MI VS PBKS IPL 2026: മുംബെെയുടെ നായകസ്ഥാനത്ത് കസേരകളി? ഈ സീസണിൽ മാത്രം മൂന്ന് ക്യാപ്റ്റന്മാർ, ഹാർദിക്കും സൂര്യയും പുറത്തേക്കോ?

ഇന്ത്യൻ പ്രീമിയർ ലീഗിന്റെ 2026 സീസണിൽ ഏറ്റവും നിരാശപ്പെടുത്തിയ ടീമുകളിലൊന്ന് മുംബെെ ഇന്ത്യൻസാണ്. അഞ്ച് തവണ ചാമ്പ്യന്മാരായ മുംബെെക്കൊപ്പം ഇത്തവണ കരുത്തുറ്റ താരനിരയുണ്ടായിരുന്നു. എന്നാൽ പ്ലേ ഓഫ് പോലും കാണാതെ ആദ്യം പുറത്തായ ടീമുകളിലൊന്നായി മുംബെെ ഇന്ത്യൻസ് മാറിയിരുന്നു. തൊട്ടതെല്ലാം മുംബെെക്ക് പിഴക്കുന്നതാണ് ഇത്തവണ കാണാനായത്. ക്യാപ്റ്റനെന്ന നിലയിൽ ഹാർദിക് പാണ്ഡ്യ തീർത്തും നിരാശപ്പെടുത്തിയതും സീനിയർ താരങ്ങൾ അവസരത്തിനൊത്ത് ഉയരാതിരുന്നതും മുംബെെയെ പ്രതികൂലമായി ബാധിച്ച കാര്യമാണ്. മുംബെെക്ക് പ്ലേ ഓഫ് നഷ്ടമായതോടെ ഹാർദിക് പാണ്ഡ്യ പരിക്കിനെത്തുടർന്ന് നായകസ്ഥാനത്ത് നിന്ന് മാറി നിന്നിരുന്നു. പിന്നീട് സൂര്യകുമാർ യാദവാണ് മുംബെെയെ നയിച്ചത്. ഇപ്പോഴിതാ പഞ്ചാബ് കിങ്സിനെതിരായ നിർണ്ണായക മത്സരത്തിൽ ജസ്പ്രീത് ബുംറയാണ് മുംബെെയുടെ ക്യാപ്റ്റൻ സ്ഥാനത്തുള്ളത്.

ഇത് രണ്ടാം തവണയാണ് മുംബെെ ഇന്ത്യൻസ് ഒരു സീസണിൽ മൂന്ന് ക്യാപ്റ്റന്മാരെ പരീക്ഷിക്കുന്നത്. പ്രഥമ സീസണിൽ മുംബെെ ഇത്തരമൊരു പരീക്ഷണം നടത്തിയിരുന്നു. ഹർഭജൻ സിങ്ങും സച്ചിൻ ടെണ്ടുൽക്കറും കറെൻ പൊള്ളാർഡുമാണ് അന്ന് മുംബെെയെ നയിച്ചത്. ഇതിന് ശേഷം ഇപ്പോഴാണ് ഇത്തരമൊരു പരീക്ഷണം നടത്തേണ്ട ഗതികേടിലേക്ക് മുംബെെ എത്തിയത്. മുംബെെ ഈ സീസണിൽ ഹാർദിക് പാണ്ഡ്യ, സൂര്യകുമാർ യാദവ് ഇപ്പോൾ ജസ്പ്രീത് ബുംറ എന്നിവരെയാണ് നായകനായി പരിഗണിച്ചത്.

