IPL 2026: പഞ്ചാബും രാജസ്ഥാനും തോറ്റു, കോളടിച്ചത് സിഎസ്കെയ്ക്ക്? പ്ലേ ഓഫിലേക്കെത്താൻ സുവർണ്ണാവസരം, പക്ഷെ ആ വെല്ലുവിളി

ഇന്ത്യൻ പ്രീമിയർ ലീഗിന്റെ 2026 സീസൺ അവസാന ഘട്ടത്തിലേക്ക് കടക്കവെ പോരാട്ടം മുറുകുകയാണ്. ആരൊക്കെ പ്ലേ ഓഫിലേക്കെത്തുമെന്ന് ഉറപ്പിച്ച് പറയാനാവാത്ത അവസ്ഥയാണെന്ന് പറയാം. നിലവിലെ ചാമ്പ്യന്മാരായ റോയൽ ചലഞ്ചേഴ്സ് ബംഗളൂരു ഇതിനോടകം പ്ലേ ഓഫിൽ സീറ്റുറപ്പിച്ച് കഴിഞ്ഞിട്ടുണ്ട്. ഇനിയുള്ള മൂന്ന് സീറ്റുകളിലേക്കായി കടുത്ത പോരാട്ടമാണ് നടക്കുന്നത്. എട്ട് ടീമുകൾക്ക് ഇപ്പോഴും പ്ലേ ഓഫ് സാധ്യതയുണ്ടെന്നതാണ് എടുത്തു പറയേണ്ടത്. അവസാന റൗണ്ടിൽ ആരൊക്കെ പ്ലേ ഓഫിലേക്ക് ഓടിക്കയറുമെന്നാണ് എല്ലാവരും ഉറ്റുനോക്കുന്നത്. പഞ്ചാബ് കിങ്സ് അവസാന ആറ് മത്സരത്തിലും രാജസ്ഥാൻ റോയൽസ് അവസാന മൂന്ന് മത്സരത്തിലും തോറ്റത് ചെന്നെെ സൂപ്പർ കിങ്സിന് അനുഗ്രഹമായി മാറിയിരിക്കുകയാണ്. രണ്ട് മത്സരം മാത്രം ശേഷിക്കെ സിഎസ്കെയ്ക്ക് പ്ലേ ഓഫിലേക്കെത്താൻ അവസരമുണ്ടെന്ന് തന്നെ പറയാം.

പ്ലേ ഓഫിലേക്കെത്താൻ 44.9% സാധ്യതയാണ് ഇപ്പോൾ സിഎസ്കെയ്ക്കുള്ളത്. രണ്ടാം സ്ഥാനത്തേക്കെത്താനുള്ള സാധ്യത സിഎസ്കെയ്ക്ക് 25% ആണുള്ളത്. 12 മത്സരത്തിൽ നിന്ന് 12 പോയിന്റോടെ ആറാം സ്ഥാനത്താണ് നിലവിൽ സിഎസ്കെ. 0.027 ആണ് നെറ്റ് റൺറേറ്റ്. സൺറെെസേഴ് ഹെെദരാബാദിനെതിരേ സ്വന്തം തട്ടകത്തിലും ഗുജറാത്തിനെതിരേ അഹമ്മദാബാദിലുമാണ് ഇനി സിഎസ്കെയ്ക്ക് മത്സരമുള്ളത്.

