IPL 2026: ഹാർദിക് സിഎസ്കെയിലേക്കല്ല, മുംബെെ വിട്ട് ആർസിബിയിലേക്ക്? വെെറലായി ചിത്രങ്ങൾ, ഇത് നടന്നാൽ പൊളിക്കും

ഇന്ത്യൻ പ്രീമിയർ ലീഗിന്റെ 2026 സീസൺ അവസാനിച്ചപ്പോൾ തീർത്തും നിരാശപ്പെടുത്തിയ ടീമുകളിലൊന്നാണ് മുംബെെ ഇന്ത്യൻസ് . അഞ്ച് തവണ ചാമ്പ്യന്മാരായ മുംബെെ ഒമ്പതാം സ്ഥാനക്കാരായാണ് സീസൺ അവസാനിപ്പിച്ചത്. ഇത്തവണ നാല് ജയം മാത്രമാണ് മുംബെെക്ക് നേടാനായത്. നായകനെന്ന നിലയിൽ ഹാർദിക് പാണ്ഡ്യക്ക് വലിയ വിമർശനമാണ് നേരിടേണ്ടി വന്നത്.

ആരാധകരുടെ മാത്രമല്ല ടീം മാനേജ്മെന്റിന്റെ വിമർശനവും ഹാർദിക്കിന് നേരിടേണ്ടതായി വന്നു. ഈ സീസണോടെ ഹാർദിക് പാണ്ഡ്യ മുംബെെ വിടുമെന്നാണ് നിലവിലെ വിവരം. ഹാർദിക് നായകസ്ഥാനം ഒഴിയുമെന്ന റിപ്പോർട്ടുകൾ ഇതിനോടകം പുറത്ത് വന്നുകഴിഞ്ഞു. ടീം മാനേജ്മെന്റിനും ഹാർദിക്കിനെ നായകസ്ഥാനത്ത് നിലനിർത്താൻ വലിയ താൽപര്യമില്ലെന്ന് തന്നെ പറയാം.

മുംബെെ വിട്ട ഹാർദിക് ചെന്നെെ സൂപ്പർ കിങ്സിലേക്ക് പോകുമെന്നായിരുന്നു റിപ്പോർട്ട് ഉണ്ടായിരുന്നത്. എന്നാൽ ഇപ്പോഴിതാ ഹാർദിക് ആർസിബി യിലേക്കാണ് കൂടുമാറുന്നതെന്ന റിപ്പോർട്ടാണ് പ്രചരിക്കുന്നത്. ഇതിന്റെ തെളിവായി ഒരു ചിത്രവും വെെറലായിക്കഴിഞ്ഞു. ഹാർദിക് പാണ്ഡ്യയും ആർസിബി പരിശീലകനായ ആൻഡി ഫ്ളവറും ദിനേഷ് കാർത്തികും തമ്മിൽ ഒരു ഹോട്ടലിൽ സംസാരിച്ചുകൊണ്ടിരിക്കുന്ന ചിത്രമാണ് എക്സിൽ പ്രചരിക്കുന്നത്. ഇതിന് പിന്നാലെയാണ് ഹാർദിക്കിന്റെ ആർസിബിയിലേക്കുള്ള കൂടുമാറ്റ റിപ്പോർട്ടുകൾ പ്രചരിച്ചത്.

