IPL 2026: സിഎസ്കെയ്ക്ക് വീണ്ടും പരിക്കിന്റെ പണി, രാമകൃഷ്ണ ഘോഷ് പുറത്ത്; പ്ലേ ഓഫിലേക്കടുക്കവെ മഞ്ഞപ്പടക്ക് തിരിച്ചടി

ഇന്ത്യൻ പ്രീമിയർ ലീഗിന്റെ 2026 സീസണിൽ വീണ്ടും ചെന്നെെ സൂപ്പർ കിങ്സിന് പരിക്കിന്റെ പണി. യുവ ഓൾറൗണ്ടർ രാമകൃഷ്ണ ഘോഷാണ് പരിക്കേറ്റ് സീസണിൽ നിന്ന് പുറത്തായിരിക്കുന്നത്. മുംബെെ ഇന്ത്യൻസിനെതിരായ മത്സരത്തിലൂടെയാണ് രാമകൃഷ്ണ ഘോഷ് ഐപിഎൽ അരങ്ങേറ്റം നടത്തിയത്. മൂന്ന് ഓവർ പന്തെറിഞ്ഞ് 24 റൺസ് വിട്ടുകൊടുത്ത രാമകൃഷ്ണ സൂര്യകുമാർ യാദവിന്റെ നിർണ്ണായക വിക്കറ്റും നേടിയെടുത്തിരുന്നു. വിൽ ജാക്സിനെ പുറത്താക്കാൻ തകർപ്പനൊരു ഡെെവിങ് ക്യാച്ചും രാമകൃഷ്ണ നേടിയിരുന്നു. എന്നാൽ കാലിന് പരിക്കേറ്റ താരത്തിന് ഇപ്പോൾ പുറത്തുപോകേണ്ടി വന്നിരിക്കുകയാണ്. വലത് കാലിനാണ് പരിക്കേറ്റിരിക്കുന്നത്. ഭേദപ്പെട്ട വേഗതയിൽ പന്തെറിയാൻ സാധിക്കുന്ന താരത്തിന് ബാറ്റുകൊണ്ടും മികവ് കാട്ടാൻ കഴിവുണ്ട്. ഐപിഎല്ലിലെ ശേഷിക്കുന്ന മത്സരങ്ങളിൽ രാമകൃഷ്ണയിൽ സിഎസ്കെ വലിയ പ്രതീക്ഷവെച്ചിരുന്നു.

ഇപ്പോഴിതാ വീണ്ടും പരിക്കിന്റെ തിരിച്ചടി ടീമിന് നേരിടേണ്ടി വന്നിരിക്കുകയാണ്. സിഎസ്കെയുടെ മുന്നോട്ടുള്ള പോക്കിനെ പ്രതികൂലമായി ബാധിക്കുന്ന പരിക്കാണിതെന്ന് തന്നെ പറയാം. മുംബെെ ഇന്ത്യൻസിനെതിരേ മികച്ച പേസ് നിരയെ സൃഷ്ടിക്കാനും ആത്മവിശ്വാസത്തോടെ കളിക്കാനും സിഎസ്കെയ്ക്ക് സാധിച്ചിരുന്നു. ഇപ്പോൾ രാമകൃഷ്ണക്ക് പരിക്കേറ്റത് സിഎസ്കെയെ അൽപ്പം പ്രയാസപ്പെടുത്തുമെന്നുറപ്പാണ്.

