IPL 2026: സെഞ്ചുറിയോടെ പൊരുതി കൊണോലി, എന്നിട്ടും ഹെെദരാബാദിനോട് പഞ്ചാബ് തോറ്റു; പിഴച്ചത് എവിടെ? ഇതാ കാരണങ്ങൾ

ഇന്ത്യൻ പ്രീമിയർ ലീഗിന്റെ 2026 സീസണിന്റെ പോരാട്ടങ്ങൾ പ്ലേ ഓഫിലേക്കടുക്കവെ പഞ്ചാബ് കിങ്സിന് തിരിച്ചടി നേരിട്ടിരിക്കുകയാണ്. അവസാന മൂന്ന് മത്സരവും തോറ്റതോടെ ശ്രേയസ് അയ്യരും സംഘവും ഒന്നാം സ്ഥാനത്ത് നിന്ന് താഴോട്ട് ഇറങ്ങിയിരിക്കുകയാണ്. സൺറെെസേഴ്സ് ഹെെദരാബാദിനെതിരേ 33 റൺസിന്റെ തോൽവിയാണ് പഞ്ചാബിന് നേരിട്ടത്. ഹെെദരാബാദിന്റെ തട്ടകത്തിൽ ആദ്യം ബാറ്റ് ചെയ്ത ഹെെദരാബാദ് നാല് വിക്കറ്റിന് 235 റൺസെടുത്തപ്പോൾ മറുപടിക്കിറങ്ങിയ പഞ്ചാബിന് ഏഴ് വിക്കറ്റിന് 202 റൺസാണ് നേടാനായത്. മികച്ച ഫോമിലായിരുന്ന പഞ്ചാബിന് ഹെെദരാബാദിനെതിരേ ജയിക്കാൻ അവസരമുണ്ടായിരുന്നു. കൂപ്പർ കൊണോലി 59 പന്തിൽ ഏഴ് ഫോറും എട്ട് സിക്സും ഉൾപ്പെടെ പുറത്താവാതെ 107 റൺസ് നേടിയിട്ടും തോൽവി നേരിടാനായിരുന്നു പഞ്ചാബിന്റെ വിധി. ഹെെദരാബാദിനോട് പഞ്ചാബ് തോൽക്കാനുള്ള പ്രധാന കാരണങ്ങൾ പരിശോധിക്കാം. ഒന്നാമത്തെ കാര്യം മോശം ഫീൽഡിങ്ങാണ്. ഹെെദരാബാദിനെ 200നുള്ളിലെങ്കിലും ഒതുക്കാൻ പഞ്ചാബിന് സാധിക്കുമായിരുന്നു.

9 റൺസിലും 18 റൺസിലും ഇഷാൻ കിഷന്റെ ക്യാച്ചവസരം പഞ്ചാബ് നഷ്ടപ്പെടുത്തി. 32 പന്തിൽ 55 റൺസെടുത്താണ് ഇഷാൻ മടങ്ങിയത്. ഇഷാന്റെ സ്റ്റംപിങ് അവസരവും പ്രഭ്സിംറാൻ നഷ്ടമാക്കിയിരുന്നു. ഹെൻ റിച്ച് ക്ലാസനെ 9 റൺസിൽ പുറത്താക്കാനുള്ള അവസരവും ലഭിച്ചെങ്കിലും മുതലാക്കിയില്ല. 43 പന്തിൽ 69 റൺസാണ് ക്ലാസന് നേടാനായത്. മൂന്ന് ഫോറും നാല് സിക്സുമാണ് ക്ലാസൻ പറത്തിയത്.