രോഹിത് ശർമ നായകസ്ഥാനത്തേക്കെത്തിയതിന് ശേഷം ക്യാപ്റ്റൻ സ്ഥാനത്തേക്ക് മറ്റൊരു പേര് മുംബെെക്ക് പരിഗണിക്കേണ്ടതായി വന്നിരുന്നില്ല. അഞ്ച് തവണ മുംബെെയെ കപ്പിലേക്കെത്തിക്കാനും രോഹിത്തിന് സാധിച്ചിരുന്നു. എന്നാൽ രോഹിത്തിനെ നായകസ്ഥാനത്ത് നിന്ന് മാറ്റിയതിന് ശേഷം മികച്ചൊരു നായകനെ ടീമിലേക്ക് കൊണ്ടുവരാൻ‌ മുംബെെക്ക് സാധിച്ചില്ലെന്നതാണ് എടുത്തു പറയേണ്ടത്.
IND vs IRE: അയർലൻഡിനെതിരേ സൂര്യ തന്നെ നയിക്കും? സഞ്ജുവിന് ലഭിക്കുക ആ റോൾ മാത്രം; ബിസിസിഐ നീക്കം ഇങ്ങനെ, റിപ്പോർട്ട് പുറത്ത്
എന്നാൽ മുംബെെ മാത്രമല്ല ഒരു സീസണിൽ മൂന്ന് നായകന്മാരെ പരിഗണിച്ചത്. പൂനെ വാരിയേൻഴ്സ് ഇന്ത്യ 2013ൽ ഏഞ്ചലോ മാത്യൂസ്, റോസ് ടെയ്ലർ, ആരോൺ ഫിഞ്ച് എന്നിവരെ ക്യാപ്റ്റന്മാരാക്കിയിരുന്നു. സൺറെെസേഴ്സ് ഹെെദരാബാദ് 2021ൽ ഡേവിഡ് വാർണർ, കെയ്ൻ വില്യംസ്, മനീഷ് പാണ്ഡെ എന്നിവരേയും ക്യാപ്റ്റന്മാരായി പരീക്ഷിച്ചു. 2024ൽ പഞ്ചാബ് കിങ്സിനെ ശിഖർ ധവാൻ, സാം കറൻ, ജിതേഷ് ശർമ എന്നിവരും നയിച്ചിരുന്നു.

മുംബെെ ക്യാപ്റ്റൻ സ്ഥാനത്ത് ഇപ്പോൾ കസേരകളി നടത്തുന്നതിന് പിന്നിൽ ടീമിലെ അഴിച്ചുപണി സൂചനകൾ തന്നെയാണ് നൽകുന്നത്. ക്യാപ്റ്റൻ സ്ഥാനത്ത് നിന്ന് ഹാർദിക് പാണ്ഡ്യയേയും സൂര്യകുമാർ യാദവിനേയും പരിഗണിച്ചിട്ട് കാര്യമില്ലെന്ന് വ്യക്തം. രണ്ട് പേർക്കും ഉത്തരവാദിത്തം ഏറ്റെടുക്കാൻ സാധിക്കുന്നില്ല. വരുന്ന സീസണിൽ വലിയ പൊളിച്ചെഴുത്തിലേക്ക് മുംബെെ പോകുമെന്ന് വ്യക്തം.

IPL 2026: ഇങ്ങനെ തുടർന്നാൽ കാര്യം ഉണ്ടാകില്ല, വെെഭവിന് മുന്നറിയിപ്പുമായി ഡിവില്ലിയേഴ്സ്; നൽകിയ ഉപദേശം ഇതാണ്

ജസ്പ്രീത് ബുംറയെ നായകനായി പരിഗണിച്ചുള്ള പൊളിച്ചെഴുത്തിലേക്കാണോ മുംബെെ കടുക്കുന്നത് എന്ന ചോദ്യമാണ് ഇപ്പോൾ ഉയരുന്നത്. മുംബെെ പരിശീലകനെയടക്കം മാറ്റിയാവും അടുത്ത സീസണിലേക്ക് ഇറങ്ങുകയെന്നുറപ്പാണ്. വെെഭവ് സൂര്യവംശിയേയോ യശ്വസി ജയ്സ്വാളിനെയോ രാജസ്ഥാൻ ടീമിൽ നിന്ന് ഒപ്പം കൂട്ടാനുള്ള നീക്കവും മുംബെെ ആലോചിക്കുന്നുണ്ട്. പല സീനിയർ താരങ്ങളേയും ഒഴിവാക്കി യുവമുഖമായി മുംബെെ മാറിയേക്കുമെന്നാണ് നിലവിലെ സൂചനകൾ.