മീഡിയം പേസ് ബൗളറായ അമാൻ ഖാനെ സിഎസ്കെ പരിഗണിക്കുമോയെന്നതാണ് കണ്ടറിയേണ്ടത്. സിഎസ്കെയ്ക്ക് ഇനിയൊരു താരത്തെ ടീമിലേക്ക് കൊണ്ടുവരിക പ്രയാസമായിരിക്കും. നിലവിലെ ടീമിൽ വിശ്വസിക്കാവുന്ന മറ്റ് മീഡിയം പേസ് ഓൾറൗണ്ടർമാരുമില്ല. അമാൻ ഖാനെ കളിപ്പിച്ചാലും അത്ഭുതം പ്രതീക്ഷിക്കാനാവില്ല. ഈ സാഹചര്യത്തിൽ സിഎസ്കെയ്ക്ക് കാര്യങ്ങൾ എളുപ്പമല്ലെന്ന് തന്നെ പറയാം.
IPL 2026: വെെഭവ് സൂര്യവംശി ചെയ്യുന്നത് ബാലവേല, നിയമനടപടിക്കൊരുങ്ങി സാമൂഹ്യ പ്രവർത്തകൻ; ആവശ്യപ്പെടുന്നത് ഇക്കാര്യം
സിഎസ്കെയെ സംബന്ധിച്ച് പ്ലേ ഓഫിലേക്കെത്താൻ ഇനിയുള്ള മത്സരങ്ങൾ വളരെ പ്രധാനപ്പെട്ടതാണ്. ഒമ്പത് മത്സരങ്ങളിൽ നിന്ന് എട്ട് പോയിന്റോടെ ആറാം സ്ഥാനത്താണ് അഞ്ച് തവണ ചാമ്പ്യന്മാരായ സിഎസ്കെയുള്ളത്. ഈ സാഹചര്യത്തിൽ ഇനിയുള്ള എല്ലാ മത്സരങ്ങളിലും ജയിക്കാതെ സിഎസ്കെയ്ക്ക് പ്ലേ ഓഫിലേക്കെത്താൻ സാധിച്ചേക്കില്ല. അതുകൊണ്ടുതന്നെ പരിക്ക് സിഎസ്കെയ്ക്ക് വലിയ തലവേദനയായി മാറുകയാണ്.

ഈ സീസണിൽ ഇത് ആദ്യമായല്ല പരിക്ക് സിഎസ്കെയെ ചതിക്കുന്നത്. ഡെത്തോവറിലേക്കായി ടീം കൊണ്ടുവന്ന നതാൻ എല്ലിസ് സീസൺ ആരംഭിക്കുന്നതിന് മുമ്പ് തന്നെ പരിക്കേറ്റ് പുറത്തായി. മുൻ നായകനും ഇതിഹാസ താരവുമായ എംഎസ് ധോണിക്ക് പരിക്കിനെത്തുടർന്ന് സീസണിലെ ഒറ്റ മത്സരം പോലും കളിക്കാനായിട്ടില്ല. നതാൻ എല്ലിസിന് പകരം പരിഗണിച്ച സ്പെൻസർ ജോൺസനും പരിക്കേറ്റ് പുറത്തായി.

IPL 2026: ധോണിക്കില്ലാത്ത നേട്ടം, അപൂർവ്വ റെക്കോഡ് ക്ലബ്ബിൽ മനീഷ് പാണ്ഡെ; കോഹ്ലിക്കും രോഹിത്തിനും ശേഷം ഇതാദ്യം

സിഎസ്കെയുടെ പവർപ്ലേ സ്പെഷ്യലിസ്റ്റ് പേസറായ ഖലീൽ അഹമ്മദിനേയും പരിക്ക് ബാധിച്ചു. താരത്തിനും പാതിവഴിയിൽ പുറത്താകേണ്ടി വന്നു. മൂന്നാം നമ്പറിൽ സിഎസ്കെയ്ക്കായി തകർത്തടിച്ച താരമാണ് ആയുഷ് മാത്രെ. മിന്നും ഫോമിലായിരുന്ന താരവും പരിക്കേറ്റ് പുറത്തായിരുന്നു. ഇപ്പോഴിതാ ഈ പട്ടികയിലേക്ക് രാമകൃഷ്ണ ഘോഷും എത്തിയിരിക്കുകയാണ്.

ക്യാപ്റ്റനെന്ന നിലയിൽ റുതുരാജ് ഗെയ്ക് വാദിന്റെ സമ്മർദ്ദം ഉയർത്തുന്നതാണ് തുടർ പരിക്കുകളെന്ന് പറയാം. പരിശീലകൻ സ്റ്റീഫൻ ഫ്ളമിങ്ങിനും വലിയ ആശങ്കയാവും മുന്നിലുണ്ടാവുക. ഈ വെല്ലുവിളിയെ മറികടക്കാൻ സിഎസ്കെയ്ക്ക് സാധിക്കുമോയെന്നതാണ് കണ്ടറിയേണ്ടത്.