ഈ സീസണിൽ 14 ക്യാച്ചുകൾ ഇതിനോടകം പഞ്ചാബ് നഷ്ടമാക്കിയിട്ടുണ്ട്. ഹെെദരാബാദിനെതിരായ പഞ്ചാബിന്റെ തോൽവിക്ക് മോശം ഫീൽഡിങ് പ്രകടനം കാരണമായിട്ടുണ്ടെന്ന് തന്നെ പറയാം. ലഭിച്ച ക്യാച്ച് അവസരങ്ങൾ ലഭിച്ചിരുന്നെങ്കിൽ മത്സരഫലം മറ്റൊന്നാക്കി മാറ്റാൻ പഞ്ചാബിന് സാധിക്കുമായിരുന്നു.
IPL 2026: പഞ്ചാബിന്റെ ഫീൽഡിങ് ദുരന്തം; കെെവിട്ട ക്യാച്ചുകൾ നിരവധി, ഹെെദരാബാദിനെതിരേ ഒന്നും രണ്ടും പിഴവുകളല്ല, കണക്കുകളിതാ
രണ്ടാമത്തെ കാര്യം ടോപ് ഓഡറിന്റെ പദ്ധതിയില്ലായ്മയാണ്. കൂറ്റൻ വിജയലക്ഷ്യത്തിലേക്ക് ബാറ്റുവീശുമ്പോൾ മികച്ച തുടക്കം അത്യാവശ്യമാണ്. എന്നാൽ പഞ്ചാബിന് ഇത് ലഭിച്ചില്ല. പ്രിയൻഷ് ആര്യ വെടിക്കെട്ട് ബാറ്റ്സ്മാനാണ്. എന്നാൽ മൂന്ന് പന്തിൽ ഒരു റൺസാണ് നേടാനായത്. പ്രഭ്സിംറാൻ സിങ് നാല് പന്തിൽ മൂന്ന് റൺസും നേടി. ക്യാപ്റ്റൻ ശ്രേയസ് അയ്യർ അഞ്ച് പന്തിൽ അഞ്ച് റൺസാണ് നേടിയത്. ടോപ് ഓഡറിലെ മൂന്ന് വിക്കറ്റ് പെട്ടെന്ന് വീണതാണ് പഞ്ചാബിന് തിരിച്ചടിയായി മാറിയത്.

കൂപ്പർ കൊണോലിക്ക് മികച്ച പിന്തുണ നൽകാൻ ആരും തയ്യാറായില്ല. ഒരാളെങ്കിലും പിന്തുണച്ചിരുന്നെങ്കിൽ പഞ്ചാബിന് മികച്ച സ്കോറിലേക്കെത്താനും വിജയത്തിലേക്കെത്താനും സാധിക്കുമായിരുന്നു. പഞ്ചാബിന്റെ ഉയർന്ന രണ്ടാമത്തെ സ്കോർ 28 റൺസാണ്. മാർക്കസ് സ്റ്റോയിണിസ് പ്രതീക്ഷ നൽകിയെങ്കിലും 14 പന്തിൽ 28 റൺസെടുത്ത് പുറത്താവുകയായിരുന്നു. സൂപ്പർ ഫിനിഷർ ശശാങ്ക് സിങ് മൂന്ന് പന്തിൽ നാല് റൺസാണ് ആകെ നേടിയത്.

IPL 2026: ഹാർദിക്കും സൂര്യയുമില്ല, ആർസിബിക്കെതിരേ മുംബെെയെ ആര് നയിക്കും? വീണ്ടും രോഹിത് വരുമോ, സാധ്യതകൾ ഇതാ

ക്യാച്ചവസരം നഷ്ടപ്പെടുത്തിയ ശശാങ്ക് മോശം ബാറ്റിങ് പ്രകടനവും നടത്തി ടീമിന്റെ തോൽവിക്ക് മുഖ്യ കാരണമായി മാറുകയായിരുന്നു. എന്തായാലും ഹാട്രിക് തോൽവി നേരിട്ട പഞ്ചാബിന് ഇനിയുള്ള മത്സരങ്ങൾ വളരെ നിർണ്ണായകമാണ്. അല്ലാത്ത പക്ഷം പ്ലേ ഓഫിലേക്കെത്തുക പ്രയാസമായി മാറും.