്നതാണ് കാത്തിരുന്ന് കാണേണ്ടത്. കെ എൽ രാഹുലിനെ പരിഗണിക്കുമ്പോൾ പ്രധാന പ്രശ്നം സ്ട്രെെക്ക് റേറ്റാണ്.

രാഹുലിന് എല്ലാ സമയത്തും മികച്ച സ്ട്രെെക്ക് റേറ്റിൽ കളിക്കാനാവുന്നില്ല. ഫിനിഷർ റോളിലാണ് കൂടുതലും രാഹുൽ കളിക്കുന്നത്. ആ റോളിൽ രാഹുൽ മികവ് കാട്ടുന്നുണ്ടെങ്കിലും ഗൗതം ഗംഭീർ ആഗ്രഹിക്കുന്ന തരത്തിലുള്ള പ്രഹര ശേഷിയിലേക്ക് രാഹുൽ എത്തുന്നില്ലെന്ന് തന്നെ പറയാം. ഇത്തവണത്തെ ഐപിഎല്ലിൽ രാഹുൽ ഓപ്പണർ റോളിലാവും കളിക്കുകയെന്നാണ് വിവരം.
IPL 2026: രാജസ്ഥാൻ ടീമിൽ പരാ​ഗ് രാജാവ്, ക്യാപ്റ്റനായത് എങ്ങനെയെന്ന് എല്ലാവർക്കും അറിയാം; പരിഹസിച്ച് ക്രിസ് ശ്രീകാന്ത്
രാഹുലിന്റെ പ്രകടനം വളരെ പ്രധാനപ്പെട്ടതാണ്. ഋഷഭ് പന്തും ഗംഭീറും തമ്മിൽ അത്ര നല്ല ബന്ധത്തിലല്ല. ടെസ്റ്റ് പരമ്പരയിൽ മാത്രമാണ് ഇപ്പോൾ ഋഷഭിന് സീറ്റ് ഉറപ്പുള്ളത്. മറ്റൊരു ഫോർമാറ്റിലും ഋഷഭിന് സീറ്റുറപ്പിക്കാനാവില്ല. ഇത്തവണത്തെ ഐപിഎല്ലിൽ തകർപ്പൻ പ്രകടനം കാഴ്ചവെച്ച് സെലക്ടർമാരുടേയും ഗംഭീറിന്റേയും ശ്രദ്ധ നേടിയെടുക്കാൻ ഋഷഭിന് സാധിക്കുമോയെന്നതാണ് കണ്ടറിയേണ്ടത്. ഋഷഭ് ഇത്തവണ യുവരാജ് സിങ്ങിന് കീഴിൽ പരിശീലമടക്കം നടത്തിയാണ് കളിക്കാൻ ഇറങ്ങുന്നത്.

സഞ്ജു സാംസൺ ടി20 ലോകകപ്പിലൂടെ എല്ലാവരുടേയും ശ്രദ്ധ നേടിക്കഴിഞ്ഞു. ഇന്ത്യയുടെ മാച്ച് വിന്നറായി സഞ്ജു സാംസൺ മാറിക്കഴിഞ്ഞു. ഏകദിനത്തിലെ സഞ്ജുവിന്റെ പ്രകടന കണക്കുകൾ ഗംഭീരമാണ്. അതുകൊണ്ടുതന്നെ സഞ്ജുവിന് ഏകദിനത്തിലേക്ക് തിരികെ വിളിക്കാനുള്ള സാധ്യതയുമുണ്ട്. ഗംഭീർ സഞ്ജുവിന് വലിയ പിന്തുണ നൽകുന്നുണ്ട്. ഐപിഎല്ലിൽ ഭേദപ്പെട്ട പ്രകടനം കാഴ്ചവെക്കാൻ സാധിച്ചാൽ ഏകദിന ലോകകപ്പ് ടീമിലേക്കെത്തുക സഞ്ജുവിന് പ്രയാസമാവില്ല.

IPL 2026: മുംബെെ ഹാർദിക്കിനെ നായകസ്ഥാനത്ത് നിന്ന് മാറ്റണം, പകരം സൂര്യകുമാർ വരട്ടെ; ആർ അശ്വിൻ പറയുന്നത് ഇങ്ങനെ

ഇഷാൻ കിഷനാണ് മറ്റൊരു താരം. ഇടം കെെയൻ താരമായ ഇഷാൻ ഏകദിനത്തിൽ ഓപ്പണറായി ഇരട്ട സെഞ്ചുറി നേടിയിട്ടുള്ള താരമാണ്. ടി20 ലോകകപ്പിൽ ഇഷാൻ കിടിലൻ പ്രകടനമാണ് നടത്തിയത്. ഐപിഎല്ലിൽ ശോഭിക്കാനായാൽ ഇഷാനും ഏകദിന ടീമിലേക്ക് തിരിച്ചുവരവ് സാധ്യമായേക്കും. ദ്രുവ് ജുറേലിന് കാര്യങ്ങൾ എളുപ്പമല്ല. രാജസ്ഥാൻ റോയൽസ് താരമായ ജുറേലിന് ഏറ്റവും മികച്ച പ്രകടനം കാഴ്ചവെക്കാൻ സാധിക്കാതെ സെലക്ടർമാരുടെ ശ്രദ്ധ നേടിയെടുക്കാൻ സാധിക്കില്ലെന്ന് തന്നെ പറയാം.