IPL 2026: ചരിത്ര റെക്കോഡിട്ട് വിരാട് കോഹ്ലി, ഐപിഎല്ലിൽ‌ മറ്റാർക്കുമില്ലാത്ത നേട്ടം; ഡൽഹിയെ തകർത്തടുക്കി ആർസിബി മുന്നോട്ട്

ഇന്ത്യൻ പ്രീമിയർ ലീഗിന്റെ 2026 സീസണിലെ ഡൽഹി ക്യാപിറ്റൽസിനെതിരായ മത്സരത്തിലൂടെ തകർപ്പൻ റെക്കോഡിട്ട് വിരാട് കോഹ്ലി . ഐപിഎല്ലിൽ 9000 റൺസ് പൂർത്തിയാക്കുന്ന ആദ്യത്തെ താരമെന്ന ബഹുമതിയിലേക്കാണ് വിരാട് കോഹ്ലി പേര് ചേർത്തിരിക്കുന്നത്. ഡൽഹിക്കെതിരേ 11 റൺസായിരുന്നു ഈ നേട്ടത്തിലേക്കെത്താൻ കോഹ്ലിക്ക് വേണ്ടിയിരുന്നത്. 15 പന്തിൽ 23 റൺസോടെ കോഹ്ലി പുറത്താവാതെ നിന്ന് ചരിത്ര റെക്കോഡും ആർസിബിക്ക് ജയവും നേടിക്കൊടുത്തു. രണ്ട് സിക്സും ഒരു ഫോറുമാണ് കോഹ്ലി നേടിയത്. ഐപിഎല്ലിലെ റൺവേട്ടക്കാരിൽ രണ്ടാം സ്ഥാനത്തുള്ള രോഹിത് ശർമയുടെ പേരിൽ 7183 റൺസാണുള്ളത്. കോഹ്ലിയുടെ ഐപിഎല്ലിലെ നിലവിലെ റെക്കോഡ് തകർക്കാൻ ഇനിയൊരു താരം വളർന്ന് വരേണ്ടിയിരിക്കുന്നു. ഐപിഎല്ലിലെ രാജാവ് താനാണെന്ന് ഒരിക്കൽക്കൂടി അടിവരയിടുകയാണ് കോഹ്ലി.

ഡൽഹിയെ ഒമ്പത് വിക്കറ്റിന് തകർത്ത് കിരീട പ്രതീക്ഷ സജീവമാക്കി മുന്നോട്ട് കൊണ്ടുപോകാനും നിലവിലെ ചാമ്പ്യന്മാരായ ആർസിബിക്ക് സാധിച്ചിരിക്കുകയാണ്. 76 റൺസ് വിജയലക്ഷ്യം 6.3 ഓവറിൽ ഒരു വിക്കറ്റ് നഷ്ടത്തിൽ ആർസിബി മറികടന്നു. 11 പന്തിൽ 20 റൺസെടുത്ത ജേക്കബ് ബദലിന്റെ വിക്കറ്റ് മാത്രമാണ് ആർസിബിക്ക് നഷ്ടമായത്. ദേവ്ദത്ത് പടിക്കൽ 13 പന്തിൽ മൂന്ന് വീതം സിക്സും ഫോറും ഉൾപ്പെടെ 34 റൺസുമായി പുറത്താവാതെ നിന്നു.

ടോസ് നഷ്ടപ്പെട്ട് ആദ്യം ബാറ്റ് ചെയ്ത ഡൽഹിക്ക് വലിയ ബാറ്റിങ് തകർച്ചയാണ് നേരിട്ടത്. എട്ട് റൺസിനിടെ ആറ് വിക്കറ്റുകൾ ഡൽഹിക്ക് നഷ്ടമായി. പവർപ്ലേയിൽ വെറും 13 റൺസാണ് ഡൽഹി നേടിയത്. സ്വന്തം തട്ടകത്തിലാണ് ഡൽഹിക്ക് ഇത്തരമൊരു തകർച്ച നേരിട്ടത് എന്നതാണ് എടുത്തു പറയേണ്ടത്. യുവ ഓപ്പണർ സഹിൽ പരാഖിനെ (0) മടക്കി ഭുവനേശ്വർ‌ കുമാറാണ് വിക്കറ്റ് വേട്ടക്ക് തുടക്കമിട്ടത്.
IPL 2026: 8 റൺസിന് 6 വിക്കറ്റ്, വിറപ്പിച്ച് ഭുവിയും ഹെയ്സൽവുഡും; ഐപിഎല്ലിലെ ഏറ്റവും വലിയ തകർച്ച, നാണക്കേടിന്റെ റെക്കോഡിട്ട് ഡൽഹി
കെ എൽ രാഹുൽ (1) രണ്ടാം ഓവറിലെ ആദ്യ പന്തിൽ ജോഷ് ഹെയ്സൽവുഡിന് വിക്കറ്റ് നൽകി മടങ്ങി. സമീർ റിസ്വിയെ ഹെയ്സൽവുഡ് ഗോൾഡൻ ഡക്കാക്കി. ട്രിസ്റ്റൻ സ്റ്റബ്സ് അഞ്ച റൺസെടുത്ത് പുറത്തായപ്പോൾ ക്യാപ്റ്റൻ അക്ഷർ പട്ടേൽ മൂന്ന് പന്ത് നേരിട്ട് ഡക്കിന് മടങ്ങി. നിതീഷ് റാണക്ക് ഒരു റൺസാണ് നേടാനായത്. ഹെയ്സൽവുഡും ഭുവനേശ്വറും പവർപ്ലേയിൽ മൂന്ന് വിക്കറ്റുകൾ വീതം പങ്കിട്ടു.

ഡേവിഡ് മില്ലറും അഭിഷേക് പോറലും ചേർന്ന് ടീമിനെ രക്ഷപെടുത്തുമെന്ന് തോന്നിച്ചു. എന്നാൽ 18 പന്തിൽ 19 റൺസെടുത്ത മില്ലറെ റാസിഖ് സലാം ദാർ മടക്കി. കെയ്ൽ ജാമിസൻ 12 റൺസെടുത്തപ്പോൾ കുൽദീപ് യാദവിന് മൂന്ന് റൺസാണ് നേടാനായത്. 33 പന്തിൽ 30 റൺസെടുത്ത അഭിഷേക് പോറലിനെ പുറത്താക്കി ജോഷ് ഹെയ്സൽവുഡാണ് ‍ഡൽഹിയുടെ പോരാട്ടം അവസാനിപ്പിച്ചത്.
MS Dhoni: ധോണി ഈ സീസണിൽ കളിക്കും, പക്ഷെ സിഎസ്കെയ്ക്ക് അത് സംഭവിക്കണം; ആർ അശ്വിൻ പറയുന്നത് ഇങ്ങനെ

16.3 ഓവറിൽ‌ 75 റൺസാണ് ഡൽഹിക്ക് നേടാനായത്. ഹെയ്സൽവുഡ് നാലും ഭുവനേശ്വർ മൂന്നും വിക്കറ്റുകൾ വീഴ്ത്തിയപ്പോൾ റാസിഖും സുയാഷും ക്രുണാൽ പാണ്ഡ്യയും ഓരോ വിക്കറ്റും വീഴ്ത്തി.