KKR vs RCB: ഐപിഎല്ലിലെ ഉദ്ഘാടന മത്സരം ഉപേക്ഷിക്കാൻ സാധ്യത, ആദ്യ കളിക്ക് മുൻപ് കനത്ത ഭീഷണിയായി കാലാവസ്ഥ

Curated byഗോകുൽ എസ് | Samayam Malayalam | Updated: 21 Mar 2025, 11:59 am

Samayam Malayalamഐപിഎൽ ക്യാപ്റ്റന്മാർ

പതിനെട്ടാം സീസൺ ഇന്ത്യൻ പ്രീമിയർ ലീഗിന് ശനിയാഴ്ച തുടക്കമാകാനിരിക്കുകയാണ്. നിലവിലെ ചാമ്പ്യന്മാരായ കൊൽക്കത്ത നൈറ്റ് റൈഡേഴ്സും, വിരാട് കോഹ്ലിയുടെ ടീമായ റോയൽ ചലഞ്ചേഴ്സ് ബംഗളൂരുവും തമ്മിലാണ് ആദ്യ മത്സരം. കൊൽക്കത്ത നൈറ്റ് റൈഡേഴ്സിന്റെ ഹോം ഗ്രൗണ്ടായ കൊൽക്കത്തയിലെ ഈഡൻ ഗാർഡൻസാണ് ഈ കളിക്ക് വേദിയാകുന്നത്. വമ്പൻ ഉദ്ഘാടന പരിപാടികളോടെയാണ് ഐപിഎൽ 2025 സീസൺ തുടങ്ങാനിരിക്കുന്നത്. അതിനിടെ ഇപ്പോളിതാ ക്രിക്കറ്റ് ലോകത്തെ മുഴുവൻ നിരാശയിലാക്കുന്ന ഒരു വാർത്തയാണ് പുറത്തു വന്നിരിക്കുന്നത്.കൊൽക്കത്ത നൈറ്റ് റൈഡേഴ്സ് - റോയൽ ചലഞ്ചേഴ്സ് ബംഗളൂരു മത്സരത്തിന് കാലാവസ്ഥ വെല്ലുവിളിയാകുമെന്നാണ് റിപ്പോർട്ട്. മത്സരം നടക്കാനിരിക്കുന്ന 22 ന് കൊൽക്കത്തയിൽ ശക്തമായ മഴക്ക് സാധ്യതയുണ്ടെന്നാണ് കാലാവസ്ഥാ പ്രവചനം. മാർച്ച് 20 മുതൽ 22 വരെ പശ്ചിമ ബംഗാളിലെ വിവിധ സ്ഥലങ്ങളിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്.


അക്കുവെദർ റിപ്പോർട്ട് അനുസരിച്ച് ഐപിഎല്ലിലെ ഉദ്ഘാടന മത്സരം നടക്കാനിരിക്കുന്ന ശനിയാഴ്ച വൈകിട്ട് കൊൽക്കത്തയിൽ മഴക്കുള്ള സാധ്യത 90 ശതമാനമാണ്. രണ്ട് മണിക്കൂറോളം മഴ ശക്തമായി പെയ്യുമെന്നും ഇടിമിന്നലിന് 54 ശതമാനം സാധ്യതകളുണ്ടെന്നും റിപ്പോർട്ടുകൾ സൂചിപ്പിക്കുന്നു.

Also Read: 39 പന്തിൽ 110 നോട്ടൗട്ട്, ആദ്യ കളിക്ക് മുൻപ് ഞെട്ടിച്ച് ജേക് ഫ്രേസർ മക്ഗർക്; ടീം നേടിയത് 289 റൺസ്, ഡെൽഹിക്ക് ആവേശം

അതേ സമയം ഐപിഎല്ലിന് മുൻപ് ഗംഭീര ഉദ്ഘാടന പരിപാടികളാണ് ബിസിസിഐ പ്ലാൻ ചെയ്തിരിക്കുന്നത്. ബോളിവുഡ് താരങ്ങളായ ദിഷ പടാനി, സൽമാൻ ഖാൻ, വരുൺ ധവാൻ, കത്രീന കൈഫ്, അനന്യ പാണ്ഡെ, ജാൻവി കപൂർ എന്നിവർ വേദിയിലെത്തുമെന്നാണ് സൂചനകൾ. എന്നാൽ മഴ വില്ലനായാൽ ബിസിസിഐയുടെ പദ്ധതികളെല്ലാം പാളും.