ഇന്നത്തെ മത്സരത്തിൽ സിഎസ്കെയ്ക്ക് എന്ത് വിലകൊടുത്തും വമ്പൻ ജയം നേടിയെടുക്കേണ്ടതായുണ്ട്. ഹെെദരാബാദ് നിസാരക്കാരുടെ നിരയല്ല. പ്ലേ ഓഫ് സീറ്റിലേക്കെത്താൻ ഹെെദരാബാദിനും വിജയം അനിവാര്യമാണ്. അതുകൊണ്ടുതന്നെ പോരാട്ടം തീപാറുമെന്ന കാര്യം ഉറപ്പാണ്. സിഎസ്കെയെ സംബന്ധിച്ച് സഞ്ജു സാംസണിന്റേയും റുതുരാജ് ഗെയ്ക് വാദിന്റേയും പ്രകടനം വളരെ നിർണ്ണായകമാണ്.
RR vs DC IPL 2026: വെെഭവിന് ചരിത്ര റെക്കോഡ്, ഇന്ത്യൻ സിക്സർ വേട്ടക്കാരിൽ വമ്പൻ നേട്ടം; അഭിഷേകിനെ മറികടന്നു, ഇനി തലപ്പത്ത്
രണ്ട് പേരും ഫോമിലേക്കെത്തിയാൽ സിഎസ്കെയ്ക്ക് ജയം പ്രയാസമായിരിക്കില്ല. ഹെെദരാബാദിനോട് സീസണിലെ ആദ്യ നേർക്കുനേർ പോരാട്ടത്തിൽ സിഎസ്കെ തോറ്റിരുന്നു. ഗുജറാത്ത് ടെെറ്റൻസിനോടും ആദ്യ മത്സരത്തിൽ തോൽവി നേരിട്ടതാണ്. അതുകൊണ്ടുതന്നെ രണ്ടാം പാദത്തിൽ രണ്ട് ടീമിനേയും വീഴ്ത്തണമെങ്കിൽ സിഎസ്കെയ്ക്ക് നന്നായി വിയർക്കേണ്ടി വരും.

ഗുജറാത്തിന് ഒരു ജയം അകലെ പ്ലേ ഓഫിൽ സീറ്റുറപ്പിക്കാം. നിലവിൽ 13 മത്സരത്തിൽ നിന്ന് 16 പോയിന്റാണ് ഗുജറാത്തിനുള്ളത്. ഹെെദരാബാദിന് രണ്ട് മത്സരത്തിലും ജയിച്ചാലെ 18 പോയിന്റിലേക്കെത്താൻ സാധിക്കൂ. പഞ്ചാബിന്റെ പ്ലേ ഓഫ് പ്രതീക്ഷ ഏറെക്കുറെ അവസാനിച്ചുവെന്ന് തന്നെ പറയാം. ശേഷിക്കുന്ന ഒരു മത്സരത്തിൽ ജയിച്ചാലും പരമാവധി 15 പോയിന്റിലേക്കെത്താനെ പഞ്ചാബിന് സാധിക്കൂ.
RCB vs PBKS IPL 2026: ആർസിബി പ്ലേ ഓഫിൽ, 11 വർഷത്തിന് ശേഷം പഞ്ചാബ് നാണക്കേടിന്റെ റെക്കോഡിൽ; ശ്രേയസിന് കനത്ത തിരിച്ചടി

രാജസ്ഥാൻ റോയൽസിന് ശേഷിക്കുന്ന രണ്ട് മത്സരങ്ങൾ ജയിച്ചാൽ 16 പോയിന്റിലേക്കെത്താൻ സാധിക്കും. ഡൽഹിക്ക് ഒരു മത്സരം മാത്രം ബാക്കി നിൽക്കെ പരമാവധി 14 പോയിന്റാണ് നേടാനാവുക. അതുകൊണ്ടുതന്നെ ഡൽഹിക്ക് പ്ലേ ഓഫ് കടുപ്പമാണ്. രണ്ട് മത്സരം ശേഷിക്കെ 15 പോയിന്റുള്ള കെകെആറിനും പ്ലേ ഓഫിലേക്കെത്തുക ഇനി പ്രയാസമായിരിക്കും.

സിഎസ്കെ എല്ലാവരേയും ഞെട്ടിച്ച് പ്ലേ ഓഫിലേക്കെത്തുമെന്ന് തന്നെ പ്രതീക്ഷിക്കാം. അഞ്ച് തവണ ചാമ്പ്യന്മാരായ സിഎസ്കെയ്ക്ക് പരിക്കുകൾ വലിയ തിരിച്ചടി നൽകുന്നുണ്ടെങ്കിലും ഈ വെല്ലുവിളിയെ മറികടന്ന് പ്ലേ ഓഫിലേക്കെത്താൻ ടീമിന് സാധിക്കുമോയെന്നതാണ് കാത്തിരുന്ന് കാണേണ്ടത്.