IPL 2026: സ‌ഞ്ജു സാംസണ്‍ ഇനി എതിരാളി, രാജസ്ഥാന്‍റെ പേടി ഇതാണ്; ചെന്നെെയ്ക്കായി കന്നിയങ്കത്തില്‍ മിന്നിക്കുമോ മലയാളി താരം?

2026 ഇന്ത്യന്‍ പ്രീമിയര്‍ ലീഗ് സീസണ്‍ ഷെഡ്യൂള്‍ പുറത്തുവന്നപ്പോള്‍ എല്ലാവരും ഉറ്റുനോക്കിയത് ചെന്നെെ സൂപ്പര്‍ കിങ്സിന്‍റെ ആദ്യ മത്സരം എപ്പോഴാണ് എന്നറിയുന്നതിന് വേണ്ടിയായിരുന്നു. സഞ്ജു സാംസണ്‍ ചെന്നെെ ടീമിന് വേണ്ടി എപ്പോള്‍ അരങ്ങേറ്റം കുറിക്കും എന്ന കാര്യമാണ് ആരാധകര്‍ക്ക് അറിയേണ്ടിയിരുന്നത്. ഇപ്പോഴിതാ ഇക്കാര്യത്തില്‍ വ്യക്തത വന്നിരിക്കുകയാണ്. സഞ്ജുവിന്‍റെയും ചെന്നെെ ടീമിന്‍റെയും പുതിയ സീസണിലെ ആദ്യ മത്സരം മാര്‍ച്ച് 30-ന് രാജസ്ഥാന്‍ റോയല്‍സിനെതിരെയാണ്. ഗുവാഹത്തിയിലെ ബര്‍സപാര സ്റ്റേഡിയത്തില്‍ വെച്ചാണ് ഈ മത്സരം നടക്കുക. ചെന്നെെ ടീമിന്‍റെ മഞ്ഞക്കുപ്പായത്തിലെ സഞ്ജുവിന്‍റെ ആദ്യ എതിരാളികള്‍ തന്നെ രാജസ്ഥാന്‍ റോയല്‍സായി മാറിയതാണ് ആരാധകരെ ആവേശത്തിലാഴ്ത്തുന്നത്. പഴയ ടീമിനെതിരെ സഞ്ജു മിന്നിക്കുമെന്നാണ് ചെന്നെെ ആരാധകരുടെ പ്രതീക്ഷ. എന്നാല്‍ രാജസ്ഥാന്‍ റോയല്‍സിന്‍റെ പേടി ജോഫ്ര ആര്‍ച്ചര്‍ ഉള്‍പ്പടെയുള്ള ബോളര്‍മാരെ സഞ്ജു തല്ലിയൊതുക്കുമോ എന്നതാണ്. ടി20 ലോകകപ്പില്‍ ഇംഗ്ലണ്ടിനെതിരെ സെമിഫൈനലിന് മുമ്പുള്ള പ്രധാന ചര്‍ച്ചാ വിഷയം സഞ്ജു സാംസണ്‍ - ജോഫ്ര ആര്‍ച്ചര്‍ പോരാട്ടമായിരുന്നു.
ICC T20 Rankings: ഐസിസി റാങ്കിങ്ങിലും മിന്നിച്ച് സഞ്ജു, അഭിഷേകിന് ഭീഷണിയായി ഇഷാന്‍; വരുണിന് ഒന്നാം സ്ഥാനം നഷ്ടമായി
എന്നാല്‍ സഞ്ജുവിനെതിരെ കളത്തിലിറങ്ങിയപ്പോള്‍ രാജസ്ഥാന്‍ റോയല്‍സിന്‍റെ പ്രധാന ബോളറായ ജോഫ്ര ആര്‍ച്ചര്‍ക്ക് തൊട്ടതെല്ലാം പിഴച്ചു. ആര്‍ച്ചറെ കടന്നാക്രമിക്കുന്ന ശൈലിയാണ് സഞ്ജു സാംസണ്‍ സ്വീകരിച്ചത്. മത്സരത്തില്‍ ഇംഗ്ലീഷ് പേസര്‍ക്കെതിരെ 14 പന്തില്‍ 39 റണ്‍സാണ് സഞ്ജു അടിച്ചുകൂട്ടിയത്. 4 സിക്സുകളും 3 ഫോറുകളുമാണ് ആര്‍ച്ചര്‍ക്കെതിരെ സഞ്ജു നേടിയത്. മത്സരത്തില്‍ 42 പന്തില്‍ 89 റണ്‍സെടുത്താണ് സഞ്ജു പുറത്തായത്. സഞ്ജുവിന്‍റെ മികവില്‍ ആവേശകരമായ വിജയം ഇന്ത്യ നേടിയെടുക്കുകയും ചെയ്തു.

