IPL 2026: ലേലത്തിൽ ആർക്കും വേണ്ടാത്തവർ, പക്ഷെ വിജയ് ഹസാരെ ട്രോഫിയിൽ മിന്നിച്ചു! ഇനി വിളിയെത്തുമോ? പ്രതീക്ഷയോടെ ഇവർ‌

ഇന്ത്യൻ പ്രീമിയർ ലീഗിന്റെ 2026 സീസണിനായുള്ള പടയൊരുക്കം ടീമുകൾ ആരംഭിച്ച് കഴിഞ്ഞു. ഇതിനോടകം മിനി താരലേലമടക്കം പൂർത്തിയായതിനാൽ ഇനി മുന്നൊരുക്കത്തിന്റെ സമയമാണ്. അവസാന സീസണിൽ സംഭവിച്ച തോൽവികൾ കൂട്ടിയും കിഴിച്ചും സംഭവിച്ച തെറ്റുകൾ തിരുത്തി തിരിച്ചുവരവിനാണ് ടീമുകൾ തയ്യാറെടുക്കുന്നത്. ഇത്തവണത്തെ മിനി താരലേലത്തിൽ പല പ്രതിഭാശാലികളായ താരങ്ങൾക്കും അവസരം ലഭിക്കാതെ പോയി.മികച്ച പ്രകടനം അവകാശപ്പെടാൻ സാധിക്കുമായിരുന്നിട്ടും ദൗർഭാഗ്യവശാൽ തഴയപ്പെട്ട ചില താരങ്ങളും ഇതിൽ ഉൾപ്പെടുന്നു. എന്നാൽ ഇക്കഴിഞ്ഞ വിജയ് ഹസാരെ ട്രോഫിയിൽ കിടിലൻ പ്രകടനം നടത്തി തഴയപ്പെട്ട ചില താരങ്ങൾ വീണ്ടുമൊരു അവസരത്തിനായി കാത്തിരിക്കുന്നുണ്ട്. ഇത്തരത്തിൽ വിജയ് ഹസാരെ ട്രോഫിയിൽ ശോഭിച്ച് ഐപിഎല്ലിൽ പകരക്കാരുടെ റോളിൽ വിളി പ്രതീക്ഷിക്കുന്നവർ ആരൊക്കെയാണെന്ന് പരിശോധിക്കാം.

അൻമോൽപ്രീത് സിങ്

ഇത്തവണത്തെ മിനി താരലേലത്തിൽ തഴയപ്പെട്ട താരങ്ങളിലൊരാളാണ് അൻമോൽപ്രീത് സിങ്. നേരത്തെ മുംബെെ ഇന്ത്യൻസ്, സൺറെെസേഴ്സ് ഹെെദരാബാദ് ടീമുകളുടെ ഭാഗമായി 9 മത്സരങ്ങൾ കളിച്ചിട്ടുള്ള താരമാണ് അദ്ദേഹം. എന്നാൽ ഇത്തവണ അവസരം ലഭിക്കാതെ തഴയപ്പെട്ടു. എന്നാൽ വിജയ് ഹസാരെ ട്രോഫിയിൽ പഞ്ചാബിനെ സെമിയിലേക്കെത്തിക്കുന്നതിൽ നിർണ്ണായക പങ്ക് വഹിക്കാൻ അൻമോൽപ്രീതിന് സാധിച്ചു. വലം കെെയൻ ബാറ്റ്സ്മാൻ 9 മത്സരത്തിൽ നിന്ന് 527 റൺസാണ് നേടിയത്. നാല് ഫിഫ്റ്റിയും രണ്ട് സെഞ്ചുറിയും ഇതിൽ ഉൾപ്പെടും.

അതർവ ടെയ്ഡെ

ഐപിഎൽ 2025ൽ സൺറെെസേഴ്സ് ഹെെദരാബാദിന്റെ ഭാഗമായിരുന്ന താരമാണ് ഇടം കെെയൻ ബാറ്റ്സ്മാനായ അതർവ ടെയ്ഡെ. ഒരു മത്സരം കളിച്ച് 13 റൺസാണ് താരത്തിന് നേടാനായത്. ഇത്തവണ തഴയപ്പെട്ട ടെയ്ഡെയെ ലേലത്തിൽ വാങ്ങാൻ ആരും തയ്യാറായുമില്ല. എന്നാൽ വിജയ് ഹസാരെ ട്രോഫിയിൽ 25കാരൻ മികച്ച പ്രകടനമാണ് കാഴ്ചവെച്ചത്. ഏഴ് മത്സരത്തിൽ നിന്ന് 396 റൺസാണ് താരം നേടിയത്. ഫെെനലിൽ 128 റൺസും താരം നേടി കളിയിലെ താരമാവുകയും ചെയ്തു. മൂന്ന് ഫിഫ്റ്റിയും ഒരു സെഞ്ചുറിയുമാണ് താരത്തിന് നേടാനായത്.
IND vs NZ: ​ടി20 പരമ്പര വരുന്നു, സഞ്ജുവിനെ പൂട്ടാൻ കിവീസിന് മൂന്ന് പ്ലാൻ? പൊളിച്ചടുക്കാൻ മലയാളി താരം; ആരാധകർക്ക് പ്രതീക്ഷ

