IPL 2026: നേടിയത് 14 പന്തിൽ 23 റൺസ്, പക്ഷെ മറ്റാർക്കും നേടാനാവാത്ത റെക്കോഡിട്ട് കെ എൽ രാഹുൽ; ചരിത്രത്തിൽ ഇതാദ്യം

ഇന്ത്യൻ പ്രീമിയർ ലീഗിന്റെ 2026 സീസണിൽ കൊൽക്കത്ത നെെറ്റ് റെെഡേഴ്സിനെതിരേ ഡൽഹി ക്യാപിറ്റൽസ് ആദ്യം ബാറ്റ് ചെയ്യുകയാണ്. പ്രതീക്ഷിച്ച പ്രകടനം നടത്താൻ ഡൽഹിയുടെ ബാറ്റ്സ്മാൻമാർക്ക് സാധിച്ചിട്ടില്ല. 89 റൺസിനിടെ ഡൽഹിയുടെ അഞ്ച് വിക്കറ്റുകൾ കൂടാരം കയറി. സ്പിന്നിനെ തുണച്ച പിച്ചിൽ ഡൽഹി ബാറ്റ്സ്മാൻമാർക്ക് താളം തെറ്റുകയായിരുന്നു. ഡൽഹി ഓപ്പണറായ കെ എൽ രാഹുലിനും പ്രതീക്ഷിച്ച പ്രകടനം നടത്താനായില്ല. 23 പന്തിൽ 14 റൺസാണ് രാഹുൽ നേടിയത്. കാർത്തിക് ത്യാഗിയെ സിക്സർ പറത്താൻ ശ്രമിച്ച രാഹുൽ കാമറൂൺ ഗ്രീനിന്റെ ക്യാച്ചിലാണ് പുറത്തായത്. വലിയ സ്കോറിലേക്കുയരാൻ സാധിച്ചില്ലെങ്കിലും ഐപിഎല്ലിൽ മറ്റാർക്കും നേടാനാവാത്ത റെക്കോഡിട്ടിരിക്കുകയാണ് കെ എൽ രാഹുൽ . മൂന്ന് ഐപിഎൽ ടീമുകൾക്കൊപ്പം 1000 റൺസ് നേടുന്ന ആദ്യത്തെ താരമെന്ന നേട്ടത്തിലേക്കാണ് രാഹുൽ എത്തിയിരിക്കുന്നത്.

മുൻ പഞ്ചാബ് കിങ്സ് നായകനായ കെ എൽ രാഹുൽ 2548 റൺസാണ് ഫ്രാഞ്ചെെസിക്കൊപ്പം നേടിയത്. പിന്നീട് ലഖ്നൗ സൂപ്പർ ജയ്ന്റ്സിന്റെ നായകനായ രാഹുൽ‌ 1410 റൺസാണ് അവർക്കൊപ്പം നേടിയത്. ഇപ്പോൾ ഡൽഹിക്കൊപ്പവും 1000 റൺസ് പിന്നിട്ടിരിക്കുകയാണ്. റോയൽ ചലഞ്ചേഴ്സ് ബംഗളൂരു, സൺറെെസേഴ്സ് ഹെെദരാബാദ് ടീമുകൾക്കൊപ്പവും കളിച്ചിട്ടുള്ള താരമാണ് രാഹുൽ.

