IPL 2026: സഞ്ജു ഫ്ളോപ്പായാൽ സിഎസ്കെ തോൽക്കും? ഇതെന്ത് ദുർവിധി; മിന്നൽ സ്റ്റംപിങ്ങുകൊണ്ടും കാര്യമുണ്ടായില്ല, കണക്കുകളിതാ

ഇന്ത്യൻ പ്രീമിയർ ലീഗിന്റെ 2026 സീസണിൽ ചെന്നെെ സൂപ്പർ കിങ്സിന്റെ നിരാശപ്പെടുത്തുന്ന പ്രകടനം തുടരുകയാണ്. ഇന്ന് ഗുജറാത്ത് ടെെറ്റൻസിനോട് എട്ട് വിക്കറ്റിന്റെ തോൽവിയാണ് സിഎസ്കെയ്ക്ക് നേരിടേണ്ടി വന്നത്. അതും സ്വന്തം തട്ടകത്തിലാണെന്നതാണ് ആരാധകരെ നിരാശപ്പെടുത്തുന്നത്. എട്ട് മത്സരത്തിൽ നിന്ന് അഞ്ചാം തോൽവിയാണ് സിഎസ്കെയ്ക്ക് നേരിടേണ്ടി വന്നത്. സിഎസ്കെ മൂന്ന് മത്സരങ്ങളാണ് സീസണിൽ ജയിച്ചത്. വീണ്ടും സിഎസ്കെ തോൽവി നേരിട്ടതോടെ സഞ്ജു സാംസണിന്റെ പ്രകടനം വീണ്ടും ചർച്ചക്ക് വഴി തുറന്നിരിക്കുകയാണ്. സഞ്ജു സാംസൺ ബാറ്റിങ്ങിൽ തിളങ്ങുന്ന മത്സരം മാത്രമാണ് സിഎസ്കെയ്ക്ക് ജയിക്കാൻ സാധിക്കുന്നത് എന്നതാണ് കണക്കുകൾ വ്യക്തമാക്കുന്നത്. സിഎസ്കെ ഇത്തവണ ജയിച്ച മൂന്ന് മത്സരത്തിലും ടോപ് സ്കോറർ സഞ്ജുവായിരുന്നു.

സഞ്ജു രണ്ട് സെഞ്ചുറികളും ഒരു 48 റൺസ് പ്രകടനവും നടത്തിയ മത്സരങ്ങളിൽ സിഎസ്കെ ജയിച്ചു. എന്നാൽ സഞ്ജു ഫ്ളോപ്പായ ഒരു മത്സരം പോലും സിഎസ്കെയ്ക്ക് ജയിക്കാൻ സാധിച്ചിട്ടില്ല. ഗുജറാത്തിനെതിരേ സഞ്ജുവിന് കാര്യമായ പ്രകടനം നടത്താൻ സാധിച്ചിരുന്നില്ല. 15 പന്തിൽ 11 റൺസെടുത്താണ് സഞ്ജു പുറത്തായത്. സഞ്ജു ഫ്ലോപ്പായതോടെ സിഎസ്കെയുടെ സ്കോർ 158ൽ ഒതുങ്ങുകയും ടീം തോൽവി നേരിടുകയും ചെയ്തിരിക്കുകയാണ്.

