IPL 2026: ഈ സീസണിൽ ഫ്ളോപ്പ്, ഇനി ഈ സൂപ്പർ താരങ്ങൾക്ക് ആര് അവസരം നൽകും? അടുത്ത സീസണിൽ തിരിച്ചടി കാത്തിരിക്കുന്നു

ഇന്ത്യൻ പ്രീമിയർ ലീഗിന്റെ 2026 സീസൺ പ്ലേ ഓഫിലേക്ക് കടക്കാൻ പോവുകയാണ്. ഇത്തവണത്തെ സീസണിൽ ആരാധകർ പ്രതീക്ഷിച്ച പല പ്രമുഖ താരങ്ങൾക്കും നിലവാരത്തിനൊത്ത പ്രകടനം നടത്താൻ സാധിച്ചിട്ടില്ല. ഇതിൽ ഐപിഎല്ലിൽ ഗംഭീര പ്രകടനം നടത്തി മികച്ച റെക്കോഡുള്ള താരങ്ങളുമുണ്ട്. വലിയ പ്രതിഫലത്തിലെത്തിയ പല സീനിയർ താരങ്ങൾക്കും നീതി കാട്ടുന്ന പ്രകടനം നടത്താനായിട്ടില്ല.ഈ സാഹചര്യത്തിൽ വരുന്ന സീസണിൽ പല പ്രധാന താരങ്ങളും അൺസോൾഡാവാനുള്ള സാധ്യതയുണ്ട്. നിലവിലെ ടീം കെെവിട്ടാൽ പ്രതിഫലത്തിൽ വലിയ ഇടിവും നേരിട്ടേക്കും. ഇത്തരത്തിൽ ഈ സീസണിലെ നിരാശപ്പെടുത്തുന്ന പ്രകടനം കൊണ്ട് അടുത്ത സീസണിൽ പണി കിട്ടാൻ സാധ്യതയുള്ള താരങ്ങൾ ആരൊക്കെയാണെന്ന് നോക്കാം.

കൊൽക്കത്ത നെെറ്റ് റെെഡേഴ്സ് നായകനായ അജിൻക്യ രഹാനെയാണ് ഒന്നാമത്തെ താരം. ഈ സീസണിൽ തീർത്തും നിരാശപ്പെടുത്തിയ രഹാനെയെ അടുത്ത സീസണിൽ വാങ്ങാൻ ആരും തയ്യാറായേക്കില്ല. രഹാനെ ഇന്ത്യൻ ക്രിക്കറ്റ് ടീമിൽ നിന്നും പുറത്തായിട്ടും നാളുകളേറെയായി. ഇനിയൊരു തിരിച്ചുവരവ് അവസരം രഹാനെക്ക് ലഭിക്കാൻ സാധ്യത കുറവാണെന്ന് തന്നെ പറയാം. കെകെആറും രഹാനെയെ ഇനി നിലനിർത്തിയേക്കില്ല.

മുംബെെ ഇന്ത്യൻസിന്റെ സൂര്യകുമാർ യാദവിനെ ടീം ഒഴിവാക്കാനുള്ള സാധ്യതകളും തള്ളിക്കളയാനാവില്ല. ഇന്ത്യയുടെ ടി20 നായകനായ സൂര്യയെ ഇപ്പോൾ ആ സ്ഥാനത്ത് നിന്നും നീക്കാൻ പോവുകയാണ്. മുംബെെ സൂര്യയെ നിലനിർത്തിയാലും പ്രതിഫലത്തിൽ വലിയ കുറവ് സംഭവിക്കുമെന്നുറപ്പാണ്. 16.35 കോടി പ്രതിഫലം നിലവിൽ വാങ്ങുന്ന സൂര്യക്ക് വരുന്ന സീസണിൽ ഇത്രയും ഉയർന്ന പ്രതിഫലം ലഭിക്കാൻ സാധ്യത വളരെ കുറവാണ്.
PBKS vs LSG IPL 2026: സെഞ്ചുറിയോടെ പടനയിച്ച് ശ്രേയസ്; ക്യാപ്റ്റന്മാരിൽ സഞ്ജു ഉൾപ്പെടുന്ന എലെെറ്റ് ക്ലബ്ബിൽ, പഞ്ചാബ് പ്ലേ ഓഫ് പ്രതീക്ഷ കാത്തു
കരുൺ നായർക്ക് അടുത്ത സീസണിൽ അവസരം ലഭിക്കാൻ യാതൊരു സാധ്യതയുമില്ല. നിലവിൽ ഡൽഹി ക്യാപിറ്റൽസിനൊപ്പമാണ് കരുണുള്ളത്. സമീപകാലത്തെ കരുണിന്റെ പ്രകടനം മോശമാണെന്ന് മാത്രമല്ല ടീമിനെ തോൽപ്പിക്കുന്ന പിഴവുകളും താരത്തിൽ നിന്നുണ്ടാകുന്നു. അതുകൊണ്ടുതന്നെ കരുൺ അടുത്ത സീസണിൽ അൺസോൾഡായാലും അത്ഭുതപ്പെടാനാവില്ല.

