MI vs PBKS IPL 2026: ഒടുവിൽ വിഷ്ണു വിനോദിന് അവസരം, നിർണ്ണായക 'ഇംപാക്ട്' സൃഷ്ടിച്ച് മലയാളി താരം; ഡെത്തോവറിൽ മിന്നിച്ചു

ഇന്ത്യൻ പ്രീമിയർ ലീഗിന്റെ 2026 സീസണിൽ പഞ്ചാബ് കിങ്സിനൊപ്പം ആദ്യമായി കളിക്കാൻ ഇറങ്ങിയ വിഷ്ണു വിനോദ് മോശമാക്കിയില്ല. മലയാളി താരമായ വിഷ്ണുവിന് ഇതുവരെ കളിക്കാൻ അവസരം നൽകിയിരുന്നില്ലെങ്കിലും മുംബെെ ഇന്ത്യൻസിനെതിരേ പഞ്ചാബിന്റെ മധ്യനിര തകർന്നപ്പോൾ ഇംപാക്ട് പ്ലയറായി കളിപ്പിക്കുകയായിരുന്നു. വിക്കറ്റ് കീപ്പറായ പ്രഭ്സിംറാൻ സിങ്ങിന് പകരമാണ് ആ റോളിൽ വിഷ്ണുവിനെ പഞ്ചാബ് കളിപ്പിച്ചത്.ഡെത്തോവറിൽ എട്ട് പന്ത് നേരിട്ട് 15 റൺസോടെയാണ് വിഷ്ണു പുറത്താവാതെ നിന്നത്. ഓരോ സിക്സും ഫോറും പറത്തിയ താരം 187.50 സ്ട്രെെക്ക് റേറ്റിലാണ് കളിച്ചത്. മോശമല്ലാത്ത പ്രകടനം തന്നെയാണ് വിഷ്ണു പുറത്തെടുത്തത്. മത്സരത്തിന്റെ സാഹചര്യം വിലയിരുത്തുമ്പോൾ നിർണ്ണായക കൂട്ടുകെട്ട് സൃഷ്ടിക്കാൻ വിഷ്ണുവിന് സാധിച്ചുവെന്നതാണ് എടുത്തു പറയേണ്ടത്.

ഒമ്പതാം നമ്പറിലാണ് വിഷ്ണു ബാറ്റ് ചെയ്യാനെത്തിയത്. എട്ട് വിക്കറ്റിന് 200 എന്ന മികച്ച സ്കോറിലേക്ക് എത്താൻ പഞ്ചാബിന് സാധിച്ചതിന് പിന്നിൽ വിഷ്ണുവിന്റെ ബാറ്റിങ്ങും സഹായകരമായിട്ടുണ്ട്. നേരത്തെ മുംബെെ ഇന്ത്യൻസിനായി മധ്യനിരയിൽ തിളങ്ങിയിട്ടുള്ള താരമാണ് വിഷ്ണു. എന്നാൽ പഞ്ചാബിന്റെ പ്ലേയിങ് ഇലവനിൽ കാര്യമായ അവസരം വിഷ്ണുവിന് ലഭിക്കുന്നില്ലെന്നതാണ് വസ്തുത.

