IPL 2026: കെകെആര്‍ ഹാപ്പിയാണ്! ഇത്തവണ ഐപിഎല്ലില്‍ തകര്‍ക്കും; ടി20 ലോകകപ്പില്‍ മിന്നിച്ചത് ഈ താരങ്ങള്‍

2026 മാര്‍ച്ച് അവസാനത്തോടെ ഇന്ത്യന്‍ പ്രീമിയര്‍ ലീഗിന്‍റെ പുതിയ സീസണ് തുടക്കമാവുകയാണ്. ഐപിഎല്ലിന് തൊട്ടുമുമ്പ് ഇന്ത്യയിലും ശ്രീലങ്കയിലുമായി ടി20 ലോകകപ്പും നടന്നിരുന്നു. മാര്‍ച്ച് 8ന് രാത്രി നടക്കുന്ന ടി20 ലോകകപ്പ് ഫൈനലില്‍ ഇന്ത്യയും ന്യൂസിലന്‍ഡും തമ്മിലാണ് ഏറ്റുമുട്ടുക. ടി20 ലോകകപ്പ് നടക്കുന്നതിനിടയില്‍ തന്നെ പല ഐപിഎല്‍ ടീമുകളും തങ്ങളുടെ പരിശീലന ക്യാമ്പുകള്‍ ആരംഭിച്ചിരുന്നു. കൊല്‍ക്കത്ത നൈറ്റ് റൈഡേഴ്സും ഈ സീസണില്‍ ശക്തമായ തിരിച്ചുവരവാണ് ലക്ഷ്യമിടുന്നത്. ടി20 ലോകകപ്പില്‍ തങ്ങളുടെ വിദേശ താരങ്ങള്‍ മികവിലേക്ക് എത്തിയത് കൊല്‍ക്കത്തയെ ഹാപ്പിയാക്കുന്ന ഘടകമാണ്. ഫൈനലിലെത്തിയ ന്യൂസിലന്‍ഡ് നിരയിലുള്ള ഫിന്‍ അലന്‍, ടിം സീഫര്‍ട്ട്, രചിന്‍ രവീന്ദ്ര എന്നീ മൂന്ന് താരങ്ങളും ഇത്തവണ ഐപിഎല്ലില്‍ കൊല്‍ക്കത്ത നൈറ്റ് റൈഡേഴ്സിനൊപ്പമാണ്. മൂന്ന് താരങ്ങളും മികച്ച പ്രകടനമാണ് ടി20 ലോകകപ്പില്‍ കാഴ്ച്ച വെച്ചത്. ഫിന്‍ അലനും ടിം സീഫര്‍ട്ടും ന്യൂസിലന്‍ഡ് ടോപ് ഓര്‍ഡറിന്‍റെ നട്ടെല്ലായപ്പോള്‍ രചിന്‍ രവീന്ദ്ര ഓള്‍ റൗണ്ട് മികവാണ് പുറത്തെടുത്തത്.
T20 WC 2026: ഫെെനലിൽ മിന്നിച്ചാൽ സഞ്ജു ടി20 ക്യാപ്റ്റനാവുമോ? സൂര്യ വഴിമാറിയേക്കുമെന്ന് റിപ്പോർട്ട്, സാധ്യതകൾ വിലയിരുത്താം

ഫിന്‍ അലന്‍ - ടിം സീഫര്‍ട്ട് കൂട്ടുകെട്ട്

7 മത്സരങ്ങളില്‍ നിന്ന് 289 റണ്‍സാണ് ടി20 ലോകകപ്പില്‍ ഫിന്‍ അലന്‍ ഇതുവരെ നേടിയിരിക്കുന്നത്. ദക്ഷിണാഫ്രിക്കക്കെതിരെ സെമിഫൈനല്‍ മത്സരത്തില്‍ അന്താരാഷ്ട്ര ടി20 ക്രിക്കറ്റിലെ ഏറ്റവും മികച്ച ഇന്നിങ്സുകളിലൊന്നാണ് ഫിന്‍ അലന്‍ കാഴ്ച്ച വെച്ചത്. 33 പന്തില്‍ സെഞ്ചുറിയടിച്ച ഫിന്‍ അലന്‍റെ മികവില്‍ ദക്ഷിണാഫ്രിക്ക നാണംകെട്ട് മടങ്ങുകയായിരുന്നു. കെകെആറിന്‍റെ സ്വന്തം മൈതാനമായ ഈഡന്‍ ഗാര്‍ഡന്‍സിലാണ് ഈ ഇന്നിങ്സ് പിറന്നത് എന്ന കാര്യവും ശ്രദ്ധേയമാണ്.

