IPL 2026: വീണ്ടും സിഎസ്കെയ്ക്ക് പരിക്കിന്റെ പണി, ആയുഷ് മാത്രെ മൂന്ന് ആഴ്ചത്തേക്ക് പുറത്ത്? ആരാധകർക്ക് ആശങ്ക

ഇന്ത്യൻ പ്രീമിയർ ലീഗിന്റെ 2026 സീസണിൽ ചെന്നെെ സൂപ്പർ കിങ്സിന് പരിക്കിന്റെ പണി തുടരുന്നു. യുവതാരവും മികച്ച ഫോമിൽ കളിക്കുന്ന താരവുമായ ആയുഷ് മാത്രെ പരിക്കിനെത്തുടർന്ന് പുറത്തായിരിക്കുകയാണെന്നാണ് റിപ്പോർട്ടുകൾ പുറത്തുവരുന്നത്. മൂന്ന് ആഴ്ചത്തെ വിശ്രമം മാത്രെക്ക് വേണ്ടിവരുമെന്നാണ് വിവരം. എക്സ്പ്രസ് സ്പോർട്സാണ് ഇത് സംബന്ധിച്ച റിപ്പോർട്ട് പുറത്തുവിട്ടിരിക്കുന്നത്. ഇന്നലെ നടന്ന സൺറെെസേഴ്സ് ഹെെദരാബാദിനെതിരായ മത്സരത്തിനിടെയാണ് മാത്രെക്ക് പരിക്കേറ്റത്. കാൽത്തുടക്ക് പരിക്കേറ്റ മാത്രെ റിട്ടേർട്ട് ഹർട്ടായാണ് മത്സരത്തിനിടെ മടങ്ങിയത്. മാത്രെയുടെ പരിക്ക് സിഎസ്കെയുടെ തോൽവിയുടെ നിർണ്ണായക ഘടകമായി മാറുകയും ചെയ്തിരുന്നു. ഇപ്പോൾ‌ താരത്തിന് മൂന്ന് ആഴ്ചത്തെ വിശ്രമം വേണ്ടിവന്നാൽ സിഎസ്കെയ്ക്കത് കൂടുതൽ തിരിച്ചടിയായി മാറിയേക്കും.

മൂന്നാം നമ്പറിൽ കളിക്കുന്ന മാത്രെ ഇത്തവണത്തെ ഐപിഎല്ലിൽ തകർപ്പൻ ഫോമിലാണ് മുന്നേറിയിരുന്നത്. സിഎസ്കെ നിരയിൽ സ്ഥിരതയോടെ കളിക്കുന്ന നിലവിലെ ഏക താരമാണ് മാത്രെയെന്ന് പറഞ്ഞാലും തെറ്റാകില്ല. ഹെെദരാബാദിനെതിരേ 13 പന്തിൽ 30 റൺസെടുത്ത് നിൽക്കവെയാണ് പരിക്കേറ്റ് മാത്രെ മടങ്ങിയത്. കെകെആറിനെതിരേ 17 പന്തിൽ 38 റൺസെടുത്ത മാത്രെ ഡൽഹിക്കെതിരേ 36 പന്തിൽ 59 റൺസും എടുത്തിരുന്നു. പഞ്ചാബ് കിങ്സിനെതിരേ 43 പന്തിൽ 73 റൺസെടുത്തും താരം മികവ് കാട്ടിയിരുന്നു.

