MI vs PBKS IPL 2026: പാവം പഞ്ചാബ്, 5 തുടർ തോൽവി; പ്ലേ ഓഫ് മോഹം പൊലിയുമോ? തിലകിന്റെ തോളിലേറി മുംബെെക്ക് ജയം

ഇന്ത്യൻ പ്രീമിയർ ലീഗിന്റെ 2026 സീസണിൽ അനാസായം പ്ലേ ഓഫിലേക്കെത്തുമെന്ന് കരുതിയ പഞ്ചാബ് കിങ്സ് അവസാന അഞ്ച് മത്സരത്തിലും തോൽവി നേരിട്ടിരിക്കുകയാണ്. മുംബെെ ഇന്ത്യൻസ് ആറ് വിക്കറ്റിനാണ് പഞ്ചാബിനെ തോൽപ്പിച്ചത്. ആദ്യം ബാറ്റ് ചെയ്ത പഞ്ചാബ് എട്ട് വിക്കറ്റ് നഷ്ടപ്പെടുത്തി 200 റൺസ് നേടിയപ്പോൾ ഒരു പന്തും ആറ് വിക്കറ്റും ബാക്കിയാക്കി മുംബെെ വിജയം സ്വന്തമാക്കുകയായിരുന്നു. ഇതിനോടകം പ്ലേ ഓഫ് കാണാതെ പുറത്തായ മുംബെെ പഞ്ചാബിന്റെ വഴിയടക്കുന്ന തോൽവിയാണ് നൽകിയതെന്ന് പറയാം. മുംബെെ ക്യാപ്റ്റനെന്ന നിലയിലെ ആദ്യ മത്സരത്തിൽ ടീമിന് ജയം നേടിക്കൊടുക്കാൻ ജസ്പ്രീത് ബുംറക്ക് സാധിച്ചുവെന്നതാണ് ശ്രദ്ധേയം. പ്രതീക്ഷിച്ച പോലെ ടോപ് ഓ‍‍ഡർ തിളങ്ങാതിരുന്നിട്ടും മുംബെെക്ക് വിജയം നേടാൻ സാധിച്ചുവെന്നതാണ് എടുത്തു പറയേണ്ടത്.

തിലകിന്റെ പ്രകടനം കളി മാറ്റി

പഞ്ചാബ് കിങ്സിന്റെ കണക്കുകൂട്ടൽ തെറ്റിച്ച് മുംബെെക്ക് വിജയം നേടിക്കൊടുത്തത് തിലക് വർമയുടെ കിടിലൻ പ്രകടനമാണ്. 33 പന്തിൽ പുറത്താവാതെ 75 റൺസാണ് തിലക് നേടിയത്. ആറ് സിക്സും ഫോറുമാണ് തിലക് പറത്തിയത്. 227.27 സ്ട്രെെക്ക് റേറ്റിലാണ് തിലക് ശോഭിച്ചത്. വിൽ ജാക്സ് 10 പന്തിൽ രണ്ട് വീതം സിക്സും ഫോറും ഉൾപ്പെടെ 25 റൺസോടെയും പുറത്താവാതെ നിന്നു.

ഓപ്പണർ റയാൻ റക്കിൽറ്റൻ 23 പന്തിൽ 48 റൺസോടയും മിന്നിച്ചു. നാല് വീതം സിക്സും ഫോറുമാണ് റിക്കൽറ്റൻ പറത്തിയത്. രോഹിത് ശർമ 26 പന്തിൽ 25 റൺസാണ് നേടിയത്. ഷെർഫെയ്ൻ റൂതർഫോർഡ് 21 പന്തിൽ 20 റൺസും നേടി. ശാർദ്ദുൽ ഠാക്കൂർ നാല് വിക്കറ്റുമായി മിന്നിച്ചതും മുംബെെയുടെ ജയത്തിൽ കരുത്തായി.
MI vs PBKS IPL 2026: ഒടുവിൽ വിഷ്ണു വിനോദിന് അവസരം, നിർണ്ണായക 'ഇംപാക്ട്' സൃഷ്ടിച്ച് മലയാളി താരം; ഡെത്തോവറിൽ മിന്നിച്ചു

പഞ്ചാബ് കാട്ടിയത് ഈ മണ്ടത്തരങ്ങൾ

പഞ്ചാബ് കിങ്സ് അഞ്ച് ബൗളർമാരെ മാത്രമാണ് ഉപയോഗിച്ചത്. കൂടുതൽ ബൗളർമാരെ ഉപയോഗിക്കാൻ പഞ്ചാബ് ടീം തയ്യാറാവാതെ ഇരുന്നത് തിരിച്ചടിയായി. അഞ്ച് ബൗളർമാരെ മാത്രം ഉപയോഗിക്കാനുള്ള പഞ്ചാബിന്റെ പദ്ധതി പാളുന്നതാണ് കാണാനായത്. ശശാങ്ക് സിങ്ങിനെ ബൗളിങ്ങിൽ പരീക്ഷിച്ച് നോക്കാമായിരുന്നു. നേരത്തെ ശ്രേയസ് വിശ്വസിച്ച് പന്തേൽപ്പിച്ചപ്പോഴെല്ലാം മികവ് കാട്ടാനും വിക്കറ്റ് നേടാനും ശശാങ്കിന് സാധിച്ചിരുന്നു. എന്നാൽ ഇത്തവണ ശ്രേയസ് അത്തരമൊരു പരീക്ഷണവും നടത്താതിരുന്നത് എന്തുകൊണ്ടാണെന്ന ചോദ്യം പ്രസക്തമാണ്.

MI vs PBKS IPL 2026: സഞ്ജു മിന്നിക്കുമ്പോൾ ശ്രേയസ് പിന്നോട്ടോ? മുംബെെക്കെതിരേ 2 പന്തിൽ മടങ്ങി; ആ പ്രതീക്ഷക്ക് കനത്ത തിരിച്ചടി

പഞ്ചാബിന് ഇനി എങ്ങനെ പ്ലേ ഓഫിലെത്താം

12 മത്സരത്തിൽ നിന്ന് ആറ് ജയവും അഞ്ച് തോൽവിയും ഒരു സമനിലയുമാണ് നിലവിൽ പഞ്ചാബിനുള്ളത്. 13 പോയിന്റാണ് നിലവിൽ പഞ്ചാബിനുള്ളത്. രണ്ട് മത്സരം ശേഷിക്കെ രണ്ടിലും ജയിച്ചാലും പരമാവധി 17 പോയിന്റാവും പഞ്ചാബിന് നേടാൻ സാധിക്കുക. ഇതുകൊണ്ട് പ്ലേ ഓഫ് സീറ്റുറപ്പിക്കാൻ സാധിക്കില്ല. മറ്റ് ടീമുകളുടെ പ്രകടനത്തെ ആശ്രയിച്ചാലും ഇനി പഞ്ചാബിന്റെ പ്ലേ ഓഫ് സാധ്യത. അഞ്ച് തുടർ തോൽവി നേരിട്ട പഞ്ചാബിന് ശേഷിക്കുന്ന രണ്ട് മത്സരങ്ങളിൽ വമ്പൻ തിരിച്ചുവരവ് നടത്താനാവുമോയെന്നതാണ് കണ്ടറിയേണ്ടത്.