റുതുരാജ് ഗെയ്ക് വാദ് മാത്രമാണ് സിഎസ്കെ നിരയിൽ തിളങ്ങിയത്. ടീമിന്റെ സാഹചര്യം നോക്കുമ്പോൾ ഭേദപ്പെട്ട പ്രകടനമാണ് റുതുരാജ് നടത്തിയത്. 60 പന്തിൽ 74 റൺസാണ് റുതുരാജ് നേടിയത്. ആറ് ഫോറും നാല് സിക്സും ഉൾപ്പെടെ റുതുരാജ് പുറത്താവാതെ നിന്നു. പക്ഷെ വലിയൊരു ഇംപാക്ട് സൃഷ്ടിക്കാൻ ഈ പ്രകടനംകൊണ്ട് സാധിച്ചില്ലെന്ന് തന്നെ പറയാം.
IPL 2026: ചരിത്ര നേട്ടത്തിൽ‌ സഞ്ജു സാംസൺ, എലെെറ്റ് ക്ലബ്ബിൽ ഇനി കോഹ്ലിക്കും രോഹിത്തിനുമൊപ്പം; ധോണിയെ പിന്നിലാക്കി വമ്പൻ റെക്കോ‍ഡും
സിഎസ്കെ സഞ്ജുവിനെ മാത്രം ആശ്രയിച്ച് മുന്നോട്ട് പോകുന്ന നിരയായതിൽ വലിയ വിമർശനം ഉയരുകയാണ്. പരിശീലകൻ സ്റ്റീഫൻ ഫ്ളമിങ്ങിനെതിരേയും വിമർശനം ഉയരുകയാണ്. ഗുജറാത്തിനെതിരേ സർഫറാസ് ഖാനെ ഇംപാക്ട് പ്ലയറായി ഇറക്കിയ ഫ്ളമിങ്ങിന്റെ തീരുമാനം പാളുകയായിരുന്നു. ബാറ്റിങ്ങിൽ കരുത്തുപകരാൻ ഫ്ളമിങ് എടുത്ത തീരുമാനം പാളുന്നതാണ് ഗുജറാത്തിനെതിരേ കാണാനായത്.

സിഎസ്കെയുടെ യുവതാരങ്ങളൊന്നും പ്രതീക്ഷിച്ച നിലവാരം കാട്ടുന്നില്ലെന്നതാണ് എടുത്തു പറയേണ്ടത്. ഉർവിൽ പട്ടേലിൽ വലിയ പ്രതീക്ഷ ടീമിനും ആരാധകർക്കും ഉണ്ടായിരുന്നെങ്കിലും അതിനൊത്തുയരാൻ ഉർവിലിന് സാധിച്ചില്ല. സർഫറാസ് ഖാൻ, ഡെവാൾഡ് ബ്രെവിസ്, ശിവം ദുബെ, കാർത്തിക് ശർമ എന്നിവർക്കൊന്നും കാര്യമായ പ്രകടനം നടത്താൻ സാധിച്ചിട്ടില്ലെന്നതാണ് ടീമിനെ പിന്നോട്ടടിക്കുന്നത്.
IPL 2026: ഇവർ കളിക്കുന്നത് ടീമിനെ തോൽപ്പിക്കാനോ? ബാധ്യതയാകുന്ന താരങ്ങൾ ഇവരാണ്; നാല് ക്യാപ്റ്റന്മാരും പട്ടികയിൽ

ഗുജറാത്തിനെതിരേ സഞ്ജു ഫ്ളോപ്പായതോടെ പിന്നാലെ എത്തുന്ന താരങ്ങളെല്ലാം സമ്മർദ്ദത്തിലാകുന്നതും പ്രകടനം മോശമാകുന്നതുമാണ് കാണാനായത്. എല്ലാ മത്സരത്തിലും സഞ്ജുവിന്റെ പ്രകടനത്തെ മാത്രം ആശ്രയിച്ച് മുന്നോട്ട് പോവുകയെന്നത് ടീമെന്ന നിലയിൽ സിഎസ്കെയ്ക്ക് നാണക്കേടാണെന്ന് തന്നെ പറയാം.

ശുഭ്മാൻ ഗില്ലിനെ മികച്ചൊരു സ്റ്റംപിങ്ങിലൂടെ പുറത്താക്കാൻ സഞ്ജുവിനായി. വെെഡ് പന്തിൽ എംഎസ് ധോണിയെ ഓർമ്മപ്പെടുത്തുന്ന തരത്തിൽ കിടിലൻ സ്റ്റംപിങ്ങിലൂടെ ഗില്ലിനെ സഞ്ജു പുറത്താക്കിയെങ്കിലും സിഎസ്കെയെ ജയിപ്പിക്കാൻ ഇത് മതിയാവുമായിരുന്നില്ല. നിലവിൽ സഞ്ജുവിനെ അമിതമായി ആശ്രയിക്കുന്ന നിരയാണ് സിഎസ്കെയുടേതെന്ന് നിസംശയം പറയാം.