മാത്രെയുടെ പരിക്ക് നിലവിലെ സാഹചര്യത്തിൽ സിഎസ്കെയ്ക്ക് വലിയ തിരിച്ചടിയാണ്. ആദ്യ മൂന്ന് മത്സരത്തിൽ തോറ്റ സിഎസ്കെ പിന്നീട് തുടർച്ചയായ രണ്ട് മത്സരത്തിൽ‌ ജയം നേടി. എന്നാൽ ആറാം മത്സരത്തിൽ വീണ്ടും തോറ്റു. ഓപ്പണർമാർക്ക് മികച്ച ഫോമിൽ കളിക്കാൻ സാധിക്കാത്ത സാഹചര്യത്തിൽ മാത്രെയുടെ ബാറ്റിങ് സിഎസ്കെയ്ക്ക് വലിയ ആശ്വാസമായിരുന്നു. ഇതിനിടെയാണ് മാത്രെയുടെ പരിക്ക്. ഇത് സിഎസ്കെയ്ക്ക് കനത്ത തിരിച്ചടിയാവുമെന്ന കാര്യം ഉറപ്പാണ്.
IPL 2026: സഞ്ജു ബ്രില്യൻസ്, അഭിഷേക് ശർമയുടെ വിക്കറ്റ് നേടിയ നിർണ്ണായക തീരുമാനം; അത്ഭുതപ്പെട്ട് ജാമി ഓവർട്ടൻ, സംഭവം ഇങ്ങനെ
ഈ സീസണിൽ പരിക്കിന്റെ പണി സിഎസ്കെയ്ക്ക് കിട്ടുന്നത് ഇതാദ്യമല്ല. തുടക്കം മുതൽ പരിക്ക് സിഎസ്കെയെ വേട്ടയാടുകയാണെന്ന് പറയാം. ഇത്തവണ വലിയ പ്രതീക്ഷയോടെ ടീമിലേക്ക് കൊണ്ടുവന്ന നതാൻ ഇല്ലിസ് ആദ്യം പരിക്കേറ്റ് പുറത്തായി. ഇത് സിഎസ്കെയുടെ ഡെത്തോവറിലെ പദ്ധതികളെ പ്രതികൂലമായി ബാധിച്ചു. പവർപ്ലേയിലെ പ്രധാന ബൗളറായ ഖലീൽ അഹമ്മദും കഴിഞ്ഞ ദിവസമാണ് പരിക്കേറ്റ് പുറത്തായത്.

ഡെവാൾഡ് ബ്രെവിസും പരിക്കിന്റെ പിടിയിലായിരുന്നു. ഇപ്പോൾ ഫിറ്റന്സ വീണ്ടെടുത്ത് തിരിച്ചുവന്നെങ്കിലും മികച്ച ഫോമിലാണെന്ന് പറയാനാവില്ല. സിഎസ്കെ മുൻ നായകനും ഇതിഹാസവുമായ എംഎസ് ധോണി പരിക്കിനെത്തുടർന്ന് ഈ സീസണിലെ ഒറ്റ മത്സരം പോലും കളിച്ചിട്ടില്ല. മുംബെെ ഇന്ത്യൻസിനെതിരായ അടുത്ത മത്സരത്തിൽ ധോണി കളിക്കുമെന്നാണ് പ്രതീക്ഷിക്കപ്പെടുന്നത്.

ISL 2026: ആരാധകർ ത്രില്ലിൽ, 'ഹെഡ്' ഉയർത്തി കൊമ്പന്മാർ; ജംഷഡ്പൂരിനെ ചാരമാക്കി കൊച്ചിയിൽ ബ്ലാസ്റ്റേഴ്സ് പടയോട്ടം

ഈ സീസണിൽ പ്ലേ ഓഫ് സാധ്യത നിലനിർത്താൻ ഇനിയുള്ള മത്സരങ്ങളിൽ സിഎസ്കെയ്ക്ക് തുടർ ജയങ്ങൾ അത്യാവശ്യമാണ്. ഇതിനിടെയാണ് പരിക്ക് തുടർച്ചയായി സിഎസ്കെയ്ക്ക് തലവേദന സൃഷ്ടിക്കുന്നത്. മാത്രയുടെ അഭാവത്തിൽ ഉർവിൽ പട്ടേലിനെ പ്ലേയിങ് ഇലവനിലേക്ക് കൊണ്ടുവരാൻ സിഎസ്കെ നിർബന്ധിതരാവും. ശക്തമായി തിരിച്ചെത്താൻ സിഎസ്കെയ്ക്ക് സാധിക്കുമോയെന്നതാണ് കണ്ടറിയേണ്ടത്.