ടിം സീഫര്‍ട്ടും മികച്ച ഫോമിലാണ് ബാറ്റ് വീശുന്നത്. 7 മത്സരങ്ങളില്‍ നിന്ന് 3 അര്‍ധസെഞ്ചുറികള്‍ ഉള്‍പ്പടെ 274 റണ്‍സാണ് വിക്കറ്റ് കീപ്പര്‍ ബാറ്ററായ ടിം സീഫര്‍ട്ട് നേടിയിരിക്കുന്നത്. ഫിന്‍ അലനും ടിം സീഫര്‍ട്ടും തമ്മിലുള്ള പാര്‍ട്ട്ണര്‍ഷിപ്പുകളില്‍ നിന്ന് ആകെ പിറന്നത് 463 റണ്‍സാണ്. ഒരു ടി20 ലോകകപ്പില്‍ ഇത്രയും റണ്‍സ് രണ്ട് താരങ്ങള്‍ ചേര്‍ന്ന് പാര്‍ട്ട്ണര്‍ഷിപ്പില്‍ സ്കോര്‍ ചെയ്യുന്നത് ഇതാദ്യമായാണ്. ഇരുവരും പുതിയ സീസണില്‍ കൊല്‍ക്കത്തയ്ക്ക് കരുത്തായി മാറുമെന്ന് ഉറപ്പാണ്.

രചിന്‍ രവീന്ദ്ര

ന്യൂസിലന്‍ഡിനായി ഈ ടി20 ലോകകപ്പില്‍ ഓള്‍ റൗണ്ട് പ്രകടനമാണ് രചിന്‍ രവീന്ദ്ര കാഴ്ച്ച വെച്ചത്. ചെന്നെെ സൂപ്പര്‍ കിങ്സ് താരമായിരുന്ന രവീന്ദ്ര കഴിഞ്ഞ ഐപിഎല്‍ സീസണിൽ മോശം പ്രകടനങ്ങള്‍ കാരണം ഏറെ വിമര്‍ശനം കേട്ടിരുന്നു. പുതിയ സീസണ് മുമ്പ് നടന്ന താരലേലത്തില്‍ രചിനെ കൊല്‍ക്കത്ത സ്വന്തമാക്കുകയായിരുന്നു. ടി20 ലോകകപ്പില്‍ 7 മത്സരങ്ങളില്‍ നിന്ന് 11 വിക്കറ്റുകളും 128 റണ്‍സുമാണ് രചിന്‍ രവിന്ദ്രയുടെ സമ്പാദ്യം.
T20 WC 2026: ഇന്ത്യൻ ആരാധകരെ നിശബ്ദമാക്കും, പുതിയത് എന്തെങ്കിലും പറയൂ! കിവീസ് ക്യാപ്റ്റനെ ട്രോളി സൂര്യകുമാർ യാദവ്
ഇക്കൂട്ടത്തില്‍ രചിന്‍ രവീന്ദ്ര, ടിം സീഫര്‍ട്ട് എന്നിവര്‍ ടി20 ലോകകപ്പിലെ മികച്ച താരമാകാന്‍ സാധ്യതയുള്ളവരുടെ പട്ടികയിലേക്ക് നോമിനേറ്റ് ചെയ്യപ്പെട്ടിട്ടുമുണ്ട്. കഴിഞ്ഞ ഐപിഎല്‍ സീസണില്‍ എട്ടാം സ്ഥാനത്താണ് കൊല്‍ക്കത്ത ഫിനിഷ് ചെയ്തത്. പുതിയ സീസണില്‍ കിരിടം തന്നെയാണ് കെകെആര്‍ ലക്ഷ്യമിടുന്നത്. ഐപിഎല്ലിന് മുമ്പ് നടന്ന ടി20 ലോകകപ്പില്‍ തങ്ങളുടെ താരങ്ങള്‍ ഫോമിലെത്തിയത് കൊല്‍ക്കത്തയെ ഏറെ സന്തോഷിപ്പിക്കുന്നുണ്ട്. ഐപിഎല്ലിലും ഇവര്‍ മിന്നിക്കുമെന്നാണ് ആരാധകരുടെ പ്രതീക്ഷ.