ടി20 ലോകകപ്പ് സെമിഫൈനലിന് മുമ്പ് ജോഫ്ര ആര്‍ച്ചര്‍ക്കെതിരെ സഞ്ജുവിന്‍റെ പ്രകടനം അത്ര മികച്ചതായിരുന്നില്ല. എന്നാല്‍ ഒരൊറ്റ മത്സരം കൊണ്ട് ആര്‍ച്ചറെ സഞ്ജു തൂക്കിയടിക്കുകയാണ് ചെയ്തത്. ഐപിഎല്ലിലെ ആദ്യ മത്സരത്തിലും സഞ്ജു ജോഫ്ര ആര്‍ച്ചര്‍ക്കെതിരെ ആധിപത്യം തുടരുമോ എന്നതാണ് രാജസ്ഥാന്‍ റോയല്‍സിന്‍റെ പേടി. സഞ്ജുവിന്‍റെ വെടിക്കെട്ടില്‍ ആത്മവിശ്വാസം നഷ്ടമായ ആര്‍ച്ചര്‍ തന്‍റെ മികവിലേക്ക് തിരിച്ചുവരുമോ എന്നതും കണ്ടറിയാം.

അതേ സമയം, ഗുവാഹത്തിയില്‍ അത്ര മികച്ച പ്രകടനമല്ല സഞ്ജു സാംസണ്‍ ഇതുവരെ നടത്തിയിട്ടുള്ളത്. ന്യൂസിലന്‍ഡിനെതിരെ ഇക്കഴിഞ്ഞ ജനുവരിയില്‍ നടന്ന ടി20 പരമ്പരയിലെ ഒരു മത്സരം ഇന്ത്യ കളിച്ചത് ഗുവാഹത്തിയില്‍ വെച്ചാണ്. ഈ മത്സരത്തില്‍ ഓപ്പണറായി ഇറങ്ങിയ സഞ്ജു സാംസണ്‍ ഗോള്‍ഡന്‍ ഡെക്കായി മടങ്ങിയിരുന്നു. രാജസ്ഥാന്‍ റോയല്‍സിന് വേണ്ടി കഴിഞ്ഞ 3 സീസണുകളിലായി 5 ഇന്നിങ്സുകളിലാണ് ഗുവാഹത്തിയില്‍ സഞ്ജു ബാറ്റ് ചെയ്തിട്ടുള്ളത്. 130.99 സ്ട്രൈക്ക് റേറ്റില്‍ 93 റണ്‍സാണ് സഞ്ജു ഈ മൈതാനത്ത് സ്കോര്‍ ചെയ്തിട്ടുള്ളത്.
CSK IPL 2026: കീപ്പര്‍ ധോണിയോ സഞ്ജുവോ? 'തല' എല്ലാ മത്സരങ്ങളിലും കളിക്കുമെന്ന് ചെന്നെെ; റോള്‍ എന്താണെന്ന് തീരുമാനിച്ചിട്ടില്ല
ഐപിഎല്ലില്‍ സഞ്ജു ഗുവാഹത്തിയില്‍ അവസാനം കളിച്ചത് ചെന്നെെ സൂപ്പര്‍ കിങ്സിനെതിരെയാണ് എന്നതാണ് രസകരമായ കാര്യം. അന്ന് 16 പന്തില്‍ 20 റണ്‍സെടുത്ത താരം നൂര്‍ അഹമ്മദിന് വിക്കറ്റ് സമ്മാനിക്കുകയായിരുന്നു. 2025 മാര്‍ച്ച് 30ന് രാജസ്ഥാന്‍ റോയല്‍സിന് വേണ്ടി ചെന്നെെക്കെതിരെ ഈ മൈതാനത്ത് കളിച്ച സഞ്ജു 2026 മാര്‍ച്ച് 30ന് ചെന്നെെക്ക് വേണ്ടി രാജസ്ഥാനെതിരെ കളിക്കാന്‍ ഒരുങ്ങുകയാണ്. സഞ്ജു മിന്നിക്കുമെന്ന പ്രതീക്ഷയില്‍ തന്നെയാണ് ചെന്നെെ ആരാധകര്‍. ഗുവാഹത്തിയിലെ ഇതുവരെയുള്ള പ്രകടനം ശരാശരി മാത്രമാണെങ്കിലുമം മഞ്ഞക്കുപ്പായത്തില്‍ ആദ്യ മത്സരത്തില്‍ തന്നെ താരം തിളങ്ങുമെന്നാണ് ചെന്നെെ ടീം മാനേജ്മെന്‍റും പ്രതീക്ഷിക്കുന്നത്.