ഒന്നാം വിക്കറ്റിൽ 50 റൺസിന്റെ കൂട്ടുകെട്ടും രണ്ടാം വിക്കറ്റിൽ 57 റൺസിന്റെ കൂട്ടുകെട്ടും സൃഷ്ടിച്ച ശേഷമാണ് പഞ്ചാബിന് അപ്രതീക്ഷിത ബാറ്റിങ് തകർച്ച നേരിട്ടത്. ക്യാപ്റ്റൻ ശ്രേയസ് അയ്യർ നാല് റൺസെടുത്ത് പുറത്തായപ്പോൾ സൂര്യൻഷ് ഷെഡ്ജെ എട്ട് റൺസെടുത്തും പുറത്തായി. ശശാങ്ക് സിങ് രണ്ട് റൺസാണ് നേടിയത്. അസ്മത്തുല്ല ഒമർസായ് 17 പന്തിൽ 38 റൺസെടുത്ത് നിർണ്ണായക കാമിയോ കാഴ്ചവെച്ചു.
IND vs IRE: അയർലൻഡിനെതിരേ സൂര്യ തന്നെ നയിക്കും? സഞ്ജുവിന് ലഭിക്കുക ആ റോൾ മാത്രം; ബിസിസിഐ നീക്കം ഇങ്ങനെ, റിപ്പോർട്ട് പുറത്ത്
2 ഫോറും നാല് സിക്സുമാണ് താരം പറത്തിയത്. മാർക്കോ യാൻസൻ ഏഴ് പന്തിൽ രണ്ട് റൺസാണ് നേടിയത്. മുംബെെ ഇന്ത്യൻസിന്റെ ശാർദ്ദുൽ ഠാക്കൂറിന്റെ പ്രകടനമാണ് പഞ്ചാബിന് തിരിച്ചടിയായി മാറിയത്. നാല് ഓവറിൽ 39 റൺസ് വിട്ടുകൊടുത്തെങ്കിലും നാല് വിക്കറ്റ് വീഴ്ത്താൻ ശാർദ്ദുലിന് സാധിച്ചു. പഞ്ചാബിനെതിരേ 16 മത്സരത്തിൽ നിന്ന് 24 വിക്കറ്റാണ് ശാർദ്ദുൽ വീഴ്ത്തിയിട്ടുള്ളത്.

പൊതുവേ തല്ലുകൊള്ളി വിശേഷണം ഉണ്ടെങ്കിലും ശാർദ്ദുലിന്റെ പഞ്ചാബിനെതിരായ പ്രകടനം ഗംഭീരമാണ്. 170നുള്ളിൽ ഒതുങ്ങുമെന്ന് തോന്നിച്ച പഞ്ചാബ് ഇന്നിങ്സ് 200ലേക്കെത്തിയതിൽ മുംബെെയുടെ ഫീൽഡിങ് പിഴവുകളും കാരണമായിട്ടുണ്ട്. 11-15 ഓവറിനുള്ളിൽ 46 റൺസിന് അഞ്ച് വിക്കറ്റുകളാണ് പഞ്ചാബിന് നഷ്ടമായത്. എന്നാൽ 16-20 ഓവറുകളിൽ രണ്ട് വിക്കറ്റുകൾ നഷ്ടപ്പെടുത്തി 65 റൺസാണ് ടീം അടിച്ചെടുത്തത്.

MI VS PBKS IPL 2026: മുംബെെയുടെ നായകസ്ഥാനത്ത് കസേരകളി? ഈ സീസണിൽ മാത്രം മൂന്ന് ക്യാപ്റ്റന്മാർ, ഹാർദിക്കും സൂര്യയും പുറത്തേക്കോ?

ഈ സീസണിൽ എട്ടാം തവണയാണ് പഞ്ചാബ് 200 പ്ലസ് ടീം സ്കോർ നേടുന്നത്. ഒരു സീസണിൽ എട്ട് തവണ 200ലധികം ടീം സ്കോർ പഞ്ചാബ് നേടുന്നത് ഇത് രണ്ടാം തവണയാണ്. നേരത്തെ 2025ലും പഞ്ചാബ് ഈ നേട്ടത്തിലേക്കെത്തിയിരുന്നു. മറ്റൊരു ടീമിനും സാധിക്കാത്ത നേട്ടമാണിത്. പഞ്ചാബിനെ സംബന്ധിച്ച് പ്ലേ ഓഫ് പ്രതീക്ഷ നിലനിർത്താൻ ഇന്ന് മുംബെെക്കെതിരേ ജയം അനിവാര്യമാണ്.