IPL 2026: സഞ്ജുവിന്റെ സിഎസ്‌കെ ഞെട്ടിക്കും, 'മറഞ്ഞിരിക്കുന്ന രണ്ട് രത്‌നങ്ങള്‍'ക്ക് 28.40 കോടി; എന്തായിരിക്കും ഇവരുടെ റോള്‍

ഐപിഎല്‍ 2026 മിനി താര ലേലത്തില്‍ ഏറ്റവും ശ്രദ്ധേയ നീക്കം നടത്തിയ ഫ്രാഞ്ചൈസിയാണ് ചെന്നൈ സൂപ്പര്‍ കിങ്‌സ് . കാമറൂണ്‍ ഗ്രീന്‍, ലിയാം ലിവിങ്സ്റ്റണ്‍, രവി ബിഷ്ണോയ് തുടങ്ങി നിരവധി പ്രമുഖ താരങ്ങളുണ്ടായിട്ടും ഇവരിലേക്ക് പോകാതെ അറിയപ്പെടാത്ത രണ്ട് യുവ താരങ്ങളെ വന്‍ തുക നല്‍കി ഏറ്റെടുത്തു. 19 കാരനായ കാര്‍ത്തിക് ശര്‍മയും 20കാരന്‍ പ്രശാന്ത് വീറും ലേലത്തില്‍ താരമായി. ഇടങ്കൈയ്യന്‍ സ്പിന്‍ ഓള്‍റൗണ്ടര്‍ പ്രശാന്ത് വീറും വിക്കറ്റ് കീപ്പര്‍ ബാറ്റ്സ്മാന്‍ കാര്‍ത്തിക് ശര്‍മയും ചേര്‍ന്ന് സിഎസ്‌കെയുടെ ഖജനാവില്‍ നിന്ന് 28.40 കോടി രൂപയാണ് ചോര്‍ത്തിയത്. ഇരുവരും 14.20 കോടി രൂപയുടെ പ്രതിഫല കരാര്‍ ഒപ്പിടും. 19 വര്‍ഷത്തെ ഐപിഎല്‍ ചരിത്രത്തില്‍ ഏറ്റവും ഉയര്‍ന്ന തുകയുടെ കരാര്‍ നേടിയ അണ്‍ക്യാപ്ഡ് ഇന്ത്യന്‍ താരങ്ങള്‍ എന്ന റെക്കോഡ് ഇവര്‍ക്ക് സ്വന്തം. 2022ല്‍ ലഖ്നൗ സൂപ്പര്‍ ജയന്റ്സ് 10 കോടിക്ക് വാങ്ങിയ ആവേശ് ഖാന്‍ ആയിരുന്നു ഇതുവരെ വിലയേറിയ അണ്‍ക്യാപ്ഡ് താരം.


പ്രശാന്ത് വീറിനായി സിഎസ്‌കെയ്ക്ക് പുറമേ രാജസ്ഥാന്‍ റോയല്‍സും എസ്ആര്‍എച്ചും കടുത്ത ലേല പോരാട്ടത്തില്‍ ഏര്‍പ്പെട്ടതോടെയാണ് വില 14.20 കോടിയിലെത്തിയത്. ഉത്തര്‍പ്രദേശിലെ അമേഠിയില്‍ നിന്നുള്ള ഇദ്ദേഹം സിഎസ്‌കെയില്‍ സൂപ്പര്‍ താരം രവീന്ദ്ര ജഡേയുടെ വിടവ് നികത്തും.