പ്രാഥമികമായ ചർച്ചകൾ നടന്നിട്ടുണ്ടോയെന്ന സംശയമാണ് ആരാധകർക്കുള്ളത്. അല്ലാതെ കാർത്തികും ആൻഡി ഫ്ളവറും ഹാർദിക്കുമായി ചർച്ച നടത്തേണ്ട യാതൊരു കാര്യവുമില്ല. ഹാർദിക് പാണ്ഡ്യ മുംബെെയുടെ നായകനായിരുന്നെങ്കിലും ആർസിബിയിലേക്ക് കൂടുമാറ്റം നടത്തിയാൽ നായകസ്ഥാനം ലഭിക്കില്ലെന്നുറപ്പ്. ആർസിബിയെ തുടർച്ചയായി രണ്ട് കിരീടത്തിലേക്ക് നയിച്ച നായകനാണ് രജത് പാട്ടീധാർ. രജത്തുള്ളപ്പോൾ ഹാർദിക്കിന് ക്യാപ്റ്റൻസി ലഭിക്കാൻ യാതൊരു സാധ്യതയുമില്ല.
FIFA World Cup 2026: മൂന്ന് പ്രവചനം കിറു കൃത്യം, ഇത്തവണ പോർച്ചു​ഗൽ കപ്പ് നേടുമെന്ന് 'ലോകകപ്പ് സെെക്കിക്ക്', ബ്രസീലും അർജന്റീനയും ഫെെനലിലെത്തില്ല
ഹാർദിക് പാണ്ഡ്യയെ ആർസിബി നോട്ടമിടുന്നത് സ്പെഷ്യലിസ്റ്റ് പേസ് ഓൾറൗണ്ടറുടെ റോളിലാണ്. ഇത്തരമൊരു താരത്തിന്റെ അഭാവം നിലവിൽ ആർസിബിയിലുണ്ട്. നിലവിൽ ആർസിബിയുടെ പേസ് ഓൾറൗണ്ടർ റൊമാരിയോ ഷെഫേർഡാണ്. വമ്പനടിക്കാരനായ താരണമാണെങ്കിലും നിലവാരത്തിനൊത്തുയരാൻ പലപ്പോഴും താരത്തിന് സാധിക്കാറില്ല. അതുകൊണ്ടുതന്നെ താരത്തെ ഒഴിവാക്കി ഹാർദിക്കിനെ കൊണ്ടുവന്നേക്കും.

ഹാർദിക്കുമായുള്ള കരാർ നടന്നാൽ ടിം ഡേവിഡിനെ ഒഴിവാക്കാനുള്ള സാധ്യതകളും കൂടുതലാണ്. നിലവിൽ ഹാർദിക്കിന്റെ ചേട്ടനായ ക്രുണാൽ പാണ്ഡ്യ ആർസിബിയുടെ നിർണ്ണായക താരമാണ്. അടുത്ത സീസണിലും ക്രുണാലിനെ ആർസിബി നിലനിർത്താനും സാധ്യതയുണ്ട്. ക്രുണാലും ഹാർദിക്കും മുംബെെക്കായി ഒന്നിച്ചു കളിച്ചതുപോലെ ആർസിബിക്കായും ഒന്നിച്ച് കളിക്കുമോയെന്നതാണ് കണ്ടറിയേണ്ടത്.

FIFA World Cup 2026: അർജന്റീന കപ്പ് നേടുമോ? ഈ വെല്ലുവിളികൾ ടീമിനെ വേട്ടയാടുന്നു; മറികടക്കുക എളുപ്പമല്ല, എന്തൊക്കെയെന്ന് അറിയാം

ഹാർദിക്കിനെ സിഎസ്കെ ടീമിലേക്കെത്തിക്കാൻ സാധ്യത കുറവാണ്. ഇത്തരമൊരു ആഗ്രഹം ഹാർദിക്കിനുണ്ടെങ്കിലും അത് നടക്കില്ലെന്ന് തന്നെ പറയാം. നിലവിൽ റുതുരാജ് ഗെയ്ക് വാദാണ് സിഎസ്കെ നായകൻ. എന്നാൽ വരുന്ന സീസണിൽ സഞ്ജു സാംസണെ സിഎസ്കെ നായകനാക്കാനാണ് സാധ്യത കൂടുതൽ. ഹാർദിക്കിന് സഞ്ജുവിന് കീഴിൽ കളിക്കാൻ വലിയ താൽപര്യം ഉണ്ടായേക്കില്ല.

സിഎസ്കെയിലേക്കെത്താൻ ഹാർദിക് നായകസ്ഥാനം ആവശ്യപ്പെട്ടാൽ അത് നൽകാനും സാധ്യത കുറവാണ്. ഡൽഹി ക്യാപിറ്റൽസ്, കൊൽക്കത്ത നെെറ്റ് റെെഡേഴ്സ്, ലഖ്നൗ സൂപ്പർ ജയ്ന്റ്സ് ടീമുകൾക്ക് അടുത്ത സീസണിൽ പുതിയ നായകന്മാരെ വേണം. ഈ ടീമുകളിലേക്കുള്ള ഹാർദിക്കിന്റെ കൂടുമാറ്റ സാധ്യതകളും തള്ളിക്കളയാനാവില്ല.