IPL 2026: ഒടുവിൽ തോൽവികൾക്ക് വിരാമം, മുംബെെ വിജയ വഴിയിൽ എത്തിയത് എങ്ങനെ? ഈ മൂന്ന് കാര്യങ്ങൾ നിർണ്ണായകമായി

ഇന്ത്യൻ പ്രീമിയർ ലീഗിന്റെ 2026 സീസണിൽ കരുത്തുകാട്ടി മുംബെെയുടെ തിരിച്ചുവരവ്. കരുത്തരായ ഗുജറാത്ത് ടെെറ്റൻസിനെ അവരുടെ തട്ടകത്തിൽ 99 റൺസിനാണ് മുംബെെ തോൽപ്പിച്ചത്. ആദ്യം ബാറ്റ് ചെയ്ത മുംബെെ അഞ്ച് വിക്കറ്റിന് 199 റൺസെടുത്തപ്പോൾ മറുപടിക്കിറങ്ങിയ ഗുജറാത്ത് 15.5 ഓവറിൽ 100 റൺസിന് ഓൾഔട്ടായി. മുംബെെയുടെ ബാറ്റിങ് നിരയും ബൗളിങ് നിരയും നടത്തിയ തകർപ്പൻ പ്രകടനമാണ് ടീമിന് കരുത്തായി മാറിയത്.പോയിന്റ് പട്ടികയിൽ അവസാന സ്ഥാനത്തേക്ക് കൂപ്പുകുത്തിയ മുംബെെക്ക് ഇനിയുള്ള എല്ലാ മത്സരങ്ങളിലും ജയം അത്യാവശ്യമായിരുന്നു. അതുകൊണ്ടുതന്നെ മുംബെെക്ക് വലിയ ആത്മവിശ്വാസം നൽകുന്ന ജയമാണ് ഇപ്പോൾ ടീം നേടിയെടുത്തിരിക്കുന്നതെന്ന് പറയാം. എങ്ങനെയാണ് മുംബെെ തോൽവിക്ക് വിരാമമിട്ട് വിജയവഴിയിലേക്കെത്തിയത്?. കാരണങ്ങൾ അറിയാം.

ജസ്പ്രീത് ബുംറ ഫോമിലേക്കെത്തി

മുംബെെ ഇന്ത്യൻസ് ഇത്തവണ മോശം പ്രകടനത്തോടെ പിന്നോട്ട് പോകാനുള്ള പ്രധാന കാരണം ജസ്പ്രീത് ബുംറയുടെ മോശം ഫോമായിരുന്നു. ആദ്യത്തെ അഞ്ച് മത്സരത്തിലും ഒരു വിക്കറ്റ് പോലും നേടാൻ ബുംറക്ക് സാധിച്ചില്ല. എന്നാൽ ഗുജറാത്തിനെതിരേ ജസ്പ്രീത് ബുംറയുടെ തകർപ്പൻ തിരിച്ചുവരവാണ് കണ്ടത്.

ആദ്യ ഓവർ പന്തെറിയാനെത്തിയ ബുംറ ആദ്യ പന്തിൽത്തന്നെ സായ് സുദർശനെ പുറത്താക്കി. ഇത് മത്സരത്തിൽ വളരെ നിർണ്ണായകമായി മാറുകയും ചെയ്തു. മൂന്ന് ഓവറിൽ‌ 15 റൺസ് മാത്രം വഴങ്ങി ഒരു വിക്കറ്റാണ് ബുംറ വീഴ്ത്തിയത്. ബുംറയുടെ ബൗളിങ് മികവ് മുംബെെയുടെ തിരിച്ചുവരവിൽ നിർണ്ണായകമായെന്ന് തന്നെ പറയാം.
IPL 2026: സെഞ്ചുറി 'തിലക്', അവസാന പന്തിൽ മൂന്നക്കം കണ്ടു; 23 പന്തിൽ അടിച്ചെടുത്തത് റെക്കോഡ് സ്കോർ, ഒപ്പം ചരിത്ര നേട്ടവും

മുംബെെ ടീമിൽ വരുത്തിയ നിർണ്ണായക മാറ്റങ്ങൾ

മുംബെെ ടീമിൽ പ്രതിഭാശാലികളായ സീനിയർ താരങ്ങൾ ഏറെയായിരുന്നു. എന്നാൽ ഇവരിൽ മികച്ച ഫോമിൽ കളിക്കാൻ പലർക്കും സാധിച്ചിരുന്നില്ല. ട്രന്റ് ബോൾട്ടും ദീപക് ചഹാറും മോശം ഫോമിൽ പന്തെറിഞ്ഞത് മുംബെെയുടെ വിജയം നിഷേധിക്കുന്നതിൽ പ്രധാനമായിരുന്നു. എന്നാൽ ഗുജറാത്തിനെതിരേ മുംബെെ നിർണ്ണായക മാറ്റം ബൗളിങ് നിരയിൽ കൊണ്ടുവന്നു.

അശ്വിനി കുമാറിനെ പ്ലേയിങ് ഇലവനിലേക്ക് കൊണ്ടുവരാനുള്ള തീരുമാനം നിർണ്ണായകമായി. നാല് ഓവറിൽ 24 റൺസ് വിട്ടുകൊടുത്ത് നാല് വിക്കറ്റാണ് അശ്വിനി കുമാർ വീഴ്ത്തിയത്. കൃഷ് ഭഗത് രണ്ട് ഓവറിൽ 10 റൺസും വഴങ്ങി. മുംബെെ ബൗളിങ് നിരയിൽ വരുത്തിയ നിർണ്ണായക മാറ്റങ്ങൾ ടീമിന്റെ വിജയത്തിൽ പ്രധാന പങ്കുവഹിച്ചുവെന്ന് തന്നെ പറയാം.

IPL 2026: ഔട്ട് ഓഫ് റൺസല്ല, ഇത് ഔട്ട് ഓഫ് ഫോം; വീണ്ടും നിരാശപ്പെടുത്തി സൂര്യകുമാർ യാദവ്, കാത്തിരിക്കുന്നത് വലിയ തിരിച്ചടി

തിലകിന്റെ നിർണ്ണായക സെഞ്ചുറി

മുംബെെയുടെ ടോപ് ഓഡർ തീർത്തും നിരാശപ്പെടുത്തിയെങ്കിലും തിലക് വർമ നേടിയ തകർപ്പൻ സെഞ്ചുറി മുംബെെയുടെ ആത്മവിശ്വാസം ഉയർത്തി. 45 പന്തിൽ എട്ട് ഫോറും ഏഴ് സിക്സും ഉൾപ്പെടെ 101 റൺസോടെ തിലക് പുറത്താവാതെ നിന്നു. അഹമ്മദാബാദിൽ 199 എന്ന സ്കോർ അത്ര വലുതാണെന്ന് പറയാനാവില്ല.

എന്നാൽ ആത്മവിശ്വാസത്തോടെ പന്തെറിയാൻ മുംബെെക്ക് സാധിച്ചത് തിലക് വർമ സൃഷ്ടിച്ചെടുത്ത ആവേശമാണ്. തിലകിന്റെ സെഞ്ചുറി മുംബെെ താരങ്ങളെല്ലാം വളരെയധികം ആഘോഷിക്കുന്നതാണ് കാണാനായത്. നിർണ്ണായക പ്രകടനമാണ് തിലക് കാഴ്ചവെച്ചതെന്ന് പറയാം.