IPL 2026: വിഘ്‌നേഷ് പുത്തൂരിനെ ലേലത്തില്‍ പിടിച്ച് രാജസ്ഥാന്‍; സഞ്ജുവിന് പിന്‍ഗാമിയായി മലയാളി താരം
യുപി ടി20 ലീഗില്‍ നോയിഡ സൂപ്പര്‍ കിങ്സിനു വേണ്ടി തിളങ്ങിയാണ് പ്രശാന്ത് വീര്‍ ചെന്നൈ സൂപ്പര്‍ കിങ്‌സിലേക്കുള്ള പടികള്‍ കയറുന്നത്. ഇടങ്കൈയ്യന്‍ സ്പിന്നര്‍ എന്നതിനൊപ്പം മികച്ച ഇടങ്കൈയ്യന്‍ മധ്യനിര ബാറ്റര്‍ കൂടിയാണ് എന്നത് അദ്ദേഹത്തിന്റെ മൂല്യം ഉയര്‍ത്തി. യുപിക്ക് വേണ്ടി ഒമ്പത് ടി20 മല്‍സരങ്ങളില്‍ ഏഴ് ഇന്നിങ്‌സുകളിലായി 167.16 സ്‌ട്രൈക്ക് റേറ്റില്‍ 112 റണ്‍സ് നേടിയിട്ടുണ്ട്. 12 വിക്കറ്റുകളും വീഴ്ത്തി.

സിഎസ്‌കെയില്‍ സ്പിന്‍ ആക്രമണത്തെ നൂര്‍ അഹമ്മദ് നയിക്കുമ്പോള്‍ പിന്തുണയ്ക്കാന്‍ പ്രശാന്തും ഉണ്ടാവും. ഈ സീസണില്‍ തന്നെ ഐപിഎല്‍ അരങ്ങേറ്റം ഉറപ്പിക്കാം. യുപിക്ക് വേണ്ടി മുഷ്താഖ് അലി ട്രോഫിയിലും അണ്ടര്‍ 23 ടൂര്‍ണമെന്റുകളിലും തിളങ്ങിയിരുന്നു.

IPL 2026 Auction: രവി ബിഷ്‌ണോയി 7.2 കോടി രൂപയ്ക്ക് രാജസ്ഥാനിലേക്ക്; ലേലത്തിലെ വിലയേറിയ ഇന്ത്യന്‍ താരമായേക്കും
രാജസ്ഥാനില്‍ നിന്നുള്ള 19 കാരനായ വിക്കറ്റ് കീപ്പര്‍ ബാറ്റ്സ്മാനാണ് കാര്‍ത്തിക് ശര്‍മ . ഇതോടെ സിഎസ്‌കെയില്‍ നാല് വിക്കറ്റ് കീപ്പര്‍മാരായി. എംഎസ് ധോണി, സഞ്ജു സാംസണ്‍, ഉര്‍വില്‍ പട്ടേല്‍ എന്നിവരാണ് മറ്റുള്ളവര്‍. കാര്‍ത്തിക് ശര്‍മ 12 ടി20കളില്‍ നിന്ന് 164 സ്‌ട്രൈക്ക് റേറ്റില്‍ 28 സിക്സറുകള്‍ സഹിതം 334 റണ്‍സ് നേടിയിട്ടുണ്ട്. കാര്‍ത്തികിന്റെ ലോ ഓര്‍ഡര്‍ പവര്‍-ഹിറ്റിങ് കെവിന്‍ പീറ്റേഴ്സണ്‍, ആര്‍ അശ്വിന്‍ തുടങ്ങിയവരുടെ പ്രശംസ പിടിച്ചുപറ്റിയിരുന്നു. സ്റ്റമ്പുകള്‍ക്ക് പിന്നിലും അദ്ദേഹം വളരെ വിശ്വസനീയനാണ്.

സഞ്ജുവും ഉര്‍വിലും ടീമിലുള്ളതിനാല്‍ കാര്‍ത്തികിനെ ധോണിക്ക് ശേഷമുള്ള ദീര്‍ഘകാല ബാക്കപ്പ് കീപ്പര്‍ ഓപ്ഷനായാണ് സിഎസ്‌കെ കാണുന്നത്. അതുകൊണ്ട് തന്നെ 19കാരന് ഐപിഎല്‍ അരങ്ങേറ്റത്തിന് കാത്തിരിക്കേണ്ടി വരും. 2026 സീസണില്‍ പ്ലെയിങ് ഇലവനില്‍ ഉള്‍പ്പെടാന്‍ സാധ്യതയില്ല.