മെഗാ ലേലത്തിന് ശേഷം നടക്കാനിരിക്കുന്ന ആദ്യ സീസണായതിനാൽ ഇത്തവണ ഐപിഎല്ലിന് ആവേശം അല്പം കൂടുതലാണ്. കാലാവസ്ഥ അനുകൂലമായി കളി നടക്കുകയാണെങ്കിൽ ഉദ്ഘാടന മത്സരത്തിൽ തന്നെ ഒരു കിടിലൻ ത്രില്ലർ കാണാമെന്ന പ്രതീക്ഷയിലാണ് ആരാധകർ. പുതിയ നായകന്മാർക്ക് കീഴിലാണ് ഇത്തവണ രണ്ട് ടീമുകളും കളിക്കാൻ ഇറങ്ങുന്നത്. അജിങ്ക്യ രഹാനെയാണ് കെകെആറിനെ നയിക്കുന്നത്. രജത് പാട്ടിദാറാണ് ആർസിബി നായകൻ.

Also Read: രാജസ്ഥാൻ റോയൽസിന് പുതിയ ക്യാപ്റ്റൻ, സഞ്ജു ആദ്യ മൂന്ന് മത്സരം കളിക്കുക സ്പെഷ്യലിസ്റ്റ് ബാറ്ററായി മാത്രം

കൊൽക്കത്ത നൈറ്റ് റൈഡേഴ്സ് സ്ക്വാഡ് ഇങ്ങനെ: അജിങ്ക്യ രഹാനെ, റിങ്കു സിങ്, ക്വിന്റൺ ഡി കോക്ക്, റഹ്മനുള്ള ഗുർബാസ്, അംഗ്ക്രിഷ് രഘുവംശി, റോവ്മാൻ പവൽ, മനീഷ് പാണ്ഡെ, ലുവ്നിത് സിസോദിയ, വെങ്കടേഷ് അയ്യർ, അനുകൂൽ റോയ്, മോയിൻ അലി, രമൺദീപ് സിങ്, ആന്ദ്രെ റസൽ, ആൻറിച്ച് നോർക്കിയ, വൈഭവ് അറോറ, മയങ്ക് മാർക്കണ്ഡെ, സ്പെൻസർ ജോൺസൺ, ഹർഷിത് റാണ, സുനിൽ നരൈൻ, വരുൺ ചക്രവർത്തി, ചേതൻ സക്കറിയ.

റോയൽ ചലഞ്ചേഴ്സ് ബംഗളൂരുവിന്റെ സ്ക്വാഡ് ഇങ്ങനെ: രജത് പാട്ടിദാർ, വിരാട് കോഹ്ലി, ഫിൽ സാൾട്ട്, ജിതേഷ് ശർമ, ദേവ്ദത്ത് പടിക്കൽ, സ്വാസ്തിക് ചികാര, ലിയാം ലിവിങ്സ്റ്റൺ, കൃണാൽ പാണ്ഡ്യ, സ്വപ്നിൽ സിങ്, ടിം ഡേവിഡ്, റൊമാരിയോ ഷെഫേഡ്, മനോജ് ഭണ്ഡാജെ, ജേക്കബ് ബെതൽ, ജോഷ് ഹേസൽവുഡ്, റാസിഖ് ദർ, സുയാഷ് ശർമ, ഭുവനേശ്വർ കുമാർ, നുവാൻ തുഷാര, ലുങ്കി എംഗിഡി, അഭിനന്ദൻ സിങ്, മോഹിത് റാത്തി, യഷ് ദയാൽ.