ചേതൻ സക്കറിയ

ദാരിദ്ര്യം നിറഞ്ഞ സാഹചര്യത്തിൽ നിന്ന് പൊരുതി വളർന്ന പേസ് ബൗളറാണ് ചേതൻ സക്കറിയ. ഐപിഎൽ 2025ൽ കെകെആറിനായി ഒരു മത്സരമാണ് ചേതൻ കളിച്ചത്. രാജസ്ഥാൻ റോയൽസ്, ഡൽഹി ക്യാപിറ്റൽസ് ടീമുകളുടേയും ഭാഗമായിരുന്ന ചേതൻ 20 മത്സരത്തിൽ നിന്ന് 20 വിക്കറ്റാണ് ഐപിഎല്ലിൽ നേടിയിട്ടുള്ളത്. ഇത്തവണ ലേലത്തിൽ ആർക്കും വേണ്ടാതിരുന്ന താരമാണ് ചേതൻ. വിജയ് ഹസാരെ ട്രോഫിയിൽ എട്ട് മത്സരത്തിൽ നിന്ന് 17 വിക്കറ്റാണ് താരം നേടിയത്. ഐപിഎല്ലിൽ ആരെങ്കിലും ഇനി ചേതനെ പരിഗണിക്കുമോയെന്ന് കാത്തിരുന്ന് കാണാം.

ലളിത് യാദവ്

മുൻ ഡൽഹി ക്യാപിറ്റൽസ് ഓൾറൗണ്ടറായ ലളിത് യാദവ് ഇത്തവണത്തെ ഐപിഎൽ ലേലത്തിൽ അൺസോൾഡായി. 29കാരനായ താരം വിജയ് ഹസാരെ ട്രോഫിയിൽ കിടിലൻ പ്രകടനമാണ് കാഴ്ചവെച്ചത്. ഏഴ് ഇന്നിങ്സിൽ നിന്ന് 460 റൺസാണ് താരം നേടിയത്. മൂന്ന് ഫിഫ്റ്റിയും രണ്ട് സെഞ്ചുറിയും താരം നേടി. ഓഫ് സ്പിന്നറായ താരം അഞ്ച് വിക്കറ്റും നേടി. ഓൾറൗണ്ടർ റോളിൽ ഐപിഎല്ലിലേക്ക് താരം ഇനിയും വിളി പ്രതീക്ഷിക്കുന്നു.

IPL 2026: സഞ്ജുവിനെ കെെവിട്ട് ജഡേജയെ വാങ്ങി, രാജസ്ഥാന് കിട്ടിയത് എട്ടിന്റെ പണി? തിരിച്ചടിയായി പരിക്കും; ആശങ്കയോടെ ആരാധകർ

സത്യനാരായണ രാജു

ഐപിഎൽ 2025ൽ കരുത്തരായ മുംബെെ ഇന്ത്യൻസിന്റെ ഭാഗമായിരുന്ന താരമാണ് സത്യനാരായണ രാജു. രണ്ട് മത്സരം കളിച്ച് ഒരു വിക്കറ്റാണ് താരം നേടിയത്. ആന്ധ്രാപ്രദേശ് കാരനായ താരം വിജയ് ഹസാരെ ട്രോഫിയിൽ കിടിലൻ പ്രകടനമാണ് പുറത്തെടുത്തത്. ഏഴ് മത്സരത്തിൽ നിന്ന് 21 വിക്കറ്റോടെ ടൂർണമെന്റിലെ വിക്കറ്റ് നേട്ടക്കാരിൽ ഒന്നാമനാവാൻ സത്യനാരായണക്കായി. 5.2 എന്ന മികച്ച ഇക്കോണമിയിൽ പന്തെറിഞ്ഞ താരം ഐപിഎല്ലിൽ വിളി പ്രതീക്ഷിക്കുന്നു.