ഡൽഹിക്കൊപ്പം 23 ഇന്നിങ്സിൽ നിന്നാണ് രാഹുൽ 1000 റൺസ് ക്ലബ്ബിലെത്തിയിരിക്കുന്നത്. ഒരു ഫ്രാഞ്ചെെസിക്കൊപ്പം ഏറ്റവും വേഗത്തിൽ 1000 റൺസ് നേടുന്ന താരമെന്ന റെക്കോഡിൽ മൂന്നാം സ്ഥാനത്തേക്കെത്താൻ രാഹുലിന് സാധിച്ചു. ലിൻഡൽ സിമ്മൻസാണ് ഈ റെക്കോഡിൽ രാഹുലിനൊപ്പമുളളത്. മുംബെെ ഇന്ത്യൻസിനൊപ്പം 23 ഇന്നിങ്സിൽ നിന്ന് സിമ്മൻസ് 1000 റൺസ് നേടിയിരുന്നു.
സൂര്യ പുറത്ത്, ടി20 ക്യാപ്റ്റനായി ശ്രേയസ് അയ്യർ എത്തും; വെെസ് ക്യാപ്റ്റൻ സഞ്ജുവോ? ഐപിഎൽ 2026ന് പിന്നാലെ ഇന്ത്യൻ ടീമിൽ വമ്പൻ മാറ്റം
പഞ്ചാബ് കിങ്സിനൊപ്പവും 23 ഇന്നിങ്സിൽ നിന്ന് 1000 റൺസ് ക്ലബ്ബിലെത്താൻ രാഹുലിന് സാധിച്ചിരുന്നു. 20 ഇന്നിങ്സിൽ നിന്ന് ആർസിബിക്കായി 1000 റൺസ് ക്ലബ്ബിലെത്തിയ ക്രിസ് ഗെയ്ലാണ് ഈ റെക്കോഡിൽ തലപ്പത്ത്. പഞ്ചാബ് കിങ്സിനായി 21 ഇന്നിങ്സിൽ നിന്ന് ഈ നേട്ടത്തിലെത്തിയ ഷോൺ മാർഷ് ഈ റെക്കോഡിൽ രണ്ടാം സ്ഥാനത്തുണ്ട്.

കെ എൽ രാഹുൽ നിലവിൽ സീസണിലെ റൺ‌വേട്ടക്കാരിൽ മൂന്നാം സ്ഥാനത്തുണ്ട്. 11 മത്സരത്തിൽ നിന്ന് 468 റൺസാണ് രാഹുലിന്റെ അക്കൗണ്ടിലുള്ളത്. പുറത്താവാതെ 152 റൺസ് നേടിയതാണ് ഈ സീസണിലെ ഉയർന്ന സ്കോർ. 46.80 ശരാശരിയിലും 180 സ്ട്രെെക്ക് റേറ്റിലും കളിക്കുന്ന രാഹുൽ ഒരു സിക്സും മൂന്ന് ഫിഫ്റ്റിയും നേടിക്കഴിഞ്ഞു.
Sanju Samson: സഞ്ജുവിന്റെ വലിയ സ്വപ്നം, ഇന്ത്യ ടി20 വെെസ് ക്യാപ്റ്റനാക്കുമോ? അനുകൂലമാകുന്നത് മൂന്ന് കാര്യങ്ങൾ, അന്തിമ തീരുമാനം ഗംഭീറിന്റേത്

കെകെആറിനെതിരേ ടോസ് നഷ്ടപ്പെട്ട് ആദ്യം ബാറ്റ് ചെയ്യേണ്ടി വന്ന ഡൽഹിക്കായി ഓപ്പണർ പതും നിസങ്ക മികച്ച പ്രകടനമാണ് നടത്തിയത്. 29 പന്തിൽ അഞ്ച് ഫോറും മൂന്ന് സിക്സും ഉൾപ്പെടെ 172.41 സ്ട്രെെക്ക് റേറ്റിൽ 50 റൺസ് നേടാൻ പതും നിസങ്കയ്ക്ക് സാധിച്ചു. മൂന്നാമനായി ക്രീസിലെത്തിയ നിതീഷ് റാണ 10 പന്തിൽ‌ എട്ട് റൺസെടുത്ത് പുറത്തായി. കാമറൂൺ ഗ്രീനിനാണ് വിക്കറ്റ്. സമീർ റിസ്വി ഏഴ് പന്തിൽ മൂന്ന് റൺസെടുത്ത് സുനിൽ നരെയ്ന് മുന്നിൽ പുറത്തായപ്പോൾ‌ മധ്യനിരയിലെ വിശ്വസ്തൻ ട്രിസ്റ്റൻ സ്റ്റബ്സ് നാല് പന്തിൽ‌ രണ്ട് റൺസുമായി അനുകുൽ റോയ്ക്ക് മുന്നിൽ കീഴടങ്ങി.