നിക്കോളാസ് പുരാൻ ഈ സീസണിൽ ലഖ്നൗ സൂപ്പർ ജയ്ന്റ്സിനൊപ്പം തീർത്തും നിരാശപ്പെടുത്തിയ താരമാണ്. വരുന്ന സീസണിൽ ലഖ്നൗ പുരാനെ ഒഴിവാക്കുമെന്ന കാര്യം ഉറപ്പാണ്. 21 കോടി പ്രതിഫലത്തിൽ കളിക്കുന്ന പുരാന് അടുത്ത സീസണിൽ ഇതിന്റെ പകുതി പ്രതിഫലം പോലും ലഭിക്കാൻ സാധ്യതയില്ല. പുരാൻ മോശം ഫോമിലായത് ഇത്തവണ ലഖ്നൗ പ്ലേ ഓഫ് കാണാതെ പുറത്താകാൻ പ്രധാന കാരണമായത്.

IPL 2026: അർജുനെ ഇനി ട്രോളരുത്, കിടിലൻ വിക്കറ്റും ക്യാച്ചും നേടി മിന്നിച്ചു; ഋഷഭിന്റെ പിഴവില്ലായിരുന്നെങ്കിൽ മാച്ച് വിന്നറായേനെ

മുംബെെ പേസർ ട്രന്റ് ബോൾട്ടിന്റെ ഈ സീസണിലെ പ്രകടനം നിരാശപ്പെടുത്തുന്നതായിരുന്നു. ബോൾട്ടിനെ പ്രായം തളർത്തുന്നു. പവർപ്ലേയിൽ പഴയ മികവ് കാട്ടാൻ ട്രന്റ് ബോൾട്ടിന് സാധിക്കുന്നില്ല. 12.50 കോടിക്ക് കളിക്കുന്ന ബോൾട്ടിനെ മുംബെെ ഒഴിവാക്കുമെന്നുറപ്പാണ്. വരുന്ന സീസണിൽ ബോൾട്ടിന് അവസരം ലഭിച്ചാലും പ്രതിഫലത്തിൽ വലിയ ഇടിവ് നേരിടാൻ സാധ്യതകളേറെയാണ്.

ഷിംറോൻ ഹെറ്റ്മെയറെ രാജസ്ഥാൻ റോയൽസും ഒഴിവാക്കിയേക്കും. വമ്പനടിക്കാരനായ വെസ്റ്റ് ഇൻഡീസ് താരത്തിന് ഈ സീസണിൽ മികവ് കാട്ടാനായിട്ടില്ല. രാജസ്ഥാൻ വലിയ പ്രതീക്ഷ ഹെറ്റ്മെയറിൽ വെച്ചപ്പോഴും അതിനോട് നീതികാട്ടാൻ ഹെറ്റ്മെയറിന് സാധിച്ചില്ല. 11 കോടി പ്രതിഫലം വാങ്ങുന്ന താരത്തെ രാജസ്ഥാൻ കെെവിട്ടാലും ആരെങ്കിലും വാങ്ങിയേക്കും. എന്നാൽ പ്രതിഫലത്തിൽ വലിയ ഇടിവ് ഉണ്ടാകാനാണ് സാധ്യത.