IPL 2026: ധോണിയെ മറന്നേക്കൂ, ഇനി ആ കാലമില്ല; സിഎസ്കെ ആരാധകർ വസ്തുത മനസിലാക്കണം, റുതുരാജിനെ പിന്തുണച്ച് അശ്വിൻ

ഇന്ത്യൻ പ്രീമിയർ ലീഗിന്റെ 2026 സീസണിൽ പ്ലേ ഓഫിൽ കടക്കാനാവാതെ സിഎസ്കെ പുറത്തായിരിക്കുകയാണ്. ചെന്നെെ സൂപ്പർ കിങ്സിന് 14 മത്സരത്തിൽ നിന്ന് ആറ് ജയങ്ങളാണ് ആകെ സീസണിൽ നേടാനായിരിക്കുന്നത്. സിഎസ്കെയുടെ ടീം കരുത്ത് മികച്ചതായിരുന്നെങ്കിലും പരിക്കും മോശം ഫോമും ടീമിനെ പ്രതികൂലമായി ബാധിച്ച കാര്യങ്ങളാണ്. നായകനെന്ന നിലയിൽ റുതുരാജ് ഗെയ്ക് വാദിനടക്കം വലിയ വിമർശനമാണ് കേൾക്കേണ്ടി വന്നത്. ഈ സീസണോടെ റുതുരാജിനെ നായകസ്ഥാനത്ത് നിന്ന് മാറ്റണമെന്ന ആവശ്യം ശക്തമായി ഉയരുകയാണ്. ഇപ്പോഴിതാ സിഎസ്കെ ആരാധകരെ വിമർശിച്ച് രംഗത്തെത്തിയിരിക്കുകയാണ് മുൻ സിഎസ്കെ താരവും സ്പിൻ ഓൾറൗണ്ടറുമായ ആർ അശ്വിൻ. എംഎസ് ധോണിയുടെ കാലം കഴിഞ്ഞുവെന്ന് സിഎസ്കെ ആരാധകർ ഇനിയെങ്കിലും അംഗീകരിക്കണമെന്നാണ് അശ്വിൻ പറയുന്നത്.

'ഞാൻ റുതുരാജിനെ തീർച്ചയായും ടീമിൽ നിലനിർത്തും കാരണം റുതുരാജ് മികച്ച താരമാണ്. ചില സമയങ്ങളിൽ ആരാധകർ അവനെ വളരെ മോശമായാണ് വിമർശിക്കുന്നത്. അതിന്റെ കാരണം എനിക്കറിയില്ല. റുതുരാജ് അത്തരമൊരു വിമർശനം കേൾക്കേണ്ട താരമല്ല. ഇതൊക്കെ എല്ലാവർക്കും സംഭവിക്കാവുന്നതാണ്. സമയം ആർക്ക് വേണമെങ്കിലും എപ്പോൾ വേണമെങ്കിലും മാറാം.

ഉദാഹരണമായി ഇഷാൻ കിഷനെ നോക്കൂ. ഇഷാനെ കിട്ടാൻ മുംബെെ ലേലത്തിൽ വലിയ പണം മുടക്കാൻ തയ്യാറായി. എന്നാൽ മുംബെെക്കായി അവൻ അത്ര വലിയ പ്രകടനങ്ങളല്ല നടത്തിയിരുന്നത്. ഹെെദരാബാദ് അവന് വേണ്ടി രംഗത്തെത്തി. ഇപ്പോൾ ആ ടീമിനൊപ്പം അവൻ മികവ് കാട്ടുന്നു. സമയം എല്ലാവർക്കും മാറി മറിയും. അതുകൊണ്ടുതന്നെ ആരാധകർ ആരേയും അധിക്ഷേപിക്കുന്നത് ശരിയല്ല' യുട്യൂബ് ചാനലിൽ സംസാരിക്കവെ അശ്വിൻ പറഞ്ഞു.
CSK vs GT IPL 2026: ക്ഷമ കാട്ടിയില്ല, നിർണ്ണായക മത്സരത്തിൽ സഞ്ജു ​ഗോൾ‍‍ഡൻ ഡക്ക്; സിറാജിന്റെ ആദ്യ പന്തിൽ മടക്കം, ആഘോഷിച്ച് ​ഗിൽ
ഇപ്പോഴും ധോണിയെന്ന സൂപ്പർ താരത്തിന്റെ മടങ്ങിവരവുണ്ടാകുമെന്നും സിഎസ്കെയിൽ ധോണിയുഗം ആവർത്തിക്കപ്പെടുമെന്നും പ്രതീക്ഷിക്കുന്ന നിരവധി ആരാധകരുണ്ട്. എന്നാൽ ഈ കാലം കടന്ന് പോയി എന്നതാണ് വസ്തുത. ഇത് അംഗീകരിക്കാൻ പല ആരാധകർക്കും സാധിക്കുന്നില്ലെന്നതാണ് അശ്വിൻ ചൂണ്ടിക്കാട്ടുന്നത്.

'ചെന്നെെ മികച്ച ടീമുകളിൽ ഒന്നായിരുന്നില്ലെന്ന് മനസിലാക്കണം. ധോണിയാണ് എല്ലാം നേടിക്കൊടുത്തത്. അവനാണ് ടീമിനെ കപ്പടിപ്പിച്ചതും പ്ലേ ഓഫിലെത്തിച്ചതും എല്ലാം നേടിക്കൊടുത്തതും. അതൊട്ടും എളുപ്പമല്ല. ഇപ്പോൾ 10 ടീമുകളുണ്ട്. എല്ലാവരും മികച്ച ക്രിക്കറ്റ് കളിക്കുന്നവരാണ്. ധോണിയെ ഇനി ആരാധകർ മറന്നേക്കൂ. സമയം കടന്ന് പോയിരിക്കുന്നു. മറ്റ് ടീമുകളെല്ലാം ഇപ്പോൾ അത് അംഗീകരിച്ച് കളിക്കുന്നു.
CSK vs GT IPL 2026: സഞ്ജു സാക്ഷി, തല്ലിത്തകർത്ത് ശുഭ്മാൻ ഗിൽ; കോഹ്ലിയെ പിന്നിലാക്കി വമ്പൻ നേട്ടം, ഇന്ത്യ ടി20യിലേക്ക് തിരിച്ചു വിളിക്കുമോ?
ധോണിയുടെ സമയത്തുണ്ടായിരുന്നതുപോലൊരു മികവ് ഇനിയുണ്ടാകുമെന്ന് കരുതരുത്. ധോണിയിൽ ഉണ്ടായിരുന്ന അതേ പ്രതീക്ഷ യുവ നായകനിലോ റുതുരാജിലോ വെക്കരുത്. സാഹചര്യം മനസിലാക്കി ആരാധകർ പെരുമാറാൻ തയ്യാറാകണം' ആർ അശ്വിൻ കൂട്ടിച്ചേർത്തു.

സിഎസ്കെയിൽ ചില മാറ്റങ്ങൾ ഉണ്ടാവുമെന്ന കാര്യം ഉറപ്പാണ്. സിഎസ്കെയുടെ നായകസ്ഥാനത്ത് നിന്ന് റുതുരാജിനെ മാറ്റി പകരം സഞ്ജു സാംസൺ വരുമോയെന്നതാണ് കാത്തിരുന്ന് കാണേണ്ടത്. എന്തായാലും സിഎസ്കെയുടെ സമീപകാല തകർച്ചയിൽ ആരാധകർക്ക് വലിയ നിരാശയുണ്ടെന്ന് തന്നെ പറയാം.